OKWU MMALITE

Baịbụl Nsọ bụ akwụkwọ Chineke ji agwa anyị niile okwu. Anyị chọọ ịma gbasara Chineke, Onye e dere uche ya na Baịbụl, anyị ga-amụrịrị Baịbụl. (Jọn 17:3; 2 Timoti 3:16) Ihe e dere na ya bụ ihe Jehova Chineke bu n’obi kee ụmụ mmadụ na ụwa ha bi na ya.—Jenesis 3:15; Mkpughe 21:3, 4.

E nweghị akwụkwọ ọzọ na-akpa ike ná ndụ ndị mmadụ ka Baịbụl. Ọ na-akụziri anyị ka anyị na-akpa àgwà ka Jehova, ya bụ, ka ihe gbasara ndị ọzọ na-emetụ anyị n’obi, ka anyị hụ ha n’anya ma na-emere ha ebere. Ihe e dere na ya na-eme ka mmadụ nwee olileanya, na-enyekwara mmadụ aka idi nsogbu dị iche iche na-abịara ya, ọ bụrụgodị nsogbu siri ezigbo ike. Ọ na-emekwa ka a mata ihe ndị e ji mara ụwa a, bụ́ ihe ndị na-anaghị amasị Chineke.—Abụ Ọma 119:105; Ndị Hibru 4:12; 1 Jọn 2:15-17.

Asụsụ ndị mbụ e ji dee Baịbụl bụ Hibru, Arameik, na Grik. Ma, a sụgharịala ya n’ihe dị ka puku asụsụ atọ (3,000), ma nke bụ́ Akwụkwọ Nsọ Hibru na Grik ma nke bụ́ naanị Akwụkwọ Nsọ Grik. E nwetụbeghị akwụkwọ hụrụ azụ ya anya ma a bịa n’asụsụ ole a sụgharịrịla ya nakwa mmadụ ole nwere ya. Otú a ka o kwesịrị ịdị n’ihi na Baịbụl buru amụma, sị: “A ga-ekwusakwa ozi ọma Alaeze Chineke [bụ́ tụụ bụ́ isi opi n’ihe Baịbụl na-akụzi] n’ebe niile n’ụwa ka ọ bụụrụ mba niile àmà, mgbe ahụkwa ka ọgwụgwụ ga-abịa.”—Matiu 24:14.

Anyị ghọtara na ihe Baịbụl na-ekwu dị ezigbo mkpa. Ọ bụ ya mere anyị ji saa anya na mmiri sụgharịa Baịbụl a ka ya na Baịbụl mbụ e si n’ike mmụọ nsọ dee na-ekwu otu ihe, ka ọ dị mfe nghọta ma dị mfe ọgụgụ. N’azụ azụ Baịbụl a, ị ga-ahụ isiokwu ndị a: “Ihe Ndị E Kwesịrị Iburu n’Uche Mgbe A Na-asụgharị Baịbụl,” “Ihe Ndị E Degharịrị na Baịbụl A,” na “Otú Anyị Si Nweta Baịbụl.” Isiokwu ndị a kwuru gbasara ihe ụfọdụ e degharịrị na Baịbụl a.

Ọ na-amasị ndị hụrụ Jehova Chineke n’anya ma na-efe ya ịgụ Okwu Chineke a sụgharịrị nke ọma, nke dịkwa mfe nghọta. (1 Timoti 2:4) Ọ bụ ya mere anyị ji wepụta Baịbụl Nsụgharị Ụwa Ọhụrụ a e degharịrị edegharị n’asụsụ Igbo. Anyị bukwa n’obi ịsụgharịkwu ya n’asụsụ ole ọ bụla ọzọ kwere anyị omume. Onye anyị hụrụ n’anya, obi siri anyị ike na ịgụ Baịbụl a ga-abara gị uru ná mbọ ị na-agba ‘ka ị chọọ Chineke ma chọta ya.’—Ọrụ Ndịozi 17:27.