Ngagan ni Jehova—Ngatta Importante Kani Jesus?

1-2. (a) Anni i kingngua ni Jesus ta gabi nage da yayya nga patayan? (b) Anni ira i tabbagattam taw nga artikulo?

TURI TA gabi na Huebes, Nisan 14, 33 C.E., niselebra ni Jesus i Pamugag na Yafu kavulu i matalo nga apostoles na. Ammu na nga aranni ngana yayya nga traydoran ni Judas tapus ziga-rigatan anna patayan yayya na kalaban na ira. Yatutta kabalidda nga namugag, nangikagi yayya tu aru nga pamagaram ta nira. Nage gapa ira nga manaw, egga i vinuya ni Jesus nga kuruga importante nga pakimallo. Nitura ni apostol Juan yatun nga pakimallo ta Juan kapitulo 17.

² Taw nga artikulo, innattam nu anni i magigiammu tam ta pakimallo ni Jesus. Anni i pakavurungan na nage na natay? Anni i importante ta nisa ta pinamministerio na taw ta davvun? Ammuattam i tabbag tatun ira.

“NIPAKANNAMMU TAKA NIRA”

3. Anni i kinagi ni Jesus meyannung ta ngagan ni Jehova, anna anni i kayà na kagian tatun? (Juan 17:​6, 26)

³ Kunnaw i nipakimallo ni Jesus: “Nipakannammu taka nira.” Kakurugan na, namiddua nga kinagi ni Jesus nga nipakannammu na si Jehova ta disipulos na. (Bibbigan i Juan 17:​6, 26.) Anni i kayà kagian ni Jesus tatun? Nipakannammu na kari ta nira i tadday nga ngagan nga ari da paga ammammu? Ari. Megafu ta Judio i disipulos ni Jesus, ammu da tu Jehova i ngagan na Dios. Rinivu nga beses nga nallawan yatun nga ngagan ta Hebreo nga Katurakan. Yatutta ari tu i personal nga ngagan na Dios i tukuyan ni Jesus. Kayà na kagian tatun nga nituddu na ta nira nu anni nga klase na Dios si Jehova. Zinuffunan ni Jesus i disipulos na nga malippawa i gakkag ni Jehova para ta davvun anna ta totolay, nu anni i kingngua ni Jehova, i kuan na noka, anna nu anni ira i kualidad na. Awan ngana tu tanakuan nga makangngua tatun nu ari si Jesus laman.

4-5. (a) Kunnasi nga mabbalin tu mas importante ta nittam i ngagan na tadday nga tolay? Mangiyawa tu angngarigan. (b) Kunnasi nga nabbalin tu mas importante ta disipulos ni Jesus i ngagan ni Jehova?

⁴ Bilang angngarigan, imajinammu tu egga i tadday nga elder ta kongregasion nu nga mangngagan tu David anna tadday gapa yayya nga doktor. Piga ragun mu ngana nga kilala yatun nga brother. Ngem mittan, nakka-emergency ka tapus nikarela daka ta ospital nu sitaw mattrabahu yatun nga brother. Yatun nga brother i doktor nga nangipaliag niko. Megafu tatun, mas iddukammu ngana yatun nga brother anna kada maginnam i ngagan na, manono mu i kingngua na para ta niko. Si David ay ari ngana laman tu elder para niko. Yayya ngana gapa i doktor nga nangipaliag ta inango mu.

⁵ Dati ngana gapa nga ammu na disipulos ni Jesus i ngagan ni Jehova. Ngem mas nabbalin tu importante ta nira yatun nga ngagan megafu ta zinuffunan ira ni Jesus nga mas mammammu tu mapia si Jehova. Ngatta makagi tam yatun? Masingan gare kani Jesus i personalidad na Yama na ta ngamin nga kinagi anna kingngua na. Yatutta mas ‘nakannammuan’ na apostoles si Jehova gukaban na pagginna da ta panuddu ni Jesus anna pagobserba da ta pattratu na ta totolay.—Juan 14:9; 17:3.

“NGAGAM-MU NGA NIYAWA MU NIAKAN”

6. Anni i kayà kagian ni Jesus turi ta kinagi na nga neyawa ta nisa i ngagan ni Jehova? (Juan 17:​11, 12)

⁶ Kunnaw i nipakimallo ni Jesus para ta disipulos na: “Alluaruam-mu ira gafu ta pakapangngua na ngagam-mu nga niyawa mu niakan.” (Bibbigan i Juan 17:​11, 12.) Kayà kari kagian naw nga nabbalin ngana tu Jehova i ngagan ni Jesus? Ari. Turi ta nakimallo si Jesus, kinagi na i “ngagam-mu” tapenu tukuyan i ngagan ni Jehova. Tatun nga kinagi ni Jesus, ari na kakkagian nga Jehova ngana i ngagan na. Anni gafu i kayà na kagian turi ta kinagi na nga neyawa ta nisa i ngagan na Dios? Ollu, si Jesus i mangibaggi ta Dios anna yayya gapa i Pannakasimu na. Minay yayya ta davvun ta ngagan na Yama na anna nammilagro yayya gukaban natun nga ngagan. (Juan 5:43; 10:25) I kebalinan gapa na ngagan nga Jesus ay “Si Jehova i Kepaliag.” Egga gafu i ngagan ni Jehova ta kebalinan na ngagan ni Jesus.

7. Ngatta naguvovug si Jesus para kani Jehova? Mangiyawa tu angngarigan.

⁷ Nonopan yaw nga angngarigan. Irepresenta na ambassador i tadday nga presidente anna awayya na i maguvovug para tatun nga presidente. Yatutta nu anni i kinagi na ambassador, kunnari balaman i kayà nga ipekagi na presidente. Kunnatun gapa si Jesus. Nirepresenta na si Jehova anna naguvovug yayya ta totolay para kani Jehova.—Mat. 21:9; Luc. 13:35.

8. Kunnasi nga “egga” ngana kani Jesus i ngagan ni Jehova nage na paga nga minay ta davvun? (Exodo 23:​20, 21)

⁸ Agalan na Biblia si Jesus tu “i Uvovug” megafu ta inusa yayya ni Jehova tapenu mangiyadde tu informasion anna instruksion ira ta anghel anna ta totolay. (Juan 1:​1-3) Posible gapa tu si Jesus i anghel nga zinog ni Jehova tapenu tangngallan i Israelita ira ta kegga da ta katanapan. Turi ta kinagi ni Jehova ta Israelita ira nga tuttuladda yatun nga anghel, kinagi na nira nu ngatta: “Megafu ta egga nisa i ngagakku.”a (Bibbigan i Exodo 23:​20, 21.) I ngagan ni Jehova ay “egga” kani Jesus megafu ta irepresenta na si Jehova anna yayya i kapianan nga mangidefensa anna mamakasanto ta ngagan na Yama na.

“AMA, IPASINGAM-MU NGANA I DAYAW NA NGAGAM-MU”

9. Kunnasi nipasingan ni Jesus nga importante ta nisa i ngagan ni Jehova? Ipakanawag.

⁹ Gitta na nagigiammu tam ngana, maski paga nage nga minay ta davvun si Jesus, pinaka-importante ngana ta nisa i ngagan ni Jehova. Yayya nga ta kegga na ta davvun, nipasingan na gapa ta ngamin nga kingngua na nga kuruga importante ta nisa i ngagan ni Jehova. Turi ta mangultimu ngana i ministerio ni Jesus, nipakimallo na: “Ama, ipasingam-mu ngana i dayaw na ngagam-mu.” Insigida nga simibbag i Yama na ta langi ta masikan nga ngaral: “Nipasingak-ku ngana, ay ek-ku mangana nga ipasingan noka!”—Juan 12:28.

10-11. (a) Kunnasi nga zinayaw ni Jesus i ngagan ni Jehova? (Innan gapa i letratu.) (b) Ngatta mawag tu mapakasanto anna medefensa i ngagan ni Jehova?

¹⁰ Zinayaw gapa ni Jesus i ngagan na Yama na. Kunnasi? Nipakannammu na ta tanakuan i kappabbaw ira nga kualidad anna kukukuan na Yama na. Ngem ari laman tu yatun i nelagum ta pangidayaw tatun nga ngagan. Mawag gapa nga mapakasanto anna medefensa i reputasion ni Jehova.b Nipasingan ni Jesus nga kuruga importante yatun turi ta nituddu na ta tagatuttul na ira i modelo nga pakimallo: “Ama mi nga egga ta langi, marayaw paray i ngagam-mu.”—Mat. 6:9.

¹¹ Ngatta mawag tu mapakasanto anna medefensa i ngagan ni Jehova? Ta hardin na Eden gare, pinara-parake ni Satanas nga Diablo si Jehova nga Dios. Inakusan na tu laddug si Jehova anna egga i iyeyetu na nga mapia kadi Adan anna Eva. (Gen. 3:​1-5) Pinalawan gapa ni Satanas nga ugal i pangngua ni Jehova ta ganna-gannug. Megafu tatun ira nga kinaladdug, nonopan lallagu na totolay nga marake si Jehova. Ta tiempo gapa ni Job, inakusan ni Satanas danuri masserbi kani Jehova. Kinagi na nga massesserbi laman ira megafu ta bendision nga malawa da ta Nisa. Kinagi na gapa nga magimmang ngana kanu nga masserbi kani Jehova i totolay nu marigatan ira gafu ta ari da mabba talaga iddukan si Jehova. (Job 1:​9-11; 2:4) Mawag i tiempo tapenu mapakurug nu sinni talaga i laddug, si Jehova onu si Satanas.

“AGGA-PARAN NGÀ NGA MANGIYAWA TA INANGO KU”

12. Anni i sigga-paran nga kingngua ni Jesus megafu ta aya na ta ngagan ni Jehova?

¹² Megafu ta aya ni Jesus kani Jehova, kingngua na i ngamin nga mawayya na tapenu mapakasanto anna medefensa i ngagan ni Jehova. Kinagi ni Jesus: “Agga-paran ngà nga mangiyawa ta inango ku.” (Juan 10:​17, 18) Agga-paran gafu nga matay si Jesus para ta ngagan ni Jehova.c Ari nga sinuttul na ollu nga dua nga perfekto nga tolay nga da Adan anna Eva si Jehova anna sinuttul da lallagu si Satanas. Ngem ari tu kunnatun si Jesus. Sigga-paran yayya nga minay ta davvun anna pakurugan i pangaya na kani Jehova. Kingngua ni Jesus yatun gukaban na panuttul na kani Jehova ta ngamin nga kingngua anna kinagi na. (Heb. 4:15; 5:​7-10) Nattalupaddian yayya nga matalo ta interu nga pattolena maski nu mataka-taki i nikapatena ta kayu. (Heb. 12:2) Megafu tatun, napakurug na nga ayatan na si Jehova anna i ngagan Na.

13. Ngatta si Jesus i kapianan nga mamakurug tu laddug si Satanas? (Innan gapa i letratu.)

¹³ Ta interu nga pinattolay ni Jesus, napakurug na tu si Satanas i laddug, ari tu si Jehova! (Juan 8:44) Mas ammammu ni Jesus si Jehova anne ta maski sinni paga nga tolay. Nu kurug nakuan i akusasion ni Satanas meyannung kani Jehova, ammu nakuan ni Jesus i meyannung tatun. Ngem determinadu lagapa si Jesus nga idefensa i reputasion onu i ngagan ni Jehova. Maski ta oras nga gitta na pinagurayan ngana ni Jehova si Jesus, sigga-paran lapa nga matay si Jesus imbes tu arian na tuttulan i minaggiddu nga Yama na.—Mat. 27:46.d

“NETUPPAL KU NGANA I NIPAKUAM NIAKAN”

14. Kunnasi nga binala-balakkan ni Jehova i kinamatalo ni Jesus?

¹⁴ Ta gabi nage nga natay si Jesus, nakagi na ta pakimallo na: “Netuppal ku ngana i nipakuam niakan.” Komfiansa si Jesus nga bala-balakkan ni Jehova i kinamatalo na. (Juan 17:​4, 5) Fustu laman nga nattalo si Jesus ta Yama na. Ari gare nga nipamavulun ni Jehova nga mabbayag si Jesus ta attanamman. (King. 2:​23, 24) Pinaginnolay ni Jehova si Jesus anna niddan na yayya tu katannangan nga posision ta langi. (Fil. 2:​8, 9) Tapus nammaguray si Jesus bilang Patul na Pappatulan na Dios. Anni noka i ituppal natun nga Pappatulan onu Pammaguray? Kagian nittam na mekadua nga parte na modelo nga pakimallo: “Maparattal paray i Pammagurem. Makua i urem [Jehova] toye ta davvun ta kunne ta langi.”—Mat. 6:10.

15. Anni paga saw i kuan ni Jesus?

¹⁵ Aranni ngana nga makiggerra si Jesus kontra ta kalaban ira na Dios anna daralan na saw i marake ira ta Armagedon. (Nep. 16:​14, 16; 19:​11-16) Ari mabbayag kabalin natun, itabbo na saw si Satanas ta “avvu nga ari matuku-tukug i karalam na,” nu sitaw mefuku si Satanas anna awan vuluvuga tu makua na. (Nep. 20:​1-3) Itoli saw ni Jesus i imammo anna pabbalinan na uli tu perfekto i totolay ta Marivu Dagun nga Pammaguray na. Paginnolayan na saw i natay ira. Pabbalinan na gapa tu paraiso i interu davvun. Matuppal ngana saw i gakkag ni Jehova!—Nep. 21:​1-4.

16. Anni saw i mesimmu kabalin na Marivu Dagun nga Pammaguray?

¹⁶ Anni i ekspektattam nga mesimmu kabalin na Marivu Dagun nga Pammaguray? Mapawan ngana saw i liwa anna kina-imperfekto na totolay. Ari ngana saw kawagan na totolay i makkiddaw tu pamakoma base ta tavvu. Ari da ngana gapa saw kawagan i 144,000 nga mabbalin tu papari da, ni tu kawagadda si Jesus nga mabbalin tu Atannang nga Pari da tapenu makaranni kani Jehova. Tapus “i [Adamiko nga] patay i urian nga mapatulu.” Mapawan ngana saw i attanamman ira. Mapaginnolay ngana saw i natay ira. Perfekto ngana saw i ngamin nga totolay taw ta davvun.—1 Cor. 15:​25, 26.

17-18. (a) Anni i mesimmu kabalin na Marivu Dagun nga Pammaguray? (b) Anni saw i kuan ni Jesus nu mabalin ngana yayya nga mammaguray? (1 Corinto 15:​24, 28) (Innan gapa i letratu.)

¹⁷ Anni paga i mesimmu kabalin na Marivu Dagun nga Pammaguray? Tatun nga tiempo, egga saw i kuruga espesial nga mesimmu. Masolba ngana saw i isyu meyannung ta pamakasanto ta ngagan ni Jehova. Kunnasi? Ta hardin na Eden, inakusan ni Satanas tu laddug si Jehova anna awan tu aya na pammagurena ta totolay. Namegafu tatun nga tiempo, namippiga ngana nga pinakasanto danuri na mangidayaw anna mangikakua kani Jehova i ngagan na. Yatutta kabalin na Marivu Dagun nga Pammaguray, interamente ngana saw nga napakarenuan i reputasion ni Jehova. Talaga napakurug ngana saw ni Jehova nga minaggiddu yayya nga Yama.

¹⁸ Kabalin na Marivu Dagun nga Pammaguray, makannammuan saw na ngamin nga tolay nga laddug i akusasion ira ni Satanas. Anni i kuan ni Jesus kabalin na nga mammaguray? Marrebelde kari saw yayya kagitta na kingngua ni Satanas? Ari! (Bibbigan i 1 Corinto 15:​24, 28.) Itoli saw ni Jesus i Pappatulan ta Yama na. Makimoray saw yayya ta pammaguray ni Jehova. Ari tu kagitta ni Satanas, sigga-paran si Jesus nga itoli i ngamin kani Jehova megafu ta iddeddu na yayya.

19. Kunnasi ka-importante kani Jesus i ngagan ni Jehova?

¹⁹ Napakurug ni Jesus nga yayya i perfekto nga mangibaggi ta Yama na. Yatutta sigga-paran nga niyawa ni Jehova i ngagan na kani Jesus. Kunnasi ka-importante kani Jesus i ngagan ni Jehova? Yatun i pinaka-importante nisa. Sigga-paran nga matay si Jesus para tatun nga ngagan anna sigga-paran gapa yayya nga itoli i ngamin kani Jehova ta kabalin na Marivu Dagun nga Pammaguray. Kunnasi tam maparigan si Jesus? Tabbagattam yatun ta tumunug nga artikulo.