Baka Ni Kitai Ulih Majak Rinduka Pangan Diri?

1-2. (a) Nama kebuah Rasul Paul madahka pengerindu nya sifat ti “pemadu besai”? (b) Nama tanya ke deka dipejuraika kitai?

LEBUH Rasul Paul bejaku pasal pengarap, pengandal kitai nganti utai ke dikearapka, enggau pengerindu, iya madahka “pengerindu meh ke pemadu besai entara tiga iti [sifat] nya.” (1 Kor. 13:13) Nama kebuah Paul nyebut munyi nya? Jemah ila, kitai enda agi begunaka pengarap ngagai semaya Petara pasal dunya baru, laban semua utai ke dikeandalka kitai udah dikeamatka. Tang pengerindu deka seruran bisi laban kitai rinduka Jehovah enggau orang bukai. Pengerindu kitai ke sida deka majak nambah nyentukka belama iya.

² Ketegal pengerindu nya sifat ke patut seruran diayanka kitai, kitai deka bejuraika tiga iti tanya. Kesatu, nama kebuah kitai patut rinduka pangan diri? Kedua, baka ni kitai ngayanka pengerindu ke pangan diri? Lalu ketiga, baka ni kitai ulih majak rinduka pangan diri?

NAMA KEBUAH KITAI PATUT RINDUKA PANGAN DIRI?

3. Nama kebuah kitai rinduka pangan diri?

³ Nama kebuah nya penting kitai rinduka pangan diri? Lebuh kitai rinduka bala menyadi Kristian, kitai nunjukka diri orang Kristian ti bendar. Jesus madah ngagai bala rasul iya: “Enti kita rinduka pangan diri, semua orang deka nemu, kita meh murid aku.” (Jhn. 13:35) Pia mega, enti kitai rinduka pangan diri, nya nulung kitai beserakup. Paul madah “pengerindu ulih nyerakupka semua orang enggau sempurna.” (Kol. 3:14) Tang, bisi siti agi kebuah ti penting kitai patut rinduka pangan diri. Rasul John nulis ngagai bala menyadi Kristian: “Orang ke rinduka Petara mega mesti rinduka menyadi diri.” (1 Jhn. 4:21) Amat, lebuh kitai rinduka pangan diri, kitai nunjukka diri rinduka Petara.

4-5. Nama kaul entara pengerindu kitai ke Petara enggau pengerindu kitai ke pangan diri? Beri siti sempama.

⁴ Nama kaul entara pengerindu kitai ke Petara enggau pengerindu kitai ke pangan diri? Peratika sempama tu. Jantung kitai bisi kaul enggau begian ke bukai ba tubuh kitai. Lebuh lutur meresa nadi jantung ba pergelangan jari kitai, iya ulih nemu gaya pengerai jantung kitai. Nama ulih dipelajarka kitai ari sempama tu pasal pengerindu?

⁵ Lebuh lutur meresa nadi jantung kitai, iya ulih nemu sekalika jantung kitai kuat tauka enda. Baka nya mega, enti kitai beratika penalam pengerindu kitai ke orang bukai, kitai ulih nemu penalam pengerindu kitai ke Petara. Enti kitai ngasaika pengerindu kitai ke bala menyadi Kristian majak kurang, tu engka nunjukka pengerindu kitai ke Petara mega majak kurang. Tang lebuh kitai seruran ngayanka pengerindu ngagai bala menyadi Kristian, kitai ulih nemu pengerindu kitai ke Petara agi tegap.

6. Nama kebuah kitai patut irau enti pengerindu kitai ke bala menyadi Kristian majak lemi? (1 John 4:​7-9, 11)

⁶ Kitai patut irau enti pengerindu kitai ke bala menyadi Kristian majak lemi. Nama kebuah? Laban tu reti iya kaul kitai enggau Jehovah udah majak lemi. Rasul John madahka tu enggau terang lebuh iya ngingatka kitai: “Orang ke enda rinduka menyadi diri, ke ulih dipeda iya, enda ulih rinduka Petara, ke enda kala dipeda iya.” (1 Jhn. 4:20) Nama ulih dipelajarka kitai? Jehovah semina lantang ati enggau kitai enti kitai “rinduka pangan diri.”—Bacha 1 John 4:​7-9, 11.

BAKA NI KITAI NGAYANKA PENGERINDU KE PANGAN DIRI?

7-8. Baka ni kitai ulih ngayanka pengerindu ngagai pangan diri?

⁷ Dalam Bup Kudus, mayuh kali kitai tetemuka pesan ke ngasuh kitai “rinduka pangan diri.” (Jhn. 15:​12, 17; Rom. 13:8; 1 Tes. 4:9; 1 Pet. 1:22; 1 Jhn. 4:11) Taja pia, pengerindu nya sifat ke bisi dalam ati kitai, lalu nadai orang ulih meda utai dalam ati kitai. Nyadi, baka ni orang ulih nemu sekalika kitai rinduka sida tauka enda? Iya nya nengah jaku enggau ulah kitai.

⁸ Bisi mayuh chara kitai ulih nunjuk ngagai bala menyadi Kristian, kitai rinduka sida. Tu sekeda chunto iya: “Sebut utai ti bendar ngagai pangan diri.” (Sek. 8:16) “Mengkang bebaik enggau pangan diri.” (Mrk. 9:50) “Awakka kita dulu ngayanka basa ngagai pangan diri.” (Rom. 12:10) “Kita patut nerima pangan diri.” (Rom. 15:7) “Terus meh ngampunka pangan diri.” (Kol. 3:13) “Terus meh nulung pangan diri mai ma ti berat.” (Gal. 6:2) “Terus meh ngelantangka ati pangan diri.” (1 Tes. 4:18) “Terus meh negapka pangan diri.” (1 Tes. 5:11) “Besampika pangan diri.”—Jas. 5:16.

9. Nama kebuah ngelantangka ati orang bukai nya siti chara ti penting kitai ngayanka pengerindu ngagai sida? (Peda mega gambar.)

⁹ Aram kitai beratika siti chara kitai ulih ngayanka pengerindu ngagai orang bukai, baka ke dipadah ba genteran sebedau tu. Paul madahka: “Terus meh ngelantangka ati pangan diri.” Nama kebuah ngelantangka ati orang bukai nya siti chara ti penting kitai ngayanka pengerindu ngagai sida? Nitihka siti pansik pasal Bup Kudus, leka jaku ke dikena Paul madahka pasal “ngelantangka ati” mai reti “bediri ngimbai sesiku orang kena meransang iya lebuh orang nya benung napi situasi ti tusah.” Nyadi, lebuh kitai ngelantangka ati siku menyadi ke benung merinsa, kitai nulung iya terus nyembah Jehovah enggau tetap ati. Lalu tiap kali kitai ngelantangka ati menyadi Kristian kitai, kitai ngayanka diri rinduka sida.—2 Kor. 7:​6, 7, 13.

10. Nama kaul entara penyiru enggau ngelantangka ati orang bukai?

¹⁰ Penyiru enggau ngelantangka ati orang bukai bisi kaul ti rapat entara pangan diri. Lebuh sesiku orang siruka orang ke benung merinsa, iya deka ngelantangka ati sereta ngereja utai kena nulung orang nya. Nyadi, lebuh kitai bisi penyiru, tu nulung kitai ngelantangka ati orang bukai. Peratika baka ni Paul ngaitka penyiru Petara enggau pengelantang ke diberi Iya. Paul madahka, Jehovah nya “Apai ti penuh enggau pengasih sereta Petara ti ngelantangka ati kitai dalam semua pekara.” (2 Kor. 1:3) Ditu Paul ngena leka jaku “pengasih” kena ngambarka asai ati ti siruka orang bukai. Nyadi, Petara dikumbai Apai tauka Pun pengasih laban Iya balat siruka orang. Lalu penyiru nya meransang Jehovah ngelantangka ati “kitai lebuh kitai napi semua macham penguji.” (2 Kor. 1:4) Gambarka tu: Ai ti beresi ke datai ari siti mata ai ulih ngasuh orang ke aus berasai nyamai. Baka nya mega, Jehovah ulih mai pengelantang ngagai orang ke tusah ati sereta ngasuh sida berasai nyamai. Baka ni kitai ulih neladan penyiru Jehovah sereta ngelantangka ati orang bukai? Siti chara nya, kitai ulih ngemansangka sifat ke deka nulung kitai siruka orang bukai sereta ngelantangka ati sida. Nama sekeda sifat nya?

11. Nitihka Kolosi 3:12 enggau 1 Peter 3:​8, nama sifat ke bukai ke deka nulung kitai rinduka orang bukai sereta ngelantangka ati sida?

¹¹ Nama deka nulung kitai ngetanka pengerindu ke nulung kitai ‘terus ngelantangka ati pangan diri’ ninting hari? Kitai patut ngemansangka sifat baka simpati, rinduka pangan diri baka diri menyadi, sereta manah ati. (Bacha Kolosi 3:12; 1 Peter 3:8.) Baka ni sifat-sifat tu deka nulung kitai? Lebuh kitai siruka bala menyadi Kristian kitai lalu amat ibuhka sida, kitai deka keran agi ngelantangka ati sida lebuh sida tusah ati. Baka ke dipadah Jesus, “utai ti disebut orang datai ari ati. Orang ke manah mansutka utai ti manah ari ati iya ti manah.” (Mat. 12:​34, 35) Ngelantangka ati bala menyadi Kristian kitai nya siti chara ti penting kitai ngayanka pengerindu ngagai sida.

BAKA NI KITAI ULIH MAJAK RINDUKA PANGAN DIRI?

12. (a) Nama kebuah kitai patut bejimat ngambika enda lenyau pengerindu ke pangan diri? (b) Nama tanya ti penting ke deka dikerandauka kitai?

¹² Semua kitai deka “terus rinduka pangan diri.” (1 Jhn. 4:7) Taja pia, kitai patut ingat Jesus kala madah “pengerindu orang ke pangan diri deka majak kurang.” (Mat. 24:12) Kati tu reti iya mayuh ari bala murid Jesus deka ngetu rinduka pangan diri? Enda. Tang kitai patut bejimat ngambika enda nitihka chara orang ba dunya, ke enda ngayanka pengerindu. Nya alai, kitai deka berandauka siti tanya ti penting: Nama ulih nulung kitai nemu sekalika kitai agi rinduka bala menyadi Kristian tauka enda?

13. Nama ulih nulung kitai nemu sekalika kitai agi rinduka bala menyadi Kristian tauka enda?

¹³ Siti chara kitai ulih nemu sekalika kitai agi rinduka bala menyadi, iya nya ari reaksi kitai lebuh sekeda situasi nyadi ba pengidup kitai. (2 Kor. 8:8) Rasul Peter bisi nyebut siti ari situasi nya. Ku iya: “Tang ke pemadu penting nya, rindu meh ke pangan diri enggau pengabis ati laban pengerindu ulih nutup mayuh dosa.” (1 Pet. 4:8) Bala menyadi Kristian engka ngaga penyalah tauka ngereja utai ke ngemediska ati kitai. Lebuh utai nya nyadi, reaksi kitai deka nulung kitai nemu sekalika kitai rinduka sida tauka enda.

14. Nitihka 1 Peter 4:​8, kitai patut bisi pengerindu ke baka ni? Beri siti chunto.

¹⁴ Aram kitai beratika enggau silik utai ti dipadah Peter. Ba ayat 8, Peter madah kitai patut rindu “enggau pengabis ati.” Nya meh pengerindu ke patut dikembuan kitai. Leka jaku “pengabis ati” ke dikena Peter mai reti “ditarit ngambika ulih ngerembai.” Udah nya, ayat nya madahka utai ke deka digaga kitai enti kitai rinduka pangan diri enggau pengabis ati. Pengerindu tu nulung kitai nutup dosa bala menyadi Kristian kitai. Gambarka mija ke bisi mayuh calar. Kitai ulih ngerembaika siti kain tauka narit kain nya kena nutup semua calar ba atas mija nya. Baka nya mega, enti kitai rinduka bala menyadi Kristian enggau pengabis ati, kitai ulih nutup tauka ngampunka, ukai siti tauka dua iti pengelemi sida, tang “ulih nutup mayuh dosa.”

15. Enti pengerindu kitai ke bala menyadi Kristian chukup dalam, nama utai ke ulih digaga kitai? (Kolosi 3:13)

¹⁵ Kitai patut bisi pengerindu ti dalam ngagai bala menyadi Kristian. Enggau nya kitai ulih ngampunka pengelemi bala menyadi Kristian, taja pan kekadang tusah. (Bacha Kolosi 3:13.) Lebuh kitai ngampunka orang bukai, kitai nunjukka pengerindu kitai tegap, sereta deka ngelantangka ati Jehovah. Nama utai bukai ke ulih nulung kitai ngampunka penyalah orang bukai sereta enda kelalu jampat pedis ati enggau utai ke dikereja sida?

16-17. Nama utai bukai ke deka nulung kitai ngampunka penyalah orang bukai? Beri siti chunto. (Peda mega gambar.)

¹⁶ Ulih nuan betumpu ba pemanah bala menyadi Kristian, ukai ba pengelemi sida? Peratika chunto tu. Nuan bisi makai begulai enggau bala menyadi ke bukai. Nuan rindu begulai enggau sida. Udah nya kita bisi begambar. Nuan engka ngambi dua tauka tiga iti gambar, laban nuan irau gambar ti keterubah nya enda manah. Diatu nuan bisi tiga iti gambar. Tang ba siti ari gambar nya, nuan meda siku menyadi enda tuchum. Nama deka digaga nuan enggau gambar nya? Nuan deka muai gambar nya. Nama kebuah? Laban nuan bisi dua iti agi gambar. Dalam gambar nya semua orang tuchum, nyengkaum menyadi nya.

¹⁷ Kitai ulih mandingka gambar ke disimpan kitai enggau kenangan ti manah lebuh begulai enggau bala menyadi. Tang baka ni enti ba siti ari kenangan nya, siku menyadi nyebut tauka ngereja utai ti ngemediska ati nuan? Nama patut digaga nuan enggau kenangan nya? Ulih nuan nguji muai kenangan nya, sama baka chara nuan muai gambar ti enda manah nya? (J-lam. 19:11; Eps. 4:32) Kitai ulih muai kenangan ti enda manah pasal penyalah ke digaga menyadi nya laban kitai agi bisi mayuh kenangan ti manis enggau iya. Kenangan ke baka nya meh ke deka disimpan kitai.

NAMA KEBUAH PENGERINDU AMAT PENTING KEMAYAHARITU?

18. Nama poin ti penting pasal pengerindu ke udah dikerandauka kitai dalam artikel tu?

¹⁸ Nama kebuah kitai patut majak rinduka pangan diri? Baka ke udah dikerandauka kitai, lebuh kitai ngayanka pengerindu ngagai bala menyadi Kristian, kitai ngayanka pengerindu ngagai Jehovah. Baka ni kitai ngayanka pengerindu ngagai bala menyadi Kristian? Siti chara kitai ulih ngereja nya, iya nya ngelantangka ati sida. Enti kitai siruka orang bukai, kitai ulih terus “ngelantangka ati” pangan diri. Baka ni kitai ulih nentuka pengerindu kitai ke pangan diri mengkang tegap? Kitai ulih ngereja nya lebuh kitai ngampunka penyalah bala menyadi, taja pan bisi maya iya tusah.

19. Nama kebuah nya penting kitai ngayanka pengerindu ngagai pangan diri, kelebih agi kemayaharitu?

¹⁹ Nama kebuah nya penting kitai ngayanka pengerindu ngagai pangan diri, kelebih agi kemayaharitu? Peratika utai ku Peter: “Tang pengujung semua utai nyau semak. Nya alai, rindu meh ke pangan diri enggau pengabis ati.” (1 Pet. 4:​7, 8) Seraya pengujung dunya tu majak semak, nama utai ke deka nyadi? Ku Jesus madah pasal bala murid iya: “Semua bansa deka begedika kita ketegal nama aku.” (Mat. 24:9) Kitai patut mengkang beserakup ngambika ulih terus tetap ati ngagai Jehovah, taja pan dipegedi. Enti kitai rinduka bala menyadi Kristian, Sitan enda ulih mechah-belahka kitai “laban pengerindu ulih nyerakupka semua orang enggau sempurna.”—Kol. 3:14; Plp. 2:​1, 2.