Nuan Ulih Nyapai Juluk Ati Nuan ba Pengarap

1. Nama penanggul ke ditapi mayuh ari kitai?

KALA nuan netapka siti juluk ati ba pengarap tang tusah deka nyapai iya?b Enti pia, nuan enda kediri. Ambika chunto, Philip deka ngemansangka agi kualiti sereta penyuah iya besampi, tang iya tusah deka ngiga awak ngambika ulih besampi. Juluk ati Erika nya, nguji ngambika enda laun datai ngagai gempuru sebedau nginjil. Tang iya agi ga laun datai ngagai nyauka tiap iti gempuru. Tomáš beberapa kali nguji macha semua ayat dalam Bup Kudus. Ku iya: “Aku enda rindu macha Bup Kudus. Aku nguji tiga kali, tang tiap kali aku semina macha sampai Adat Lewi lalu udah nya aku ngetu.”

2. Nama kebuah kitai enda patut asa ati enti bisi juluk ati ba pengarap ke bedau agi dijapai kitai?

² Enti nuan bisi juluk ati ba pengarap ke bedau dijapai, anang asa ati. Indah juluk ati ti mit pan begunaka awak sereta usaha ti besai. Pengeran nuan ti agi deka nyapai juluk ati nya nunjukka kaul nuan enggau Jehovah amat penting ba nuan, lalu nuan deka meri Iya utai ti pemadu manah. Jehovah beterima kasihka usaha nuan. Endang amat, Iya enda minta ari nuan lebih agi ari ke ulih diberi nuan. (Mas. 103:14; Mik. 6:8) Nya alai, lebuh nuan netapka juluk ati, tentuka nuan ulih nyapai iya. Pengudah nuan netapka sesiti juluk ati, nama ulih dikereja nuan kena nyapai iya? Aram kitai berandauka sekeda chara.

KEMANSANGKA PENGERAN TI BESAI KENA NYAPAI JULUK ATI NUAN

3. Nama kebuah pengeran ti besai nya penting?

³ Pengeran ti besai kena nyapai juluk ati nya amat penting. Lebuh nuan bisi pengeran ti besai kena nyapai juluk ati nya, nuan deka bebendar ngereja utai kena nyapai iya. Pengeran kitai ke deka nyapai juluk ati kitai ulih disemaka baka angin ti muput kapal layar ngambika ulih datai ba destinasi iya. Enti angin terus muput, kelasi nya tentu deka datai ngagai destinasi iya. Lalu enti bisi angin ti balat, iya engka jampat agi datai. Baka nya mega, enti pengeran kitai besai agi, peluang kitai nyapai juluk ati kitai engka besai agi. David, siku menyadi ba El Salvador madahka: “Lebuh nuan bisi pengeran ti besai, nuan deka bebendar agi berusaha. Nuan enda nejuka sebarang utai nagang nuan ari nyapai juluk ati nya.” Nyadi, nama ulih nulung nuan ngembuan pengeran ti besai agi?

4. Nama ulih disampika kitai? (Pilipi 2:13) (Peda mega gambar.)

⁴ Besampi minta pengeran ti besai agi. Nengah kuasa kudus Jehovah, Iya ulih nulung nuan nyapai juluk ati nuan. (Bacha Pilipi 2:13.) Kekadang, kitai netapka juluk ati laban kitai nemu kitai patut netapka iya. Tu utai ti manah. Tang kitai engka nadai pengeran deka nyapai iya. Nya meh utai ke nyadi ngagai siku menyadi indu ba Uganda ke benama Norina. Iya netapka juluk ati deka ngembuan siku pemelajar Bup Kudus taja pan pengeran iya kena nyapai juluk ati nya enda entu besai. Tu ketegal iya ngasaika diri ukai siku pengajar ti landik. Nama utai ke udah nulung iya? Ku iya: “Aku besampi ngagai Jehovah ninting hari lalu minta Iya nulung aku ngemansangka pengeran aku ke deka ngajar pemelajar Bup Kudus. Ba maya ti sama, aku ngemansangka agi pengelandik aku ngajar. Pengudah beberapa bulan, aku beratika pengeran aku deka ngajar pemelajar Bup Kudus majak besai. Ba taun ti sama, aku ngepunka dua iti pelajar Bup Kudus.”

5. Nama ulih diperundingka kitai ngambika ulih nulung kitai ngeringka agi pengeran kitai ti deka nyapai juluk ati kitai?

⁵ Belematika utai ti udah dikereja Jehovah ke nuan. (Mas. 143:5) Rasul Paul belematika pemanah ati Jehovah ti besai ngagai iya, lalu tu meransang iya bebendar agi gawa ke Jehovah. (1 Kor. 15:9, 10; 1 Tim. 1:12-14) Baka nya mega, enti nuan seruran berundingka utai ti udah dikereja Jehovah ke nuan, nuan deka bisi pengeran ti besai agi kena nyapai juluk ati nuan. (Mas. 116:12) Peratika utai ti udah nulung siku menyadi indu ba Honduras nyapai juluk ati iya nyadi siku pengerintis biasa. Ku iya: “Aku belematika pemesai pengerindu Jehovah ke aku. Iya mai aku ngagai bala nembiak Iya. Iya ibuh sereta nyaga aku. Lebuh aku berunding pasal utai nya, pengerindu aku ke Jehovah majak dalam agi lalu aku deka berusaha agi ngambika ulih berengkah ngerintis.”

6. Nama utai bukai ke ulih nulung kitai ngemansangka agi pengeran kitai?

⁶ Betumpu ba penguntung ke diulih lebuh nuan nyapai juluk ati nuan. Peratika utai ti nulung Erika ke dipadah tadi, ngambika ulih nyapai juluk ati iya ke enggai laun datai ngagai gempuru sebedau nginjil. Ku iya: “Aku sedar, ketegal aku laun datai ngagai gempuru sebedau nginjil, aku tetinggal mayuh pekara. Tang enti aku datai tumu agi, aku ulih berandau enggau bala menyadi Kristian sereta begulai enggau sida. Aku mega ulih ningaka cadangan ti manah ke ulih nulung aku gaga ati agi sereta ngemansangka agi pengawa nginjil aku.” Erika betumpu ba penguntung ke diulih iya ketegal enda laun datai ngagai gempuru sebedau nginjil, lalu iya nyapai juluk ati iya. Nama penguntung ke ulih diperatika nuan? Enti juluk ati nuan bekaul enggau macha Bup Kudus tauka besampi, perundingka chara juluk ati nya deka negapka agi kaul nuan enggau Jehovah. (Mas. 145:18, 19) Enti juluk ati nuan nya ngemansangka siti sifat Kristian, peratika chara juluk ati nya deka nulung nuan ngemansangka agi kaul nuan enggau orang bukai. (Kol. 3:14) Nuan ulih ngaga siti lis pasal semua kebuah nuan deka nyapai juluk ati nya. Seruran beratika lis nya. Tomáš ke dipadah tadi, madahka: “Lebuh aku bisi mayuh agi kebuah nyapai juluk ati nya, aku deka bebendar agi nyapai iya.”

7. Nama nulung Julio enggau bini iya nyapai juluk ati seduai iya?

⁷ Begulai enggau orang ke deka meransang nuan nyapai juluk ati nya. (J-lam. 13:20) Peratika utai ti nulung Julio enggau bini iya nyapai juluk ati seduai iya ke deka ngemansangka agi pengawa nginjil seduai iya. Julio madahka: “Kami milih bala kaban ke meransang kami nyapai juluk ati nya, lalu kami deka berandauka juluk ati kami enggau sida. Mayuh ari sida udah nyapai juluk ati ti sama enggau kami, nyadi sida ulih meri kami cadangan ti manah. Bala kaban kami deka nanya pasal situasi pelan kami bekaul enggau juluk ati nya, lalu sida deka meransang kami lebuh kami begunaka nya.”

LEBUH KITAI KURANG AGI PENGERAN DEKA NYAPAI JULUK ATI NYA

8. Nama ulih nyadi enti kitai nguji nyapai sesiti juluk ati semina lebuh kitai bisi pengeran deka ngereja nya? (Peda mega gambar.)

⁸ Tang, bisi maya iya, kitai nadai pengeran deka ngereja sesiti utai. Kati tu reti iya kitai enda ulih nyapai juluk ati nya? Enda. Gambarka tu: Angin ulih nyadi kuasa ti besai kena nulak kapal layar nuju ngagai destinasi iya. Tang, pemalat angin bepuput enda sebaka, lalu bisi maya iya, nadai angin. Kati tu reti iya kelasi nya enda ulih nginsitka kapal nya? Enda semesti iya. Ambika chunto, sekeda kapal layar bisi injin, lalu ke bukai bisi dayung. Kelasi nya ulih ngena injin tauka dayung ngambika kapal layar nya terus nuju ngagai destinasi iya. Pengeran kitai ulih disemaka baka angin. Bisi maya iya, pengeran kitai engka besai agi ari maya bukai. Lalu bisi maya iya, kitai engka nadai pengeran deka nyapai juluk ati nya. Nyadi, enti kitai semina nguji nyapai juluk ati nya lebuh kitai bisi pengeran, kitai engka enda ulih nyapai juluk ati nya. Tang baka kelasi ke ngiga chara bukai ngambika ulih datai ngagai destinasi iya, kitai agi ulih nguji nyapai juluk ati nya indah lebuh kitai kekadang nadai pengeran deka ngereja nya. Endang amat, tu enda senang. Tang nuan deka gaga ati lebuh nuan ulih nyapai juluk ati nya. Sebedau berandauka utai ti ulih dikereja kitai, aram berandauka tanya ke engka bisi.

9. Kati nya salah enti kitai majakka diri nyapai sesiti juluk ati taja pan kitai nadai pengeran deka ngereja nya? Terangka.

⁹ Jehovah dekaka kitai nyembah Iya enggau ati ti gaga sereta deka. (Mas. 100:2; 2 Kor. 9:7) Nyadi, kati kitai patut terus berusaha nyapai sesiti juluk ati taja pan kitai nadai pengeran deka ngereja nya? Peratika teladan rasul Paul. Iya madahka: “Aku disiplin enggau terit tubuh aku lalu ngaga tubuh aku nyadi ulun.” (1 Kor. 9:25-27, nota kaki ke ayat 27) Indah lebuh Paul nadai pengeran deka ngereja utai ti diasuh Jehovah kereja iya, tang iya majakka diri ngereja nya. Kati Jehovah gaga ati enggau utai ti dikereja Paul ke Iya? Jehovah tentu gaga ati! Lalu Jehovah merekatka usaha Paul.—2 Tim. 4:7, 8.

10. Nama penguntung iya enti kitai bebendar nguji nyapai sesiti juluk ati taja pan kitai nadai pengeran deka ngereja nya?

¹⁰ Baka nya mega, Jehovah gaga ati lebuh Iya meda kitai bebendar nguji nyapai juluk ati kitai, taja pan kitai nadai pengeran deka ngereja nya. Iya gaga ati laban Iya nemu, taja pan enti kitai enda seruran rinduka utai ti dikereja kitai, tang kitai agi ngereja nya laban kitai rinduka Iya. Baka Jehovah ke merekatka Paul, Iya mega deka merekatka usaha kitai. (Mas. 126:5) Lalu seraya kitai ngasaika berekat ari Jehovah, kitai engka deka berengkah ngembuan pengeran deka ngereja juluk ati nya. Siku menyadi indu ari Poland ke benama Lucyna madahka: “Kekadang, aku enggai nurun nginjil, kelebih agi lebuh aku lelak. Taja pia, pengaga ati ke diasaika aku pengudah pansut nginjil nya baka siti pemeri ti amat manah.” Nyadi, aram meh kitai meda utai ti ulih dikereja kitai lebuh kitai nadai pengeran deka nyapai juluk ati nya.

11. Baka ni Jehovah ulih nulung kitai ngemansangka sifat nemu nagang diri?

¹¹ Besampi minta Jehovah nulung nuan ngemansangka sifat nemu nagang diri. Nemu nagang diri nya reti iya kitai ulih ngawal asai ati sereta ulah kitai. Rambai jaku nya suah ngasuh kitai berunding pasal nagang diri ari ngereja utai ti jai. Taja pia, kitai mega begunaka sifat nemu nagang diri ngambika ulih ngereja utai ti manah, kelebih agi enti utai ke patut digaga kitai nya tusah tauka enti kitai nadai pengeran deka ngereja sesiti utai. Anang enda ingat, sifat nemu nagang diri nya sebagi ari buah kuasa kudus Petara. Nya alai, pinta meh ari Jehovah kuasa kudus kena nulung nuan ngemansangka sifat ti penting nya. (Luk. 11:13; Gal. 5:22, 23) David, ke dipadahka tadi, nerangka chara sampi udah nulung iya. Iya deka suah agi ngereja pengawa belajarka Bup Kudus kediri empu. Iya madahka: “Aku besampi minta Jehovah nulung aku ngemansangka sifat nemu nagang diri. Enggau tulung ari Iya, aku ulih ngepunka siti program belajar ti manah lalu nitihka program nya.”

12. Baka ni Pengajar 11:4 nulung kitai nyapai juluk ati kitai?

¹² Anang nganti situasi ti sempurna. Ba dunya tu, kitai engka nadai kala deka tetemuka situasi ti sempurna. Enti kitai nganti situasi ke baka nya, kitai engka enda kala deka nyapai juluk ati kitai. (Bacha Pengajar 11:4.) Siku menyadi lelaki ke benama Dayniel madahka: “Nadai situasi ti sempurna. Nyadi kitai enda patut nganti. Kitai patut teruska aja.” Siku menyadi lelaki ba Uganda ke benama Paul, madahka siti agi kebuah kitai enda patut udu betangguh: “Lebuh kitai berengkah ngereja sesiti utai taja pan utai nya tusah, Jehovah ulih nulung kitai.”—Mal. 3:10.

13. Nama kebuah nya manah berengkah enggau juluk ati ti mit?

¹³ Berengkah enggau juluk ati ti mit. Kitai engka kurang pengeran deka nyapai juluk ati nya laban juluk ati kitai engka kelalu tusah deka dijapai. Enti tu situasi nuan, kati nuan ulih magi juluk ati nya ngagai juluk ati ti mit agi? Enti juluk ati nuan nya ngemansangka sesiti sifat, kati ulih nuan nguji ngayanka sifat tu nengah chara ti mit dulu? Enti juluk ati nuan nya deka macha semua ayat Bup Kudus, kati ulih nuan berengkah enggau ngaga jadual macha ti pandak agi? Tomáš, ke dipadah ba pun artikel tadi, bisi penanggul nyapai juluk ati iya ke deka macha semua ayat Bup Kudus dalam timpuh setaun. Iya madahka: “Aku nyau nemu timpuh ke ditetapka aku kelalu pandak. Nya alai, aku nguji baru, tang kali tu, aku ngaga pelan deka macha sebagi ari siti bagi ninting hari, lalu belematika nya. Asil iya, aku berengkah rindu macha Bup Kudus.” Ketegal Tomáš berengkah rindu macha Bup Kudus, iya deka ngena mayuh agi awak macha Bup Kudus. Pengujung iya, Tomáš ulih macha semua ayat dalam Bup Kudus.c

ANANG BERASAI ASA ATI ENTI BISI UTAI NGASUH NUAN TUSAH DEKA NYAPAI JULUK ATI NYA

14. Nama utai ke engka ulih nyadi ti ngasuh kitai tusah nyapai juluk ati kitai?

¹⁴ Sayau amat, enda ngira sekalika kitai bisi pengeran tauka amat bedisiplin, kekadang bisi utai ulih nyadi ke engka ngasuh kitai tusah nyapai juluk ati kitai. Ambika chunto, utai ke enda dijangka engka nyadi, lalu nya ulih ngambi awak sereta perhatian kitai. Ketegal nya, kitai engka bisi mimit aja awak kena ngereja juluk ati kitai. (P-jar. 9:11) Kitai engka napi siti penanggul ke ngasuh kitai berasai asa ati sereta nadai daya. (J-lam. 24:10) Ketegal kitai enda sempurna, kitai engka ngaga penyalah ke ngasuh kitai tusah agi deka nyapai juluk ati nya. (Rom. 7:23) Tauka kitai engka semina berasai lelak. (Mat. 26:43) Nama ulih nulung kitai mutarka situasi ke ngasuh kitai tusah deka nyapai juluk ati kitai?

15. Nama kebuah nuan enda patut putus asa enti bisi utai nyadi ke ngasuh juluk ati nuan tusah agi dijapai? (Masmur 145:14)

¹⁵ Kingatka meh, enti bisi utai nyadi ke nagang nuan ari nyapai juluk ati nya, tu ukai reti iya nuan patut ngetu nguji nyapai juluk ati nya. Bup Kudus madahka, kitai engka suah napi penanggul tauka penusah. Taja pia, iya mega madah, kitai ulih nguji nyapai juluk ati kitai baru, kelebih agi enggau tulung ari Jehovah. (Bacha Masmur 145:14.) Philip, menyadi lelaki ke dipadah tadi, madahka: “Aku enda betumpu ba berapa kali aku enda ulih nyapai juluk ati aku. Tang, aku betumpu ngagai berapa kali aku berengkah nguji nyapai juluk ati nya baru.” David, ke dipadah tadi mega, madahka: “Kekadang utai ke engka nyadi ngasuh aku tusah deka nyapai juluk ati aku. Ba aku, utai nya ukai penanggul, tang peluang kena aku ngayanka penalam pengerindu aku ngagai Jehovah.” Amat, lebuh nuan bebendar nguji nyapai juluk ati nuan taja pan tusah, nuan nunjuk ngagai Jehovah nuan deka ngelantangka ati Iya. Jehovah tentu amat gaga ati lebuh Iya meda nuan bebendar nguji deka nyapai juluk ati nuan!

16. Nama ulih dipelajarka nuan enti bisi utai ke nagang nuan ari nyapai juluk ati nuan?

¹⁶ Uji belajar ari utai ke nagang nuan ari nyapai juluk ati nya. Perundingka pasal utai ti nyadi, lalu tanya diri empu, ‘Nama ulih digaga aku ngambika utai tu enda nyadi baru?’ (J-lam. 27:12) Tang kekadang, enti juluk ati nya kelalu tusah deka dijapai nuan, tu engka nunjukka juluk ati nya endang enda ulih dijapai nuan. Enti tu situasi nuan, perundingka baru pasal juluk ati nya kena meda sekalika juluk ati nya agi ulih dijapai nuan.d Jehovah enda ngumbai nuan enda mujur enti nuan enda ulih nyapai juluk ati ke endang enda ulih dijapai nuan.—2 Kor. 8:12.

17. Nama kebuah kitai patut ingatka utai ti udah dijapai kitai?

¹⁷ Ingatka utai ti udah dijapai nuan. Bup Kudus madahka, “Petara ukai Petara ti enda lurus, nyentukka Iya enda ingatka pengawa ke udah dikereja kita.” (Heb. 6:10) Nya alai, nuan mega patut seruran ingatka utai ti udah dikereja nuan. Perundingka juluk ati ke udah dijapai nuan. Juluk ati nya engka ngemansangka kaul nuan enggau Jehovah, bejaku enggau orang bukai pasal Iya, tauka dibaptisa. Seraya nuan ngaga pemansang sereta nyapai juluk ati nuan ke suba, nuan ulih terus ngaga pemansang ngagai juluk ati nuan ke diatu.—Plp. 3:16.

18. Nama patut diingatka kitai seraya kitai bebendar nguji nyapai juluk ati kitai? (Peda mega gambar.)

¹⁸ Enggau tulung ari Jehovah, nuan ulih nyapai juluk ati nuan, sama baka siku kelasi ke gaga ati datai ba destinasi iya. Tang anang enda ingat, mayuh kelasi mega gaga ati enggau pejalai sida. Pia mega, uji meh seruran beratika chara Jehovah benung nulung nuan. Nya deka nulung nuan gaga ati seraya nuan bebendar nguji nyapai juluk ati nya. (2 Kor. 4:7) Enti nuan enda putus asa, nuan deka nerima berekat ti besai agi.—Gal. 6:9.