Ha Na-abịakọ ọnụ ruo Afọ Iri!

MGBE a jụrụ ya mmetụta o nwere afọ iri gara aga mgbe a malitere ibipụta Ụlọ Nche nke Spanish n’otu oge ahụ ya na nke Bekee, otu ezi nwanna nwanyị bụ́ onye Spain zaghachiri: ‘Anyị chere na ọ bụ ngọzi n’ihi na anyị na ndị na-asụ Bekee bụzi otu, olee otú unu si asụ ya, ụkwụ na ụkwụ. Mgbe m na-ekwu Bekee, m na-eburu n’uche mgbe nile banyere ọgbakọ a. Anyị na-ezo aka n’ọgbakọ a dị ka “Mama.” Anyị na-enwe mmetụta nke ịnọ nso, ịdị nso. Ọ mara mma. Ọ bụ ihe dị ịtụnanya!’

Nwanna nwanyị a kwesịrị ntụkwasị obi kwupụtara echiche ọtụtụ ndị na-agụ akwụkwọ n’asụsụ na-abụghị Bekee. N’afọ ndị gara aga, isiokwu dị iche iche na-apụta n’Ụlọ Nche ná mbipụta Spanish mgbe ihe dị ka ọnwa isii gasịrị e bipụtara ha n’asụsụ Bekee. Asụsụ ndị ọzọ nwekwara ụdị igbu oge ndị a. N’ụzọ a pụrụ ịghọta, e nwere oké ọchịchọ ibipụta otu isi ihe ahụ, n’otu mgbe ahụ, n’ime ọtụtụ asụsụ.

Ya mere na-amalite ná mbipụta nke April 1, 1984, mbipụta nke Spanish bụ nke mbụ a malitere ibipụta ya na nke Bekee n’otu mgbe. Asụsụ ndị ọzọ sochiri n’oge na-adịghị anya. Ka ọ na-eru mmalite nke 1985, mbipụta na 23 asụsụ malitere ịpụtakọ ọnụ. Ka a na-achọta ma na-enye ndị nsụgharị ọzụzụ, mbipụta n’ọtụtụ asụsụ ndị ọzọ malitere ịpụta otu mgbe ya na nke Bekee.

Mbipụta nke a nke Ụlọ Nche na-aka afọ nke iri nke ibipụtakọ ha ọnụ akara. A na-ebipụta Ụlọ Nche ugbu a na 116 asụsụ, 85 n’ime ha na-abịakọ ọnụ. Nke a pụtara na 99.3 pasent nke ngụkọta nkezi nke mbipụta bụ́ 16,100,000 mkpụrụ Ụlọ Nche ka a na-ebipụta n’otu ụdị ihu akwụkwọ na isiokwu dị iche iche. N’ime ndị na-eje Ọmụmụ Ihe Ụlọ Nche kwa izu, ihe karịrị 95 pasent na-atụle otu isiokwu ahụ n’otu mgbe ahụ.

Teta!, magazin nke ya na Ụlọ Nche na-agakọ, na-apụtakọ ọnụ na 37 asụsụ n’ime 74 asụsụ a na-ebipụta ya. A na-ebipụta akwụkwọ Yearbook of Jehovah’s Witnesses nke a na-ebipụta kwa afọ na asụsụ 18. Ụdị ibipụtakọ akwụkwọ ọnụ dị otú ahụ na-enye aka ijikọ ndị Chineke “n’otu uche ahụ na n’otu izu ahụ.”​—⁠1 Ndị Kọrint 1:10.