Kati Nuan Udah Besedia ke Penusah ti Besai?

1. Nama kebuah nya manah enti kitai besedia dulu sebedau napi penusah?

ENTI kitai udah besedia, nya ulih nyelamatka nyawa kitai. Ambika chunto, lebuh penusah ninggang, orang ke udah besedia deka bisi peluang selamat ti besai agi sereta ulih nulung orang bukai. Siti gerempung ba Eropah ke nguji nulung orang madahka: “Enti kitai besedia enggau manah, nya ulih nyelamatka nyawa.”

2. Nama kebuah kitai patut besedia ke Penusah ti Besai? (Matthew 24:44)

² “Penusah ti Besai” deka nyadi enggau ngenyit. (Mat. 24:21) Tang Penusah ti Besai tu enda sama enggau penusah ke bukai, laban kitai nemu iya endang deka datai. Kira-kira 2,000 taun kelia, Jesus udah nangkan bala murid iya kena besedia ke hari nya. (Bacha Matthew 24:44.) Enti kitai udah besedia, kitai deka senang agi tan napi maya ti tusah nya sereta nulung orang bukai mega ngereja utai ti sama.—Luk. 21:36.

3. Baka ni ati ti tan, ati ti siru, sereta pengerindu nulung kitai besedia ke Penusah ti Besai?

³ Peratika tiga iti sifat ke ulih nulung kitai besedia ke Penusah ti Besai. Nama deka digaga kitai enti kitai diasuh ngerembaika pesan ngakim ti berat lalu orang ke enda arap nyakal kitai? (Pem. 16:21) Kitai begunaka ati ti tan ngambika ulih ngasika Jehovah lalu arap Iya deka nyaga kitai. Nama deka digaga kitai enti bala menyadi kitai lenyau sekeda tauka semua utai ti dikemisi sida? (Hab. 3:17, 18) Ati ti siru deka meransang kitai meri tulung ke diguna sida. Nama deka digaga kitai enti kitai patut diau begulai enggau mayuh ari bala menyadi Kristian kitai pengelama sesiti timpuh ketegal diserang orang ari bemacham-macham bansa ke begempung? (Esk. 38:10-12) Pengerindu ti besai ke sida deka nulung kitai tan napi maya ti tusah nya.

4. Baka ni Bup Kudus nunjukka kitai mesti terus ngemansangka ati ti tan, ati ti siru, enggau pengerindu?

⁴ Jaku Petara meransang kitai terus ngemansangka ati ti tan, ati ti siru, enggau pengerindu. Luke 21:19 madahka: “Enti kita betan, kita deka mengkang idup.” Kolosi 3:12 madahka: “Rasukka meh ati ti siru.” Lalu 1 Tesalonika 4:9, 10 madahka: “Kita empu udah diajar Petara ngambika rinduka pangan diri. . . . Taja pia, bala menyadi, kami minta kita terus meh ngereja nya enggau bebendar agi.” Semua ayat tu ditulis ngagai bala murid ke udah ngayanka ati ti tan, ati ti siru, enggau pengerindu. Taja pia, sida patut terus belajar ngayanka sifat tu. Kitai mega patut belajar ngereja utai ti sama. Nama deka nulung kitai? Kitai deka beratika chara orang Kristian ba abad keterubah ngayanka tiap iti sifat nya. Lalu kitai deka beratika chara kitai ulih neladan bala murid nya, sereta nunjukka kitai udah besedia ke Penusah ti Besai.

NGEMANSANGKA ATI TI TAN

5. Baka ni orang Kristian ba jeman Paul tan napi penanggul sida?

⁵ Orang Kristian ba jeman Paul begunaka ati ti tan. (Heb. 10:36) Sida napi mayuh penanggul ti sama baka ke ditapi mayuh orang ba jeman nya. Tang sida mega napi penanggul ke bukai laban sida orang Kristian. Mayuh ari sida ukai aja diperinsa bala tuai pengarap orang Judah sereta piak bekuasa perintah Rome, tang ruang bilik sida mega merinsaka sida. (Mat. 10:21) Lalu kekadang ba dalam raban gempuru mega, sida patut belaban enggau ajar ti pelesu ke dikerembaika orang ti limpang ke udah ngelaban Petara. Sida ke limpang tu nguji ngachau penyerakup dalam raban gempuru. (SKR. 20:29, 30) Taja pia, orang Kristian ba maya nya terus ngayanka ati ti tan. (Pem. 2:3) Nama chara iya? Sida belematika teladan orang dalam Bup Kudus ke ngayanka ati ti tan, baka Jop. (Jas. 5:10, 11) Sida besampi minta pengering. (SKR. 4:29-31) Lalu sida mengkang ingat Jehovah deka merekatka sida enti sida terus ngayanka ati ti tan.—SKR. 5:41.

6. Nama ulih dipelajarka nuan ari utai ti digaga Merita ngambika ulih tan napi sakal?

⁶ Dalam Bup Kudus enggau litaricha kitai bisi teladan nembiak Petara ke ngayanka ati ti tan. Enti kitai seruran belajar sereta belematika semua teladan tu, nya deka nulung kitai ngayanka ati ti tan. Siku menyadi indu ba Albania, ke benama Merita, udah ngereja nya. Ketegal nya, iya ulih tan napi sakal ari diri sebilik iya. Ku iya: “Cherita Jop dalam Bup Kudus amat meransang aku. Iya balat merinsa lalu iya mega enda nemu sapa ke ngasuh iya merinsa. Taja pia iya agi ulih madahka: ‘Aku deka majak ngumbai diri nadai penyalah nyentuk ngagai maya aku mati.’ (Jop 27:5) Aku berunding pasal penusah ke ditapi Jop. Penusah iya balat agi ari penusah aku. Lalu enda baka Jop, aku nemu sapa ke ngasuh aku merinsa.”

7. Taja pan kitai nadai penanggul ti balat diatu, tang nama utai ke patut dikereja kitai ari diatu?

⁷ Lebuh kitai seruran besampi ngagai Jehovah lalu madahka Iya semua utai ti ngasuh kitai irau, nya deka nulung kitai ngemansangka agi sifat ati ti tan. (Plp. 4:6; 1 Tes. 5:17) Nuan engka enda napi penanggul ti balat diatu. Tang, kati nuan bisi besampi ngagai Jehovah lalu minta tulung ari Iya lebuh nuan berasai tusah ati, charut runding, tauka enda nemu nama utai ti patut dikereja nuan? Enti nuan seruran besampi minta tulung ari Petara kitai, indah lebuh nuan napi penanggul ti mit diatu, nuan tentu enda kakang ati ngereja utai ti sama lebuh nuan napi penanggul ti besai agi jemah ila. Nya baru nuan ulih andal enggau pengabis ati, Jehovah nemu kemaya sereta nama utai ke patut dikereja Iya kena nulung nuan.—Mas. 27:1, 3.

8. Baka ni teladan Mira nunjukka enti kitai tan napi penanggul diatu, nya deka nulung kitai napi penanggul jemah ila? (James 1:2-4) (Peda mega gambar.)

⁸ Kitai deka agi tan napi Penusah ti Besai ke deka datai enti kitai mengkang tetap ati ngagai Jehovah lebuh napi penanggul diatu. (Rom. 5:3) Nama kebuah kitai ulih bejaku munyi nya? Mayuh bala menyadi madahka, tiap kali sida mujur tan napi sesiti situasi ti tusah, nya nulung sida besedia agi kena napi penusah ke bukai ke deka datai. Lebuh sida tan napi penanggul enggau tulung ari Jehovah, nya ngasuh sida arap agi Jehovah deka nulung sida. Lalu ketegal sida arapka Jehovah, sida ulih tan napi penguji ke deka datai. (Bacha James 1:2-4.) Mira, siku pengerintis ba Albania madahka, ketegal iya tan napi penanggul suba, nya udah nulung iya terus tan napi penanggul ke dikembuan iya diatu. Iya ngaku, kekadang iya ngasaika iya siku aja ke napi mayuh penusah. Tang udah nya iya ngenang baru utai ti udah dikereja Jehovah kena nyukung iya pengelama 20 taun ti udah, lalu iya madah ngagai diri empu: ‘Terus meh tetap ati ngagai Jehovah. Jehovah udah nulung nuan tan napi mayuh situasi ti tusah. Anang meh ngetu nyembah Jehovah diatu.’ Nuan mega ulih belematika chara Jehovah udah nulung nuan tan napi penanggul. Andal meh Iya beratika tiap kali nuan tan napi penanggul lalu Iya deka merekatka nuan. (Mat. 5:10-12) Nyadi lebuh Penusah ti Besai berengkah, nuan udah nemu chara ngayanka ati ti tan, lalu nuan mega deka terus ngayanka sifat nya.

AYANKA ATI TI SIRU

9. Baka ni raban gempuru ba Antiok di Siria ngayanka penyiru?

⁹ Peratika utai ti nyadi lebuh orang Kristian ba Judea napi lapar pungkang ti balat. Pengudah raban gempuru ba Antiok di Siria ninga pasal penusah nya, sida tentu berasai siru ke bala menyadi sida ba Judea. Nyadi sida ngayanka penyiru nya nengah ulah sida. Sida ngaga pemutus deka meri tulung ngagai bala menyadi ke diau ba Judea. Sida “meri tulung nitihka utai ti ulih diberi sida siku-siku.” (SKR. 11:27-30) Taja pan bala menyadi ke ditinggang lapar pungkang nya diau ba endur ti jauh, orang Kristian ba Antiok keran deka nulung sida.—1 Jhn. 3:17, 18.

10. Baka ni kitai ulih ngayanka penyiru lebuh bala menyadi bukai ditinggang penusah? (Peda mega gambar.)

¹⁰ Kitai mega ulih ngayanka penyiru kemayaharitu lebuh kitai ninga pasal bala menyadi kitai ke udah ditinggang penusah baka bencana alam. Kitai deka nulung enggau jampat. Baka ni kitai ulih nulung? Kitai engka ulih nanya ngagai bala tuai gempuru enti kitai ulih nulung ba sesiti projek, meri duit pemeri ngagai pengawa sedunya, tauka besampika sida ti ditinggang penusah.b (J-lam. 17:17) Ambika chunto, ba taun 2020, lebih ari 950 Komiti Tulung maya Penusah ditumbuhka ba serata dunya kena nulung sida ke begunaka bantu maya timpuh pandemik COVID-19. Kitai amat beterima kasih ngagai bala menyadi ke nulung ba pengawa meri bantu tu. Ketegal sida bisi penyiru ngagai bala menyadi, sida nganjung utai ti diguna, nulung bala menyadi terus nyembah Jehovah, sereta bisi maya iya ngadu tauka nirika baru rumah enggau Palan Gempuru.—Banding 2 Korint 8:1-4.

11. Baka ni kitai ngemuliaka Apai kitai ba serega lebuh kitai ngayanka penyiru?

¹¹ Lebuh kitai ngayanka penyiru pengudah penusah ninggang, orang bukai beratika pengorbanan ke digaga kitai. Ambika chunto, ba taun 2019, Ribut Dorian ngerusakka siti Palan Gempuru ba Pulau Bahama. Lebuh bala menyadi kitai benung nirika baru Palan Gempuru nya, sida nanya ngagai siku orang ke kereja kontrak ke ukai Saksi pasal ungkus iya enti iya diasuh ngereja sekeda utai. Iya madah ngagai sida: “Aku deka meri . . . perengka, orang ke gawa, sereta utai ti diguna kita. . . . Tu pemeri ari aku ke kita. Aku deka ngereja tu ke gerempung kita. Aku amat kagum enggau asai ati kita ngagai bala kaban kita.” Mayuh orang ba dunya tu enda nemu pasal Jehovah. Tang mayuh ari sida bisi beratika bala Saksi Jehovah. Kitai amat gaga ati laban kitai nemu, lebuh kitai ngayanka penyiru ngagai orang bukai, nya ngasuh orang deka nemu mayuh agi pasal Jehovah, Petara ti bisi “pengasih ti besai”!—Eps. 2:4.

12. Baka ni ngemansangka sifat penyiru kemayaharitu nulung kitai besedia ke Penusah ti Besai? (Pemandang 13:16, 17)

¹² Nama kebuah kitai patut ngayanka penyiru ba timpuh Penusah ti Besai? Bup Kudus madahka, orang ke enda nyukung perintah ba dunya tu deka napi penanggul—diatu sereta ba maya Penusah ti Besai. (Bacha Pemandang 13:16, 17.) Bala menyadi kitai engka begunaka tulung ngulihka utai ti digunaka sida beridup. Lebuh Raja kitai, Jesus Kristus, datai ngakim orang, kitai deka iya meda kitai bisi ngayanka penyiru lalu mai kitai “bempu Perintah” Petara.—Mat. 25:34-40.

NGENALAMKA PENGERINDU KE BALA MENYADI KRISTIAN

13. Nitihka Rome 15:7, baka ni orang Kristian ba abad keterubah ngenalamka pengerindu sida ke pangan diri?

¹³ Semua orang nemu orang Kristian ba abad keterubah rinduka pangan diri. Tang kati sida senang ngayanka pengerindu? Peratika sekeda utai ti bisi ba raban gempuru di Rome. Sekeda ari sida orang Judah ke diajar ngasika Adat Moses, tang ke bukai datai ari bansa bukai, lalu sida dibesaika nitihka adat ti bebida. Sekeda orang Kristian engka ulun, tang ke bukai engka ukai. Sekeda ari sida engka tuan ke ulun nya. Baka ni orang Kristian ba jeman nya ulih terus ngayanka pengerindu ke pangan diri taja pan gaya pendiau sida amat bebida? Rasul Paul meransang sida “nerima pangan diri.” (Bacha Rome 15:7.) Nama reti utai ku Paul? Leka jaku “nerima” mai reti nerima orang enggau manah, baka nerima orang nya tama ngagai rumah kitai tauka nerima sida nyadi kaban kitai. Ambika chunto, Paul madah ngagai Pilimon chara nerima Onesimus, siku ulun ke udah ngerarika diri: “Terima meh iya enggau manah.” (Plm. 17) Prisila enggau Akuila nerima Apollos. Apollos semina nemu mimit aja pasal pengarap Kristian enti dibandingka enggau seduai iya. Taja pia, Prisila enggau Akuila “mai iya enggau seduai iya.” (SKR. 18:26) Orang Kristian ba abad keterubah enda nejuka utai ti bebida entara sida ngerusakka kaul sida enggau pangan diri, tang sida nerima pangan diri enggau manah.

14. Baka ni Anna enggau laki iya ngayanka pengerindu?

¹⁴ Kitai mega ulih ngayanka pengerindu ngagai bala menyadi Kristian kitai lebuh kitai nyadi kaban sida sereta begulai enggau sida. Kesuah iya, nya deka meransang sida ngayanka pengerindu ngagai kitai mega. (2 Kor. 6:11-13) Peratika pengalaman Anna enggau laki iya. Seduai iya dianjung nyadi pengerintis seberai tasik ba Afrika Barat. Enda lama pengudah seduai iya pindah dia, pandemik COVID-19 pan ngelekai. Ketegal pandemik nya, seduai iya enda ulih betemu betunga mua enggau bala menyadi ba raban gempuru nya. Nya ngasuh seduai iya tusah deka ngelala bala menyadi Kristian ba dia. Baka ni seduai iya ngayanka pengerindu? Seduai iya ngena konferen video kena berandau enggau bala menyadi ba dia. Seduai iya mega madahka diri deka ngelala sida enggau manah agi. Bala menyadi ba dia amat beterima kasihka pengerindu ti diayanka seduai iya, lalu sida pan berengkah suah talipun sereta nganjung mesej ngagai seduai iya. Nama kebuah Anna enggau laki iya bebendar deka ngelala bala menyadi Kristian ba raban gempuru ti baru nya? Anna madahka: “Aku deka seruran ingatka bala menyadi Kristian ke ngayanka pengerindu ngagai aku enggau diri sebilik aku ba maya ti senang sereta ba maya ti tusah. Teladan sida meransang aku ngayanka pengerindu mega.”

15. Nama ulih dipelajarka nuan ari teladan Vanessa pasal rinduka semua bala menyadi Kristian kitai? (Peda mega gambar.)

¹⁵ Mayuh ari raban gempuru kitai ngembuan bala menyadi Kristian ke datai ari latar belakang ti amat bebida, lalu sida mega ngembuan personaliti ti amat bebida enggau kitai. Kitai ulih ngenalamka pengerindu kitai ke semua sida lebuh kitai betumpu ba sifat manah ti dikembuan sida. Vanessa, siku menyadi indu ba New Zealand, kala ngasaika tusah deka begulai enggau sekeda orang ba raban gempuru iya. Tang udah nya iya ngaga pemutus, ari ke ngenyauhka diri ari orang ke ngembuan personaliti ti enda dikerinduka iya, iya deka ngena mayuh agi awak begulai enggau sida. Nya nulung iya beratika utai ti dikerinduka Jehovah pasal sida. Ku iya madahka: “Kenyau ari maya laki aku nyadi tuai ti ngabas, kami begulai enggau mayuh agi bala menyadi Kristian ke ngembuan personaliti ti bebida, lalu aku ngasaika nya senang agi begulai enggau sida. Diatu aku rinduka semua personaliti sida ke enda sama nya. Jehovah mega tentu rinduka nya lalu Iya nejuka semua orang nyembah Iya, taja pan sida bisi personaliti tauka latar belakang ti enda sama.” Lebuh kitai belajar beratika orang sama baka chara Jehovah beratika sida, kitai nunjukka diri rinduka sida.—2 Kor. 8:24.

16. Nama kebuah pengerindu nya penting maya Penusah ti Besai? (Peda mega gambar.)

¹⁶ Pengerindu amat penting maya Penusah ti Besai. Lebuh penusah nya berengkah, baka ni Jehovah deka nyaga kitai? Peratika utai ti diasuh Jehovah kereja bala nembiak Iya lebuh menua Babilon kelia diserang: ‘Pulai ngagai rumah kita empu, kita ke nembiak aku, lalu tutup pintu kita. Belalai enda lama, nganti pengeringat Petara badu.’ (Isa. 26:20) Kitai mega engka patut nitihka iring ti sama maya Penusah ti Besai. “Rumah” tauka bilik ti selamat nya engka ditujuka ngagai raban gempuru kitai. Maya Penusah ti Besai, Jehovah besemaya Iya deka nyaga kitai enti kitai terus nyembah Iya begulai enggau bala menyadi Kristian kitai. Nya alai ari diatu, kitai patut bebendar ngenalamka agi pengerindu kitai ngagai bala menyadi Kristian kitai. Tu ulih nentuka kitai selamat!

BESEDIA ARI DIATU

17. Enti kitai besedia ari diatu, nama ulih digaga kitai lebuh Penusah ti Besai datai?

¹⁷ ‘Hari Jehovah’ nya siti timpuh ti amat tusah ke semua mensia. (Sep. 1:14, 15) Nembiak Jehovah mega deka napi penusah. Tang enti kitai besedia ari diatu, kitai ulih mengkang tenang sereta nulung orang bukai. Kitai deka tan napi sebarang penanggul ke engka ditapi kitai. Lebuh bala menyadi Kristian kitai merinsa, kitai deka bebendar ngayanka penyiru lalu nulung sida sereta nyediaka utai ti diguna sida. Lalu enti kitai belajar rinduka bala menyadi Kristian kitai diatu, kitai deka ngayanka pengerindu ngagai sida jemah ila. Udah nya, Jehovah deka merekatka kitai enggau pengidup ti meruan belama iya ba dunya alai penusah enggau penguji deka nadai agi.—Isa. 65:17.