Pemansut
5 Pengudah nya, Moses enggau Aron betemu enggau Firaun lalu madah ngagai iya: “Tu meh utai ke dipadahka Jehovah, Petara orang Israel: ‘Awakka nembiak Aku mupuk ngambika sida ulih ngintu pengerami ke Aku ba menua puang.’” 2 Tang ku Firaun nyaut: “Sapa Jehovah? Nama kebuah aku mesti nitihka jaku Iya deh, lalu ngemendarka orang Israel mupuk? Aku langsung enda nemu sapa Jehovah. Lalu aku sigi enggai ngemendarka orang Israel mupuk.” 3 Ku seduai iya bejaku: “Petara orang Hebrew udah bejaku enggau kami. Nyadi, awakka kami bejalai tiga hari ngagai menua puang, lalu nyerahka pemeri ngagai Petara kami, Jehovah. Enti enda, Iya tentu deka ngukum kami ngena penyakit, tauka nejuka kami dibunuh ngena pedang.” 4 Raja Ejip lalu nyaut seduai iya: “Moses enggau Aron, nama kebuah seduai mai orang ninggalka pengawa sida? Alai sambung baru kereja kita!” 5 Ku Firaun nampung baru: “Peda pemayuh bala kita ba menua tu. Amat seduai deka ngasuh sida iya ngetu gawa?”
6 Ba hari nya mega, Firaun meri pesan tu ngagai sida ke nyadi tuan atas bala ulun enggau bala mandur orang Israel: 7 “Badu agi meri sida tangkai gandum kena ngaga batu bata. Awakka sida ngiga tangkai gandum kediri empu. 8 Kita mesti ngasuh sida ngaga batu bata sama mayuh baka ke digaga sida sebedau tu. Anang ngurangka iya, laban sida iya malas. Nya meh kebuah sida madah: ‘Kami ka mupuk. Kami deka nyerahka pemeri ngagai Petara kami.’ 9 Asuh sida bendar agi gawa ngambika sida sibuk, lalu nadai hari ningaka jaku ti bula.”
10 Nya alai, sida ke nyadi tuan atas bala ulun enggau bala mandur orang Israel bejaku ngagai orang Israel: “Tu meh utai ke dipadahka Firaun: ‘Aku enda agi meri kita tangkai gandum. 11 Kita mesti ngiga tangkai gandum kediri empu. Barang ku kita dini kita deka ngiga iya. Tang pengawa kita tetap enda dikurangka.’” 12 Orang Israel pan bejalai ba serata menua Ejip laban deka ngumpul tangkai gandum ari ladang ke udah diketau. 13 Sida ke nyadi tuan atas bala ulun majak madahka sida: “Kita mesti ngasilka batu bata sama mayuh baka maya tangkai gandum bisi disediaka ngagai kita.” 14 Bala tuan nya mega malu orang ke udah dipilih sida nyadi mandur orang Israel. Sida nanya bala mandur nya: “Nama kebuah batu bata kita enda ngemayuh ke sebedau tu? Kemari baka nya, seharitu pan baka nya!”
15 Nya alai, bala mandur orang Israel besebana ngagai Firaun: “Nama kebuah nuan ngaga bala ulun nuan baka tu? 16 Sida ngasuh kami ngaga batu bata, tang sida nadai nyediaka tangkai gandum. Kami dipalu, taja pan bala kita ke salah.” 17 Ku Firaun nyaut: “Kita malas! Kita tu orang ke malas! Nya meh kebuah kita nyebut: ‘Kami ka mupuk, kami deka nyerahka pemeri ngagai Jehovah.’ 18 Alai, sambung pengawa kita! Nadai tangkai gandum deka diberi ngagai kita. Tang kita agi mesti ngasilka batu bata ngemayuh ke suba.”
19 Bala mandur orang Israel sedar sida bisi penanggul ti besai ketegal pesan tu: “Kita enda tau ngurangka penyampau batu bata ke digaga kita tiap hari.” 20 Pengudah sida betemu enggau Firaun, sida betemu enggau Moses seduai Aron ke benung nganti sida. 21 Sida lalu madah ngagai seduai iya: “Awakka Jehovah meda utai ke udah digaga seduai lalu ngukum seduai, laban seduai udah ngasuh Firaun enggau bala pegawai iya begedika kami. Nya baka seduai udah meri sida pedang kena munuh kami.” 22 Udah nya, Moses besampi ngagai Jehovah. Ku iya madah: “Jehovah, nama kebuah Nuan ngasuh nembiak Nuan merinsa? Nama meh kebuah Nuan nganjung aku? 23 Kenyau ari maya aku betemu enggau Firaun ngarika Nuan,* iya makin jai enggau bala nembiak Nuan, tang Nuan enda nyelamatka sida.”