MAGIGIAMMU NGA ARTIKULO 19

KANSION 6 Ipamamma na Langi i Gloria na Dios

Parigan i Matalo ira nga Anghel

“Daya-rayawan nu i YAFU, sikamu nga makapangngua nga anghel na ira.”—SAL. 103:20.

I MAGIGIAMMU TAM

I kualidad ira na matalo ira nga anghel nga awayya tam parigan.

1-2. (a) Anni ira i nerumattam ta anghel ira? (b) Anni ira i napparehuattam ta anghel ira?

I tabbag mu ira

TURI TA niyaranni naka ni Jehova ta kinakurug, nabbalikka tu parte na minaggiddu nga familia na nga maddayaw nisa. Nelagum tatun i minillion nga anghel. (Dan. 7:9, 10) Nu manono tam i anghel ira, baka matageno tam tu neruma ira ta nittam. Angngarigan na, mas nabayag nga nattolay i anghel ira. (Job 38:4, 7) Mas makapangngua ira. Masanto anna matunung gapa ira, ari tu gitta tam nga imperfekto.—Luc. 9:26.

² Maski nu aru i naddumattam ta anghel ira, egga ira i napparehuattam. Kagitta na anghel ira, mepasingattam i makasta ira nga kualidad ni Jehova. Egga gapa i lallaguray tam nga mappili. Egga i ngagan anna personalidad na kada anghel anna madduruma gapa i annungadda ta passerbi. Kunnatun ittam gapa. Kagitta na anghel ira, ammu tam nga mawag tam gapa i pangigiya na Namaratu ta nittam.—1 Ped. 1:12.

3. Anni i magigiammu tam ta matalo ira nga anghel?

I tabbag mu

³ Megafu ta aru i napparehuattam ta anghel ira, mapagaram anna makagigiammu ittam ta makasta nga ehemplo da. Taw nga artikulo, gigiammuattam nu kunnasi tam maparigan i kinapakalinno na matalo ira nga anghel, i pangiddu da ta totolay, i pagatta-attam da, anna i pappursigi da tapenu kanayun nga marenu i kongregasion.

MAPAKALINNO I ANGHEL IRA

4. (a) Kunnasi nga ipasingan na anghel ira i kinapakalinno? (b) Ngatta minappakalinno i anghel ira? (Salmo 89:7)

I tabbag mu ira

⁴ Mapakalinno i matalo ira nga anghel. Parulattadda lagapa i bili-bilin ni Jehova maski nu ekspiriensadu ira, makapangngua, anna masirib. (Sal. 103:20) Habang kuadda i annungadda, ari ira mappara-parayag. Ari da gapa usan i pakapangngua da tapenu mala i atension na tanakuan. Magayayya ira nga kuan i uray na Dios maski nu ari mepakannammu i ngagadda.a (Gen. 32:24, 29; 2 Pat. 19:35) Ariadda alawatan i dayaw nga para kani Jehova laman. Ngatta kuruga minappakalinno i anghel ira? Megafu ta ayatadda si Jehova anna ikakua da yayya.—Bibbigan i Salmo 89:7.

5. Kunnasi nga nipasingan na tadday nga anghel i kinapakalinno turi ta nitunung na si apostol Juan? (Innan gapa i letratu.)

I tabbag mu

⁵ Ikonsidera i tadday nga nesimmu nga mangipasingan tu mapakalinno i anghel ira. Turi ta 96 C.E., tadday nga anghel nga ari nga nakagi i ngagan na i nangipasingan tu kappabbaw ira nga gannug kani apostol Juan. (Nep. 1:1) Anni i kingngua ni Juan turi ta nasingan na danatun? Nallakag yayya tapenu dayawan i anghel. Ngem insigida nga kinagi na anghel: “Ariam-mu nga kuan i kunnatun ta doroban ngà nga kagittam . . . I Dios i daya-rayawam-mu!” (Nep. 19:10) Talaga mapakalinno yatun nga anghel! Ari yayya nga interesadu ta dayaw. Insigida nga nikagi na kani Juan tu si Jehova i dayawan na. Ari gapa nga tinagibaddi na anghel si Juan. Maski nu mas nabayag i pinasserbi na anna mas makapangngua yayya kani Juan, kinagi na nga kaparehu na tu doroban si Juan. Maski gapa nu nitunung na anghel si Juan, arianna yayya pinoryan. Masippo i pinakibbida na ta nisa. Posible nga nalippawa na nga nakua laman yatun ni Juan megafu ta nikakaddag na ta nasingan na.

Tadday nga anghel nga fugaddan na si apostol Juan nga mallakag anna dayawan yayya. — Mapakalinno i pinakibbida anna pinangitunung na anghel kani Juan (Innan i parapo 5)

6. Kunnasi tam maparigan i kinapakalinno na anghel ira?

I tabbag mu

⁶ Kunnasi tam maparigan i kinapakalinno na anghel ira? Kagitta na anghel ira, ikaya tam nga mallallappo ta passerbi tam. Ariattam nga ipara-parayag i makua tam onu apan i dayaw megafu ta nakua tam ira. (1 Cor. 4:7) Ariattam gapa tagibadditan i tanakuan megafu laman ta mas mabayag ittam ngana nga masserbi kumpara nira onu megafu ta pribilehio tam ira. Kakurugan na, nu mas aru i responsibilidad tam, mas nakuan nga mappakalinno ittam. (Luc. 9:48) Kagitta na anghel ira, ikaya tam nga passerbian i tanakuan. Manaki tam nga nonopan na tanakuan tu mas importante ittam anne nira.

7. Kunnasi tam mepasingan i kinapakalinno nu mawag tam i mangitunung onu manabarang?

I tabbag mu

⁷ Mepasingattam gapa i kinapakalinno nu mawag nga itunung onu tabarangngattam i kapangngurug tam, ana tam, onu i tanakuan. Baka kawagattam i mangiyawa tu madammo nga tabarang. Parigattam gafu i anghel nga masippo nga nangitunung kani Juan. Ari nakuan tu makapakafi ta nono i panabarang tam. Nu ariattam nonopan tu mas malalaki ittam anne ta tanakuan, makeyawa ittam tu marespeto anna minaggiddu nga tabarang nga nebase ta Biblia.—Col. 4:6.

IDDUKAN NA ANGHEL IRA I TOTOLAY

8. (a) Base ta Lucas 15:10, kunnasi nga ipasingan na anghel ira nga iddukadda i totolay? (b) Kunnasi ittam nga uffunan na anghel ira ta pallayyagayya? (Innan gapa i letratu.)

I tabbag mu ira

⁸ Interesadu i anghel ira ta mesissimmu ta totolay anna ariadda nonopan nga awan tu kwenta tam. Iddukadda i totolay. Magayayya ira nu mabbabawi i nakaliwa tu madammo onu manoli kani Jehova i nagimmang nga masserbi nisa. Magayayya gapa ira nu alawatan na tadday nga tolay i kinakurug anna manguli. (Bibbigan i Lucas 15:10.) Aktibo gapa i anghel ira ta panguffun ta trabahu nga pallayyagayya. (Nep. 14:6) Maski nu ari tu ira i mallayyagayya, awayya da ittam igiya ta tolay nga kayà na nga mammammu si Jehova. Siempre, ari tam gapa makagi nga i anghel ira i mismu nga nangigiya nittam ta partikular nga tolay. Egga paga gare i awayya na nga usan ni Jehova kagitta na masanto nga espiritu na tapenu uffunan i totolay onu igiya i aripan na ira. (King. 16:6, 7) Ngem usan na lagapa i anghel ira. Makasiguradu ittam gafu nga uffunadda ittam ta pallayyagayya.—Innan i kahon nga “Natabbag i Pakimallo Da Ira.”b

Magatawa nga gugguggunadda i cart ta kalye na siudad. Egga ira i anghel nga nangigiya ta sister tapenu mapansin na i problemadu nga kabataan nga babay nga agga-itubang. — Magatawa nga kababalin laman nga nac-cart. Ta pallabbe da, nasingan na sister i tadday nga babay nga gitta na problemadu. Nanono na sister nga megiya ittam na anghel ira tari ira ta awayya na tu magala-aleg tu uffun ta espiritual. Megafu tatun, masippo nga kinibbida na i babay (Innan i parapo 8)

Natabbag i Pakimallo Da Ira

Posible kari nga inusa ni Jehova i anghel na ira ta tumunug ira nga ekspiriensa?

Habang mat-telephone witnessing i 12-anios nga publisher ta Peru kavulu i yena na, nakibbida na i tadday nga babay nga maddasa-dasal nga mangidob nakuan i Dios tu manguffun ta nisa. Para tatun nga babay, tabbag ta pakimallo na ira i tawag natun nga abbing anna nappa-Bible study yayya. Ari nabbayag, nakistudy ngana gapa yayya.
Tadday nga babay ta Romania i nappa-Bible study bi ngem nagimmang. Turi ta nac-caregiver yayya ta Italy, kayà na nga ituloy i Bible study na. Gafu ta awan tu kilala na nga Saksi tari, nakimallo yayya kani Jehova. Ari nabbayag, zinog yayya na familia nga pattrabahuan na nga umay maggatang. Nibilidda ta nisa nga ari yayya makibbida ta makakkua ta paggatangan. Kinagi da, “Saksi yari ni Jehova anna kibbidan na i kostumer na ira meyannung ta Biblia.” Ta paggangay na tari, talaga nilayyagayyan yayya na brother. Natageno na nga tabbag yatun ta pakimallo na ira. Nituloy na i Bible study na anna napprogreso. Gafu ta makasta nga ehemplo na, tadday ta ana na nga lalaki i nappa-Bible study anna makistudy ngana gapa.
Tadday nga magatawa nga Saksi i naddesision nga ilaku i kotche da. Turi ta egga i magatawa nga minay nga naningan tatun, niyesplika na magatawa nga Saksi nu ngatta ilalaku da yatun. Kinagi da nga mappasimple ira tapenu mas aru i tiempo da nga uffunan i tanakuan nga maggigiammu tu Biblia. Kunnaw i nitabbag nari na lalaki nga maya gumatang tari ta takay: “Kagabi, nipakimallo ku: ‘Dios ku, egga nakuan i makilalà nga manguffun ta nio. Gitta na awan tu kwenta na pattolè. Malegakku nakuan i kinakurug.’” Para ta nisa, tabbag ta pakimallo na yatun nga pinassimmu da. Nappa-Bible study ira na atawa na kunne na gapa i dua tu ana da nga babay. Sangawe, umu-umay ngana ta study yatun nga familia.

9. Kunnasi tam maparigan i pangaya na anghel ira ta totolay?

I tabbag mu

⁹ Kunnasi tam maparigan i pangaya na anghel ira ta totolay? Nu egga i meyanunsio tu wagi nga netoli, magayayya ittam kagitta na anghel ira. Siguraduattam nakuan nga mekagi tam ta nisa nga iddeddu tam yayya anna magayayya ittam nga nanoli yayya. (Luc. 15:4-7; 2 Cor. 2:6-8) Maparigattam gapa i anghel ira nu malallappo ittam ta pallayyagayya. (Ecl. 11:6) Uuffunan ittam na anghel ira ta pallayyagayya. Magaleg ittam nakuan tu chansa nga uffunan i wawwaragi ta ministerio. Angngarigan na, puede tam kari nga ivulu ta pallayyagayya i wagi nga bagu laman nga mallawan? Puede tam kari gapa nga duffunan i babbako anna lallakay onu i mataki nga wawwaragi tapenu makapamministerio ira?

10. Anni i magigiammu tam kani Sara?

I tabbag mu

¹⁰ Kunnasi nu limitadu ngana laman i makua tam? Puede ittam lagapa nga makipattrabahu ta anghel ira ta pallayyagayya. Kunnatun i kingngua ni Sister Sara nga taga-India.c Ma-20 dagun yayya nga payunir ngem nattaki yayya adde ta na-bedridden. Siempre, kuruga naraddam yayya tatun. Ngem ta uffun na kakongregasion na anna na makasta nga rutina na ta pabbibbig tu Biblia, nabbalin yayya tu magayayya. Gafu ta situasion ni Sara, mawag tu mannono yayya tu makua na tapenu makapamministerio lagapa. Ari yayya nga maka-itubang tapenu mal-letter witnessing yatutta mat-telephone witnessing ngana laman yayya. Yari tu tinawagan na i return visit na ira tapus nikagi da ta nisa nu sinni paga ira i maya nga mappa-Bible study. Anni i resulta natun? Piga vulan laman i nappasa, 70 ngana i Bible study ni Sara! Ari na paga lagu ngana nga me-Bible study ira ngamin. Yayya nga nipasa na i karuan ta kakongregasion na. Aru ta Bible study na i umay ngana ta study. Siguradu nga magayayya i anghel ira nga makipattrabahu ta wawwaragi kagitta ni Sara nga kukukuadda i adde na mawayya da ta pallayyagayya!

MINAGGATTA-ATTAM I ANGHEL IRA

11. Anni i mangipasingan tu minaggatta-attam i matalo ira nga anghel?

I tabbag mu

¹¹ Minaggatta-attam i matalo ira nga anghel. Rinivu dagun ngana nga atta-attammadda i kawan na hustisia anna kinadake. Nemammatadda nga narrebelde kani Jehova si Satanas anna i aru paga nga anghel nga dati bi nga kavulu da ta passerbi. (Gen. 3:1; 6:1, 2; Jud. 6) Ta Biblia, mabibbig tam i tadday nga matalo nga anghel nga kinokkontra na makapangngua nga demonio. (Dan. 10:13) Namegafu ta tiempo da Adan anna Eva adde sangawe, masingi-singan na matalo ira nga anghel nga baddi laman i mappili nga masserbi kani Jehova. Ngem maski kunnatun, magayayya anna matalikarag lagapa ira nga massesserbi kani Jehova. Ammu da nga duttal saw i tiempo nga alsan na Dios i ngamin nga kawan na hustisia.

12. Anni i makaduffun tapenu makapagattam ittam?

I tabbag mu

¹² Kunnasi tam maparigan i pagatta-attam na anghel ira? Kagitta na anghel ira, baka makasingan ittam tu kawan na hustisia ira onu makokkontra ittam. Ngem kagitta da, mangurug ittam nga duttal saw i tiempo nga alsan na Dios i ngamin nga kinadake. Yayya nga “ari ittam nga molang nga mangngua ta mapia” kagitta na matalo ira nga anghel. (Gal. 6:9) Ipromesa gapa na Dios nga duffunan na ittam nga makapagattam. (1 Cor. 10:13) Ikiddaw tam kani Jehova i espiritu na nga makaduffun nittam nga mappasa-pasensia anna magayayya. (Gal. 5:22; Col. 1:11) Kunnasi nu egga i mangokkontra niko? Buu nakuan i pattalo mu kani Jehova anna ari ka maganassing. Kanayun naka nga duffunan anna pasikannan.—Heb. 13:6.

MANGUFFUN I ANGHEL IRA TAPENU KANAYUN NGA MARENU I KONGREGASION

13. Anni i espesial nga annungan na anghel ira taw nga pangurianan ira nga aggaw? (Mateo 13:47-49)

I tabbag mu

¹³ Taw nga pangurianan ira nga aggaw, niddan ni Jehova i anghel ira tu espesial nga annungan. (Bibbigan i Mateo 13:47-49.) Minillion ta interu mundo i interesadu ta ilayyagayya tam. Inuli na karuan ta nira i pattoleda anna nabbalin tu kurug nga Cristiano, ngem manaki na karuan nga kuan yatun. Anni i annungan na anghel ira? “Isina da i totolay nga marakay ta totolay ira nga matunung.” Manguffun gafu ira tapenu kanayun nga marenu i kongregasion. Ari kayà kagian natun nga ari ngana makatoli i ngamin nga nagimmang nga makikavulu ta nittam, anni man i rasodda. Ari gapa kayà kagian natun nga ari ngana vuluvuga makkaproblema i kongregasion. Ngem makasiguradu ittam nga mappuppursigi i anghel ira tapenu kanayun nga marenu i kongregasiottam ira.

14-15. Kunnasi tam maparigan i pappursigi na anghel ira tapenu kanayun nga marenu i kongregasion? (Innan gapa i letratu ira.)

I tabbag mu

¹⁴ Kunnasi tam maparigan i pappursigi na anghel ira tapenu kanayun nga marenu i kongregasion? Immugurattam i futu tam. Kunnasi? Mappili ittam tu mapia nga kokkofun anna lillitattam i maski anni nga influwensia nga mamaddaping nittam. (Sal. 101:3) Nu kunnatun i kuattam, makoffun ittam tapenu kanayun nga marenu i kongregasiottam. Uffunattam gapa i wawwaragi tapenu kanayun ira nga matalo kani Jehova. Angngarigan na, anni i kuattam nu nammuattam nga nakaliwa tu madammo i tadday nga wagi? Megafu ta iddukattam yatun nga wagi, kagianattam yayya nga makibbida ta elder ira. Ngem nu ari na kuan yatun, sittam ngana i mangikagi ta elder ira. Ikaya tam nga insigida nga moffunan i maski sinni nga nakkafi i espiritualidad na!—Sant. 5:14, 15.

¹⁵ Kaddaraddam ta mawag nga malsa ta kongregasion i karuan nga nakangngua tu madammo nga liwa. Nu mesimmu i kunnatun, ‘ari ittam nga mevulu-vulu’ ta nira.d (1 Cor. 5:9-13) Gafu taw nga unnug, kanayun nga marenu i kongregasion. Nu piliattam gapa nga ari nga makikavulu tari ira ta nalsa, uuffunattam paga lagu ira. Awayya na gare tu yatun saw i mamaguyu ta nira nga manoli kani Jehova. Nu manoli ira, magayayya ittam kunne na gapa si Jehova anna i anghel na ira.—Luc. 15:7.

Letratu ira: 1. Dua nga sister nga agga-itubang ta parke anna makkafe. Habang mabbibida i tadday nga sister, tanakuan i lipayan na kavulu na. 2. Turi kua, inarannian na sister nga mabbibida i dua nga elder ta Kingdom Hall. — Anni i kuattam nu nammuattam nga nakaliwa tu madammo i tadday nga wagi? (Innan i parapo 14)e

16. Kunnasim maparigan i anghel ira?

I tabbag mu

¹⁶ Dakal nga pribilehio nga ipamavulun ni Jehova nga magigiammu tam i meyannung ta anghel ira anna makipattrabahu ta nira! Parigattam i makasta ira nga kualidad da: i kinapakalinno da, i pangiddu da ta totolay, i pagatta-attam da, anna i pappursigi da tapenu kanayun nga marenu i kongregasion. Nu parigattam i matalo ira nga anghel, mabbalin ittam gapa tu parte na familia ni Jehova nga maddayaw ta nisa adde ta mannanayun.

KANSION 123 Matalo nga Maki-unnug

a Ta minillion nga anghel, dua laman i nekagi i ngagadda ta Biblia—si Miguel anna si Gabriel.—Dan. 12:1; Luc. 1:19.

b Aru paga i mabibbig mu nga ekspiriensa ta Watch Tower Publications Index ta heading nga “Angels” anna ta subheading nga “angelic direction (examples).”

c Natalian i ngagan.

d Kagitta na neyesplika ta 2024 Mekadua nga Update na Manangngal nga Baggi, nu makistudy i tadday nga nalsa ta kongregasion, usan na tadday nga wagi i nasanay ta Biblia nga konsensia na tapenu desisionan nu maddios yayya nisa onu ari, anna nu alawatan na yayya.

e DESKRIPSION NA LETRATU: Kinagianan na sister i kofun na nga kibbidan na i elder ira meyannung ta madammo nga liwa nga nakua na. Ngem turi ta ari nga kingngua yatun na kofun na, i sister ngana i nangikagi ta elder ira.