PELAJAR 30
Orang ti Dikesayauka Nuan Ulih Idup Baru!
Pemati mai mayuh pemedis enggau pemerinsa. Nya alai, Bup Kudus ngumbai pemati nya munsuh. (1 Korint 15:26) Tang baka ke udah dipelajarka kitai ba Pelajar 27, Jehovah besemaya pasal Iya ke deka ngerusak pemati belama iya. Tang baka ni enggau sida ke udah mati? Kati sida ulih angkat idup baru? Ba pelajar tu, kitai deka meda semaya Petara ke deka ngangkatka bejuta iku orang sereta meri sida peluang idup belama iya! Kati tu amat deka nyadi? Kati sida deka diangkatka idup baru ba serega tauka ba dunya?
1. Nama deka digaga Jehovah ngagai orang ti dikesayauka kitai ke udah mati?
Jehovah keran deka ngangkatka baru orang ti dikesayauka kitai ke udah mati. Jop seiku lelaki ke tetap ati lalu iya pechaya, taja pan iya mati, Jehovah tentu deka ingatka iya. Iya madah ngagai Petara: “Nuan deka ngangau, lalu aku deka nyaut [ari Pendam].”—Bacha Jop 14:13-15.
2. Baka ni kitai nemu orang ke udah mati ulih diangkat idup baru?
Lebuh Jesus ba dunya, Petara Jehovah meri iya kuasa kena ngangkatka orang idup baru. Jesus kala ngangkatka idup baru seiku indu ke beumur 12 taun enggau anak lelaki seiku indu balu. (Mark 5:41, 42; Luke 7:12-15) Jesus mega udah ngangkatka idup baru bakih iya, Lasarus, taja pan Lasarus udah mati pengelama empat hari. Baka ni iya ngereja nya? Jesus besampi ngagai Jehovah, lalu nyebut: “Lasarus, pansut nuan!” Lalu, Bup Kudus madahka, “Orang ke mati nya lalu pansut.” (John 11:43, 44) Gambarka pengaga ati ruang bilik enggau bala bakih Lasarus lebuh meda iya udah angkat idup baru!
3. Nama deka nyadi ngagai orang ti dikesayauka kitai ke udah mati?
Bup Kudus madahka: “Semua orang deka diangkatka ari mati.” (Surat Kereja Rasul 24:15) Ba genteran sebedau tu, kitai udah belajar, sida ke udah diangkatka Jesus idup baru enda niki ngagai serega. (John 3:13) Tang sida diangkatka idup baru ba dunya lalu ulih betemu baru enggau bala bakih sereta ruang bilik sida. Jemah ila, Jesus deka ngangkatka bejuta iku orang idup baru belama iya ba dunya paradais. Bup Kudus madahka, “semua orang ke udah mati” nyengkaum sida ke dikingatka Petara, deka angkat idup baru.—John 5:28, 29.
BELAJAR MAYUH AGI
Pansik bukti ari Bup Kudus ke madahka, orang ke udah mati deka diangkatka idup baru. Peratika mega baka ni pengangkat ari mati ulih meri pengelantang ba ati sereta meri kitai utai ti manah ke dianti jemah ila.
4. Jesus ulih ngangkatka orang idup baru
Peratika cherita pengangkat Lasarus enggau silik agi. Bacha John 11:14, 38-44, lalu kerandauka tanya tu:
Baka ni kitai nemu Lasarus amat udah mati?—Peda ayat 39.
Enti Lasarus udah niki ke serega, kati patut Jesus mejal iya idup baru ba dunya?
5. Bejuta iku orang deka idup baru!
Bacha Masmur 37:29, lalu kerandauka tanya tu:
Dini alai orang ke udah diangkatka idup baru deka diau?
Kelimpah ari orang ke nyembah Jehovah, mayuh agi orang bisi peluang diangkatka idup baru. Bacha Surat Kereja Rasul 24:15, lalu kerandauka tanya tu:
Sapa deka diantika nuan angkat idup baru?
Perundingka tu: Jesus ulih ngangkatka orang idup baru baka seiku apai ke ngerakka anak iya ti benung tinduk
6. Pengangkat ari mati meri pengelantang ba ati sereta ngasuh kitai andalka semaya ti manah ke deka nyadi jemah ila
Cherita pengangkat anak Jairus ari mati udah ngelantangka ati mayuh orang. Bacha pasal cherita ti amat tu ba Luke 8:40-42, 49-56.
Sebedau ngangkat idup baru anak indu nya, Jesus madah ngagai Jairus: “Anang takut. Arap aja.” (Peda ayat 50.) Baka ni semaya pasal pengangkat ari mati ulih nulung nuan . . .
lebuh orang ti dikesayauka nuan udah mati?
bisi utai nyadi ke ulih nabanka nyawa nuan?
Mainka VIDEO, lalu kerandauka tanya tu.
Baka ni semaya pasal pengangkat ari mati meri pengelantang sereta meransang apai indai Phelicity?
BISI ORANG MADAH: “Tusah deka pechaya orang ke udah mati ulih idup baru ba dunya tu.”
Nama runding nuan?
Nama ayat Bup Kudus ke deka dikunsi nuan kena nunjukka utai tu endang deka nyadi?
LANSA
Bup Kudus besemaya, bejuta iku orang deka diangkatka idup baru. Jehovah deka sida idup baru, lalu Iya udah meri Jesus kuasa kena ngangkatka orang idup baru.
Ulang Kaji
Nama runding Jehovah enggau Jesus pasal pengawa ngangkatka orang idup baru?
Bejuta iku orang ke diangkatka idup baru deka idup ba serega tauka ba dunya? Nama kebuah nuan nyaut baka nya?
Nama utai ke ngasuh nuan andal orang ke dikesayau nuan deka diangkatka idup baru?
ARAM BELAJAR
Peratika utai ti ulih digaga nuan kena napi penusah sereta asai ati ti pedis.
“Tulung ngagai Orang ke Ditinggang Penusah” (Peratika!, No. 3 2018)
Ulih Bup Kudus nulung orang ke benung tusah ati ketegal pemati?
Baka ni kitai ulih nulung bala anak ke lenyau orang ti dikesayau ketegal pemati?
Kati bisi orang ke deka diangkatka idup baru ngagai serega? Sapa ke enda diangkatka idup baru?
“Nama Reti Pengangkat Ari Mati?” (Artikel ba laman web jw.org)