Gịnị Mere Ha Ji Na-eme Ya?

KWA afọ ọtụtụ puku Ndịàmà Jehova gburugburu ụwa na-ezukọ ná mgbakọ dị iche iche. N’ebe ahụ, ha na-enwe mkpakọrịta ma na-anụrụ usoro ihe omume magburu onwe ya nke ntụziaka Bible. Ụfọdụ na-eme mgbalị dị ukwuu iji gaa mgbakọ ndị a. Dị ka ihe atụ, n’afọ gara aga na Malawi otu di na nwunye nọ n’etiti afọ ndị 60 ha, tinyere nwa ha nwoke na nwunye ya na nwa ọhụrụ, ji ịnyịnya ígwè mee njem kilomita 80 iji gaa otu mgbakọ. Ha hapụrụ obodo ha n’elekere anya isii nke ụtụtụ ma rute n’ala mgbakọ mgbe hour 15 gasịrị.

Na Mozambique, otu ìgwè jiri ịnyịnya ígwè mee njem ụbọchị atọ iji garuo otu mgbakọ. N’otu abalị, ka ha mara ụlọ ntu n’èzí, ha nụrụ ka ọdụm na-agbọ ụja na nso ebe ahụ. Ọ bụ ezie na ha tụrụ nkụ n’akụkụ ebe ụmụ anụ ahụ nọ, ọdụm ndị ahụ nọgidere gburugburu ebe ahụ ruo mgbe chi bọrọ. Onyeàmà ọzọ nke na-aga otu mgbakọ ahụ zutere ọdụm ihu na ihu n’ụzọ. O guzoro jụụ n’emegharịghị ahụ ruo mgbe ọdụm ahụ pụrụ. Ná mgbakọ ahụ Ndịàmà a ji obi ụtọ kọọ otú e siworo ‘dọpụta ha n’ọnụ ọdụm.’—2 Timoti 4:17.

Ọtụtụ n’ime Ndịàmà Jehova na-eme mgbalị dị ukwuu iji gaa mgbakọ ma ọ bụ ọbụna nzukọ ọgbakọ kwa izu maka ofufe. N’ihi gịnị? Isiokwu ndị na-esonụ ga-enyere gị aka ịghọta ihe mere ịgbakọta ọnụ ji dị oké mkpa.