Ihe Nduzi n’Ịhọrọ Ezi Ndị Enyi

NDỊ na-eto eto na-adabere n’ebe ndị ọgbọ ha nọ maka nduzi n’ihe metụtara uwe na egwú kama ịbụ n’ebe ndị mụrụ ha nọ, ka otu akụkọ dị na Reader’s Digest na-ekwu. Ya mere ọ dị mkpa ka ndị nne na nna mara ndị ha na ụmụ ha na-akpakọ na ebe ha na-akpaga.

“Ọ bụ ibu ọrụ unu ime nnyocha,” ka Esmé van Rensburg, bụ́ onye nkuzi ukwu ná ngalaba na-ahụ maka nkà mmụta akparamàgwà mmadụ n’otu mahadum dị na South Africa, na-ekwu. Ọ na-agbakwụnye, sị: “Ma eleghị anya, ụmụ unu ga-ewesa unu iwe, ma ha ga-adajụ.” Mgbe ahụ, ọ tụpenyere ndị nne na nna azụ̀ n’ụzọ na-esonụ. Ụkpụrụ nduzi kwesịrị ịbụ ndị ezi uche dị na ha na ndị nwere nzube doro anya e ji nye ha; ṅaanụ ụmụ unu ntị; unu emeghachila omume gabiga ókè, kama nọrọnụ nwayọọ, marakwanụ ihe unu chọrọ ikwu. Ọ bụrụ na nwa unu emeelarị onye unu na-achọghị enyi, lekwasịnụ anya n’àgwà ọjọọ ọbụbụenyi ahụ kwaliteworo kama nanị ikwu ka ha ghara isokwa ya na-enwe mkpakọrịta.

Ezi ndụmọdụ maka ndị nne na nna adịworị n’Okwu Chineke, bụ́ Bible, eri oge. Dị ka ihe atụ, ọ na-ekwu, sị: “Bụrụ onye na-anụ ihe ọsọ ọsọ, onye na-adịghị ngwa ikwu okwu, na-adịghịkwa ngwa iwe iwe.” (Jemes 1:19) Akwụkwọ Nsọ na-enyekwa ndụmọdụ a magburu onwe ya n’ihe metụtara ịhọrọ ndị enyi: “Na-ejeso ndị maara ihe, ị ga-amakwa ihe: ma enyi ndị nzuzu ka a ga-emejọ.” (Ilu 13:20) Ihe atụ ndị a na-egosi amamihe dịịrị ndị ahụ ji nghọta na-agụ Bible ma na-etinye ihe ọ na-ekwu n’ọrụ ná ndụ ha na-adị kwa ụbọchị.