PELAJAR 3

“Penuh enggau Kuasa Kudus”

Nama nyadi pengudah kuasa kudus diberi ngagai bala murid Jesus ba hari Pentikos?

Bepelasarka Surat Kereja Rasul 2:1-47

1. Terangka utai ke nyadi ba hari Pengerami Pentikos.

ORANG ba Jerusalem gagit amat ati!a Ba hari nya, bisi asap niki ari alta ba Rumah Sembiang. Ba maya ti sama, orang Lewi belagu muji Jehovah. Lagu nya bisi ditulis ba Masmur 113 ngagai 118. Maya nya, mayuh orang datai ngelawa Jerusalem. Sida datai ari mayuh bengkah endur baka Elam, Mesopotamia, Kapadosia, Pontus, Ejip enggau Rome.b Sida datai laban deka ngintu Hari Pengerami Pentikos. Hari nya mega dikumbai hari keterubah ngetau gandum. (P-pau. 28:26) Pengerami tu diintu ninting taun kena nunjukka timpuh ngetau barli nyauka abis, lalu timpuh ngetau gandum deka berengkah. Nya endang hari ti ngagaka ati.

Siti peta ti nunjukka penatai bala orang ke ninga Berita Manah ba Pentikos 33 M. 1. Kawasan: Libya, Ejip, Etiopia, Bitinia, Pontus, Kapadosia, Judea, Mesopotamia, Babilon, Elam, Media, and Partia. 2. Nengeri: Rome, Aleksandria, Mempis, Antiok (ba Siria), Jerusalem, and Babilon. 3. Tasik: Tasik Mediterranean, Tasik Chelum, Tasik Mirah, Tasik Kaspia, sereta Teluk Persia.

JERUSALEM—PUSAT PENGARAP JUDAH

Mayuh ari utai ke nyadi ba Surat Kereja Rasul bagi 1 nyadi ba Jerusalem. Nengeri Jerusalem bisi ba atas bukit ba Judea, kira-kira 55 kilometer ari timur Tasik Mediterranean. Ba endur tu mega, kena taun 1070 S.M., Raja David ngerampas kubu ke bisi ba atas Bukit Sion. Nyau kelama, nengeri ke bisi ba bukit nya nyadi besai, lalu nyadi indu nengeri menua Israel ba jeman kelia.

Enda jauh ari Bukit Sion, bisi Bukit Moriah. Nitihka utai ke dipechaya orang Judah kelia menya, nya meh endur alai Abraham deka nyerahka Isak nyadika korban ngagai Jehovah. Utai tu nyadi kira-kira 1,900 taun sebedau utai ke ditulis ba Surat Kereja Rasul nyadi. Bukit Moriah nyadi sebagi ari nengeri Jerusalem lebuh Solomon nirika rumah sembiang Jehovah ba atas bukit nya. Rumah sembiang Jehovah ke didirika Solomon tu lalu nyadi pusat endur alai orang Judah bejalaika pengawa besehari-hari sereta ngereja pengawa sembah sida.

Semua orang Judah ke tetap ati, seruran datai ngagai rumah sembiang Jehovah kena meri pemeri ngagai Iya, nyembah Iya sereta ngintu pengerami ke diatur ninting taun. Sida ngereja tu taja pan sida patut bejalai jauh ari endur sida empu. Sida mega ngereja tu laban deka ngasika pesan Petara ke madahka: ‘Semua lelaki dalam bansa kita enda tau enda datai nyembah Jehovah tiga kali setaun ba siti endur ti deka dipilih Jehovah.’ (U-dat. 16:16) Ketegal Jerusalem nya indu nengeri, nya alai iya bisi balai Raban Kunsil Orang Judah, Mahkamah Tinggi Orang Judah sereta Pusat Pentadbiran Tinggi orang Judah.

2. Nama utai ke nyadi ti ngalitka ati ba Pentikos 33 M.?

² Ba siti hari dalam urung pukul semilan pagi, lebuh taun 33 M., maya musin bungai, bisi utai ti ngalitka ati nyadi. Enda mukai-mukai, bisi “bunyi ribut ti deras” datai ari langit, tauka “baka munyi ribut puting beliong.” (SKR. 2:2; Bup Kudus Berita Manah Ka Rebak Diatu) Bunyi nya ulih didinga ba semua endur alai 120 iku bala murid Jesus begelumu. Udah nya bisi utai ti nyelai nyadi. Bisi utai baka api ti mit ayan lalu inggap ba atas pala tiap iku bala murid.c Udah nya, sida “penuh enggau kuasa kudus” lalu belabuh bejaku ngena bemacham bansa jaku! Lebuh bala murid pansut ari rumah nya, orang mayuh ke ngelawa Jerusalem iran amat ati. Nya alai, sida ke bansa bukai tu ninga tiap iku murid Jesus bejaku “dalam bansa jaku sida empu.”—SKR. 2:1-6.

3. (a) Nama kebuah Pentikos 33 M. tau dikumbai siti pemansang ti amat penting dalam sejarah sembah ti bendar? (b) Baka ni utai ke dipadah Peter bisi kaul enggau chara “kunchi Perintah” dikena?

³ Cherita tu madahka pemansang ti penting dalam sejarah sembah ti bendar, iya nya bansa Israel rohani diadaka. Reti nya, sida nyadi orang Kristian ke dipilih ngagai serega. (Gal. 6:16) Tang bisi mayuh agi penerang bekaul enggau pekara tu. Lebuh Peter bejaku ngagai sida ke dipilih ke serega maya nya, iya benung ngena siti ari tiga iti “kunchi Perintah.” Tiap iti kunchi nya deka muka peluang ngagai tiga iti raban orang ti bebida kena nerima berekat ti istimewa. (Mat. 16:18, 19) Kunci ti keterubah nya muka jalai ngambika orang Judah sereta orang ke megai pengarap Judah nerima Berita Manah, lalu dipilih ngena kuasa kudus Petara.d Sida tu deka nyadi sebagi ari bansa Israel rohani, lalu bisi harapan merintah nyadi raja sereta imam ba Perintah Petara. (Pem. 5:9, 10) Nyau kelama, peluang tu deka dibuka ngagai orang Samaria lalu ngagai orang bansa bukai. Nama ulih dipelajarka orang Kristian kemayaharitu ari peristiwa ke nyadi ba Pentikos 33 M.?

“Begelumu ba Endur ti Sama” (Surat Kereja Rasul 2:1-4)

4. Baka ni raban gempuru Kristian kemayaharitu besambung ari raban gempuru ke ditumbuhka ba taun 33 M.?

⁴ Raban gempuru Kristian berengkah lebuh 120 iku murid Jesus “begelumu ba endur ti sama,” iya nya ba bilik atas. Sida tu meh ke dipilih ke serega nengah kuasa kudus. (SKR. 2:1) Ba hari nya, penyampau orang ke dibaptisa majak mayuh lalu beribu-ribu iku orang nyadi orang Kristian. Peristiwa tu nyadi pun pemansang siti gerempung ke majak besai nyentukka diatu. Nya alai kemayaharitu, seraban besai orang ke nangika Petara, iya nya raban gempuru Kristian nginjil “Berita Manah pasal Perintah Petara.” Lalu pesan nya deka “ditusui ba serata dunya, nyadika saksi ngagai semua bansa” sebedau pengujung dunya datai.—Mat. 24:14.

5. Nama berekat ke diulih bala menyadi Kristian ba abad keterubah sereta kitai kemayaharitu lebuh seruran begulai enggau raban gempuru Kristian?

⁵ Ba abad ti keterubah, sida ke dipilih ke serega ngulihka pengering lebuh begulai enggau raban gempuru Kristian. Kemayaharitu, raban “bedus ti bukai” mega deka dikeringka lebuh ngereja utai ti sama. (Jhn. 10:16) Lebuh Paul nulis surat ngagai orang Kristian di Rome, iya madahka diri amat beterima kasih laban semua ba raban gempuru nya nyukung pangan diri. Ku iya nulis: “Aku keran amat deka betemu enggau kita, ngambika aku ulih meri kita berekat ari Petara kena negapka pengarap kita. Reti ku aku nya, ngambika semua kitai bela diperansang ari pengarap ke diayanka pangan diri.”—Rom. 1:11, 12.

ROME—INDU NENGERI PERINTAH TI BEKUASA

Sepemanjai timpuh ke dipadah dalam bup Surat Kereja Rasul, Rome siti menua ti pemadu besai sereta bisi kuasa politik ti pemadu penting ba dunya maya nya. Menua Rome mujur nyapai tahap ti pemadu tinggi. Nya alai, Rome nyadi indu nengeri siti perintah ti bekuasa. Ketegal nya, iya mujur nguasa wilayah ari Britain nyentuk ngagai Afrika Utara, lalu ari Tasik Atlantik nyentuk ngagai Teluk Persia.

Mayuh orang ari bemacham budaya, bansa, jaku sereta kepercayaan suah datai ngagai Rome. Ketegal bisi jalai ti dijaga enggau manah, mayuh orang ari serata wilayah ke dipegai perintah Rome sereta orang ke bedagang suah datai kia. Ba penyangkai kapal Ostia, bisi mayuh kapal mai bemacham pemakai enggau barang ti mar ngagai Rome.

Ba abad keterubah, bisi lebih ari satu juta orang diau ba Rome. Engka setengah ari penyampau orang ke diau ba Rome nyadi ulun. Sida ke nyadi ulun nya engka bala penjenayah ke dikutuk, bala anak ke dijual tauka ditinggalka apai indai sereta orang jil ke ditaban orang Rome maya perang. Pia mega, ba taun 63 S.M., General Pompey ari Rome ngalahka menua Jerusalem. Maya nya, mayuh orang Judah ari Jerusalem ditangkap ngagai Rome nyadi ulun.

Mayuh orang ke diau ba Rome amat miskin. Sida diau ba kawasan rumah ti amat sempit enggau pangan diri, lalu sida idup bepanggai ba tulung ari perintah. Taja pia, Raja Besai Rome ngemanahka menua nya enggau chara nirika mayuh bengunan ti amat manah dipeda. Entara bengunan ke digaga nya, bisi dewan teater sereta mayuh stadium ti besai. Ba semua endur tu, suah bisi mandangka gladiator belaban, drama pentas sereta lumba kerita kuda. Semua tu pechuma kena merindang bala rayat.

6, 7. Baka ni raban gempuru Kristian kemayaharitu nitihka pesan Jesus kena nginjil ngagai semua bansa?

⁶ Kemayaharitu, raban gempuru Kristian bisi tuju ti sama baka orang Kristian ba abad ti keterubah. Jesus meri bala murid iya pengawa ti ngagitka ati, tang pengawa tu enda senang. Ku Jesus madah ngagai sida: “Ajar sida nyadi murid aku. Baptisa sida dalam nama Apai, Anak, enggau kuasa kudus Petara. Ajar sida ngasika semua utai ke udah dipadah aku ngagai kita.”—Mat. 28:19, 20.

⁷ Kemayaharitu, Jehovah ngena raban gempuru Kristian Saksi-Saksi Jehovah kena ngereja pengawa nya. Tang enda senang deka nyapai mayuh orang ke ngena bemacham bansa jaku. Taja pia, Saksi-Saksi Jehovah udah mujur ngasilka litaricha ti bepelasarka Bup Kudus ba lebih ari 1,000 iti bansa jaku. Enti nuan seruran datai begempuru, ransing ba pengawa nginjil sereta ngajar orang pasal Perintah Petara, nuan bisi kebuah deka gaga ati. Kemayaharitu, enda mayuh orang ba dunya bisi peluang meri saksi enggau silik sereta ngarika nama Jehovah. Tang nuan meh siku ari sida nya. Endaka tu siti peluang ti istimewa ba nuan?

8. Nama bantu ke diulih kitai nengah gempuru Kristian?

⁸ Petara Jehovah udah meri bala menyadi Kristian ari serata dunya nyadika pemeri ke kitai. Enggau tu, nuan ulih tan ngenatka sebarang penanggul enggau gaga ati ba maya ti tusah tu. Peratika utai ke ditulis Paul ngagai orang Kristian ke bebansa Hebrew: “Aram meh kitai beratika pangan diri kena meransang pangan diri ngayanka pengerindu sereta ngereja utai ti manah. Anang meh ngelengkaka pengawa begempuru kitai baka ke biasa digaga sekeda orang. Tang, peransang pangan diri lalu majak agi ngereja nya, kelebih agi lebuh kita meda hari nya nyau semak.” (Heb. 10:24, 25) Raban gempuru Kristian nya siti berekat ari Jehovah. Nuan ulih meransang menyadi Kristian ke bukai, lalu sida mega ulih meransang nuan. Nya alai mengkang semak meh enggau bala menyadi Kristian nuan, lalu anang sekali-kali ngelengkaka pengawa begempuru!

‘Sida Ninga Dalam Bansa Jaku Sida Empu’ (Surat Kereja Rasul 2:5-13)

Bala murid Jesus nginjil ngagai orang Judah enggau orang ke megai pengarap Judah ba rantau jalai. — “Kitai ninga sida bejaku dalam bansa jaku kitai pasal utai ti ngalitka ati ke digaga Petara.”—Surat Kereja Rasul 2:11

9, 10. Baka ni sekeda menyadi ngereja mayuh agi ba pengawa nginjil kena nyapai orang ke ngena bansa jaku ke bukai?

⁹ Perundingka meh pengagit ati ke diasaika orang Judah enggau sida ke megai pengarap Judah ba Pentikos 33 M. Mayuh ari sida bejaku ngena siti bansa jaku ti sama, iya nya engka jaku Gerika tauka Hebrew. Tang diatu ‘sida ninga bala murid Jesus bejaku dalam bansa jaku sida empu.’ (SKR. 2:6) Endang amat, kemayaharitu nadai kereja ajih nulung orang Kristian nemu bejaku bansa jaku ke bukai. Tang mayuh bala menyadi udah mutuska deka ngereja mayuh agi ba pengawa nginjil kena nyapai orang ari bemacham bansa. Baka ni sida ngereja nya? Sekeda ari sida udah belajarka bansa jaku ti baru ngambika sida ulih nginjil enggau raban gempuru ke ngena bansa jaku ke bukai. Tauka indah sida deka pindah ngagai menua ke bukai. Kesuah iya, orang ke ninga nya suah alit ati enggau usaha menyadi kitai ke belajar bansa jaku ke bukai.

¹⁰ Peratika chunto menyadi Christine. Iya ngambi kursus belajarka bansa jaku Gujarati sama enggau tujuh iku bala Saksi ke bukai. Ba endur iya gawa, bisi siku indu ke ngena jaku Gujarati. Christine lalu bejaku enggau indu nya ngena jaku Gujarati. Indu nya alit ati laban Christine bebendar belajarka bansa jaku ti tusah, iya nya Gujarati. Enggau tu, Christine mujur meri saksi ngagai indu nya. Tu meh utai ke dipadah indu nya ngagai Christine: “Nuan tentu bisi pesan ti amat penting.”

11. Baka ni kitai ulih besedia ngambika ulih nginjil pasal Perintah Petara ngagai orang bansa bukai?

¹¹ Endang amat, ukai semua kitai ulih belajarka bansa jaku ti baru. Tang, semua kitai ulih besedia nginjil pasal Berita Manah ngagai orang ke ngena bansa jaku ti bukai. Baka ni chara iya? Kena meh aplikasi JW Language^®. Ari aplikasi tu, nuan ulih belajar chara meri jaku tabi dalam bansa jaku ke suah dikena ba endur nuan. Nuan mega ulih belajar chara nyebut sekeda ayat dalam bansa jaku nya ngambika ulih narit minat orang ari bansa nya. Tunjuk ngagai sida laman web jw.org, lalu nuan engka ulih nunjukka video sereta litaricha ke bisi dalam bansa jaku sida. Enti kitai ngena perengka tu dalam pengawa nginjil, kitai mega deka ngasaika pengaga ati baka bala menyadi ba abad keterubah. Maya nya, “bala murid Jesus bejaku dalam bansa jaku [orang bansa bukai].” Ketegal nya, orang ari bansa bukai alit ati ninga Berita Manah.

ORANG JUDAH BA MESOPOTAMIA SERETA EJIP

Bup The History of the Jewish People in the Age of Jesus Christ (175 B.C.–A.D. 135) madahka: “Bisi peturun ari sepuluh raban bansa [Israel] enggau perintah Judah diau ba Mesopotamia, Media sereta Babilon. Perintah Asiria enggau Babilon meh ke nganjung sida kia.” Nitihka Esra 2:64, semina 42,360 iku orang Israel dilepaska ari Babilon lalu pulai baru ngagai Jerusalem. Utai tu nyadi ba taun 537 S.M. Flavius Josephus madah, ba abad keterubah bisi bepuluh ribu iku orang Judah “diau sekitar Babilon.” Maya abad ketiga nyentuk ngagai abad kelima M., sida orang Judah tu ngasilka bup Talmud Babilon.

Mayuh bukti dokumentari nunjukka, bisi orang Judah ke diau ba Ejip kira-kira ba abad keenam S.M. Dalam timpuh nya, Jeremiah bisi meri pesan ngagai orang Judah ke diau ba serata Ejip, nyengkaum Mempis. (Jer. 44:1) Lebuh maya budaya Gerika meri mayuh kesan ngagai bansa ke bukai, bisi mayuh orang Judah pindah ngagai Ejip. Josephus madahka, orang Judah nya entara raban ti keterubah diau ba Aleksandria. Nyau kelama, orang Judah nerima sekeda endur nyadika begian sida. Ba abad keterubah M., penulis bebansa Judah ti benama Philo madahka, bisi sejuta iku orang Judah diau ba serata Ejip, “ari Libia nyentuk ngagai sempadan Etiopia.”

“Peter Bediri” (Surat Kereja Rasul 2:14-37)

12. (a) Baka ni nabi Joel nyebut pasal peristiwa ti nyadi ba Pentikos 33 M.? (b) Nama kebuah jaku benabi Joel patut dikeamatka ba abad keterubah?

¹² “Peter bediri” lalu bejaku ngagai orang mayuh ke datai ari bemacham bansa. (SKR. 2:14) Iya nerangka, bala murid Jesus bisi penau ulih bejaku ngena bansa jaku ke bukai laban nya pemeri ari Petara. Lalu tu sejalai enggau jaku benabi Joel ke madah: ‘Aku deka nuang roh Aku ngagai semua mensia.’ (Jol. 2:28) Pia mega, sebedau Jesus pulai baru ke serega, iya madah ngagai bala murid: “Aku deka minta ngagai Apai, lalu Iya deka meri kita penulung bukai.” Penulung ke disebut Jesus nya nunjukka “kuasa kudus.”—Jhn. 14:16, 17.

13, 14. Baka ni Peter enggau naka ulih nguji deka nyapai ati bala peninga iya, lalu baka ni kitai ulih nitihka chara iya?

¹³ Jaku penutup Peter ngagai orang mayuh maya nya amat meransang. Ku iya madah: “Awakka semua orang Israel nemu sereta andal, Jesus ke udah diukum bunuh kita ba tiang udah dipilih Petara nyadi Tuan enggau Kristus.” (SKR. 2:36) Nama kebuah Peter bejaku munyi nya? Endang amat, lebuh Jesus dibunuh ba tiang perinsa, mayuh ari bala peninga Peter nadai ba dia. Tang sebagai siti bansa, semua sida betanggungjawapka utai ke nyadi ba Jesus. Taja pia, Peter bejaku enggau chara ti bebasa sereta narit ati bala peninga iya ke bebansa Judah. Peter bejaku munyi nya laban iya dekaka bala peninga iya nesal ati, ukai laban deka ngutuk sida. Kati bala peninga iya pedis ati enggau utai ke dipadah Peter? Enda. Kebendar iya, ati bala peninga maya nya “asaika diachuk.” Sida lalu nanya: “Nama utai ke patut digaga kami?” Nya alai ketegal Peter bejaku enggau chara ti bebasa, iya ulih nyapai ati bala peninga iya. Udah nya, mayuh ari sida diperansang lalu nesal ati.—SKR. 2:37.

¹⁴ Kitai ulih nunda chara Peter nyapai ati orang. Kemayaharitu, bisi maya iya kitai deka betemu enggau orang ke bempu rumah, lalu iya engka nyebut utai ti enda sejalai enggau ajar Bup Kudus. Tang kebendar iya, kitai enda ibuh berandauka topik nya enggau iya. Enti kitai ngiga penemu ti sama entara kitai enggau orang ke bempu rumah nya, nyau kelama kitai ulih meri iya saut ari Bup Kudus enggau chara ti mudah sereta bebasa. Kesuah iya, enti chara ke baka nya dikena, orang ke bisi pengingin deka belajar mayuh agi pasal Jehovah, deka senang agi nerima nya.

PENGARAP KRISTIAN BA PONTUS

Lebuh Peter bejaku ngagai orang mayuh maya Pentikos 33 M., bisi mega orang Judah ke datai ari Pontus, iya nya siti begian di utara Asia Minor. (SKR. 2:9) Pengudah sida ninga Berita Manah, sekeda sida tentu nginjil ba menua diri empu. Ba surat Peter ti keterubah, iya nyebut pasal orang ke pechaya, “ngachir” ba mayuh endur nyengkaum ba Pontus.g (1 Pet. 1:1) Surat Peter mega madahka, orang Kristian di Pontus udah ‘merinsa napi bemacham penguji’ ketegal pengarap sida. (1 Pet. 1:6) Tu engka nyengkaum disakal sereta diperinsa.

Penguji bukai ke ditapi orang Kristian ba Pontus mega bisi dipadah ba surat entara Pliny ke Biak, iya nya gabenor ke megai sekeda wilayah ba Rome, ti nyengkaum Bitinia enggau Pontus, sereta Raja Besai Trajan. Pliny nulis surat ba Pontus kira-kira ba urung taun 112 M. Pliny madahka, pengarap orang Kristian ke majak dikerembaika udah ngachau semua orang. Tu enda ngira lelaki enggau indu, umur tauka pangkat. Pliny meri peluang ngagai orang ke dituduh salah laban nyadi orang Kristian kena madahka diri enggai agi nyadi orang Kristian. Barang sapa ke enggai ngereja nya deka diukum bunuh. Tang, orang ke ngutuk Kristus lalu besampi ngagai petara bukai, tauka besampi ngagai patung Raja Besai Trajan deka dilepaska. Taja pia, Pliny nemu “orang Kristian ti bendar enda alah ditekan ngereja pekara tu.”

g Leka jaku “ngachir” datai ari jaku Gerika ke mai reti “masyarakat Diaspora.” Leka jaku tu bisi kaul enggau chara orang Judah bejaku. Tu nunjukka, lebuh pengarap Kristian ditumbuhka, mayuh orang Judah dulu nyadi orang Kristian.

“Tiap Iku Kita Patut Dibaptisa” (Surat Kereja Rasul 2:38-47)

15. (a) Nama utai ke dipadah Peter, lalu baka ni reaksi orang pengudah ninga nya? (b) Nama kebuah beribu iku orang ke ninga Berita Manah lebuh Pentikos 33 M. ulih terus layak dibaptisa ba hari ti sama?

¹⁵ Pentikos 33 M. nya hari ti amat ngagitka ati. Nama kebuah? Peratika meh utai ke dipadah Peter ngagai orang Judah sereta orang ke megai pengarap Judah ti udah nerima Berita Manah. Ku iya: “Nesal ati meh kita, lalu tiap iku kita patut dibaptisa.” (SKR. 2:38) Asil iya, kira-kira 3,000 iku orang dibaptisa. Sida engka dibaptisa ba kolam di Jerusalem tauka ba endur semak Jerusalem.e Kati sida kelalu beguai-guai deka dibaptisa? Kati cherita tu nunjukka, bala pemelajar Bup Kudus tauka bala anak Saksi-Saksi Jehovah dipejal ngambika dibaptisa sebedau sida besedia? Enda. Ingat meh, sida orang Judah enggau orang ke megai pengarap Judah ke dibaptisa maya nya amat bagas belajarka Jaku Petara. Lalu sida mega sebagi ari bansa Israel ke diserahka ngagai Jehovah. Nambahka nya, sida udah nunjukka diri amat ransing. Sekeda sida bejalai amat jauh ngambika ulih ngintu pengerami Pentikos ke diintu tiap taun. Pengudah sida nerima pemendar ti amat penting bekaul enggau ungkup Jesus Kristus dalam ngereja peneka Petara, sida sedia deka terus nyembah Petara Jehovah. Tang diatu, sida nyadi murid Kristus ke udah dibaptisa.

SAPA SIDA KE MEGAI PENGARAP JUDAH?

“Orang Judah, enggau orang ke megai pengarap Judah,” mendingka utai ke dipadah Peter maya Pentikos 33 M.—SKR. 2:10.

Nikolaus nya disengkaum entara tujuh iku lelaki ke layak kena “bejalaika pengawa ke beguna.” Sida nyadung pemakai ninting hari ngagai bala menyadi Kristian ke begunaka bantu. Nikolaus mega “datai ari Antiok sereta megai pengarap orang Judah.” (SKR. 6:3-5) Kebendar iya, orang ke megai pengarap Judah nya ukai orang Judah. Tang sida udah nukar pengarap ngagai pengarap orang Judah. Sida ulih dikumbai orang ke bebansa Judah laban sida udah nerima Petara sereta Adat orang Israel. Sida mega nulak semua petara pelesu, lalu sida udah besunat (bala lelaki aja) sereta nitihka bansa Israel.

Pengudah orang Judah dilepaska ari Babilon ba taun 537 S.M., mayuh ari sida diau jauh ari menua Israel. Taja pia, sida agi bejalaika pengawa sembah nitihka pengarap Judah. Ketegal nya, orang di serata endur ba Timur Tengah kelia menya nemu pasal pengarap orang Judah. Penulis kelia menya baka Horace enggau Seneca madahka, mayuh orang ari menua bukai rinduka orang Judah enggau utai ke dipechaya sida. Pengudah nya, sida pan begabung enggau masyarakat orang Judah tu lalu megai pengarap orang Judah.

16. Baka ni orang Kristian ba abad ti keterubah nunjukka diri beberat agi ke utai ti diguna orang bukai?

¹⁶ Jehovah merekatka bala murid Jesus ke baru dibaptisa nya. Peratika meh utai ke dipadah Bup Kudus pasal sida: “Semua murid ke baru begelumu sereta bekunsika semua utai ke dikemisi sida. Sida nyual tanah enggau semua utai ke dikemisi sida, lalu duit nya dibagi sida ngagai semua orang, nitihka utai ke diguna siku-siku.”f (SKR. 2:44, 45) Nya alai, semua orang Kristian ti bendar kemayaharitu, deka neladan pengerindu sereta ulah beberat agi ke utai diguna orang bukai baka orang Kristian ba abad ti keterubah.

17. Nama sekeda utai ke patut digaga sesiku orang enti deka layak dibaptisa?

¹⁷ Enti sesiku orang deka nyerahka diri ngagai Jehovah lalu dibaptisa, iya enda tau enda nitihka sekeda chara ke udah dipadah Bup Kudus. (1) Siku orang patut ngulihka penemu pasal Bup Kudus. (Jhn. 17:3) (2) Iya patut ngayanka pengarap. Lalu ukai semina tusah ati ke ulah iya suba, tang iya patut nunjukka diri nesal ati ke ulah iya. (SKR. 3:19) Lalu (3) iya patut ngubah ulah iya ti lama tauka ba jaku bukai nikal baru. Iya mega patut berengkah ngereja pengawa ti bendar, sejalai enggau peneka Petara. (Rom. 12:2; Eps. 4:23, 24) Pengudah iya ngereja semua tu, baru meh iya ulih nyerahka diri ngagai Petara nengah sampi, lalu layak dibaptisa.—Mat. 16:24; 1 Pet. 3:21.

18. Nama peluang ti istimewa ke dibuka ngagai semua bala murid Kristus ke udah dibaptisa?

¹⁸ Kati nuan siku murid Jesus Kristus ke udah nyerahka diri ngagai Jehovah sereta udah dibaptisa? Enti pia, nuan ulih beterima kasih ke peluang ti istimewa ke udah diberi ngagai nuan. Baka bala murid Jesus ba abad keterubah ke penuh laban kuasa kudus, Jehovah mega ulih ngena nuan dalam chara ti luar biasa ngambika nuan ulih meri saksi enggau silik lalu terus dikeringka kena ngereja peneka Iya!

a Peda kutak “Jerusalem—Pusat Pengarap Judah.”

b Peda mega kutak “Rome—Indu Nengeri Perintah ti Bekuasa,” “Orang Judah ba Mesopotamia sereta Ejip,” sereta “Pengarap Kristian ba Pontus.”

c “Dilah” ke disebut ba ayat tu ukai amat-amat api. Tang ayat nya madah, iya “baka api ti mit.” Tu nunjukka, utai nya ulih dipeda ba atas pala tiap iku murid lalu gamal utai nya baka api.

d Peda kutak “Sapa Sida ke Megai Pengarap Judah?.”

e Kena 7 Ogos 1993, ba siti konvensyen entarabansa Saksi-Saksi Jehovah, ba Kiev di Ukraine, bisi 7,402 iku orang dibaptisa. Enam iti kolam dikena maya nya. Semua pengawa maptisa orang tu dipejalaika dalam masa 2 jam 15 minit.

f Atur ke digaga tu semina sementara aja. Tu ketegal, bala menyadi Kristian ba Jerusalem deka nyukung sida ke baru datai ngagai Jerusalem. Sida ke datai nya deka belajar mayuh agi kena negapka pengarap sida. Bala menyadi Kristian ke diau ba Jerusalem bekunsika utai ke dikemisi sida enggau sukarela. Lalu semua pengawa tu nadai kaul enggau pengawa komunis.—SKR. 5:1-4.