Nzaghachi Na-ama Aka

CATHOLIC HERALD, bụ́ akwụkwọ akụkọ Roman Katọlik nke Britain, bipụtara na nso nso a akwụkwọ ozi sonụ nke si n’aka onye na-agụ ya na Wales: “Otu abalị, Ndịàmà Jehova abụọ bịara n’ọnụ ụzọ m. Ejisiri m ike kwuo na ọ bụ Chọọchị Katọlik mere ka e jide ịbụ eziokwu nke Agba Ọhụrụ ha hotara n’aka. Dị ka ihe ijuanya nye m, otu n’ime ha kwetara. ‘Ee,’ ka o kwuru, ‘unu na-eme ka e jide ya n’aka ma unu adịghị agbaso ya. Jisọs kwuru, sị, “unu hụrịta ibe unu n’anya, dị ka m hụrụ unu n’anya,” ma unu na-egburịta ibe unu. N’agha gara aga, ndị Katọlik gburu ndị Katọlik, ma ọ dịghị Onyeàmà Jehova gburu Onyeàmà [ibe ya].’ Gịnị ka m pụrụ ime ma ọ bụghị ikwere? Olee otú anyị pụrụ isi kpee ekpere ka anyị na ‘ụmụnna anyị e kewapụrụ ekewapụ’ dị n’otu mgbe ọ na-adịghị ezi ịdị n’otu dị n’etiti anyị onwe anyị? Ó kwesighị ka anyị buru ụzọ dozie akụkọ ọjọọ a?”—Jọn 15:12.

Agha ụwa abụọ nke narị afọ nke 20 a bidochara na Krisendọm wee taakwa isi ihe dị ka nde mmadụ 50 ruo nde 60. Otú ọ dị, a pụrụ ikwu n’eziokwu na Ndịàmà Jehova ekereghị òkè n’agha ndị ahụ, aka ha adịghịkwa n’esemokwu ọ bụla na-ewere ọnọdụ ugbu a. Olee otú nke a si kwe omume? Ọ ga-abara gị uru ịchọpụtakwu banyere nkekọ dị ike nke ịhụnanya ndị Kraịst na ịdị n’otu nke ihe karịrị nde Ndịàmà Jehova ise nwere gburugburu ụwa.—Tụlee Aịsaịa 2:4.

[Ebe E Si Nweta Foto Dị na peeji 32]

U.S. National Archives photo