Ị̀ Bụ “Ọgaranya n’Ebe Chineke Nọ”?

N’IME ọtụtụ ihe atụ ndị Jizọs Kraịst ji mee ihe, bụ́ ndị na-akpali mmadụ iche echiche, e nwere nke bụ́ banyere otu ọgaranya nke nwere ala. Iji kwadebe maka ọdịnihu, nwoke ahụ mere atụmatụ iwu ebe nkwakọba ihe nke ka nke o nweburu enwe. Ma, n’ihe atụ Jizọs ahụ, a kpọrọ nwoke ahụ “onye na-enweghị ezi uche.” (Luk 12:16-21) Ọbụna nsụgharị Bible ụfọdụ kpọrọ ya “onye iberibe.” Gịnị mere e ji jiri okwu dị njọ otú a kọwaa nwoke ahụ?

Ihe àmà na-egosi na ọgaranya a echetaghị Chineke mgbe ọ na-eme atụmatụ ya; o nyeghịkwa Chineke ekele maka ala ya nke mepụtara ihe. (Matiu 5:45) Kama nke ahụ, o turu ọnụ, sị: “Mkpụrụ obi, i nwere ọtụtụ ezi ihe a kpakọbara maka ọtụtụ afọ; tụsara ahụ́, rie ihe, ṅụọ ihe ọṅụṅụ, mee onwe gị obi ụtọ.” O chere nnọọ na ihe ọ rụpụtara ga-abụrụ ya “mgbidi dị elu.”—Ilu 18:11.

Mgbe Jems onye na-eso ụzọ na-adọ aka ná ntị megide mmụọ mpako dị otú ahụ, o dere, sị: “Ugbu a, bịanụ, unu ndị na-asị: ‘Taa ma ọ bụ echi anyị ga-eje obodo a, nọọkwa otu afọ n’ebe ahụ, anyị ga-azụkwa ahịa, ritekwa uru,’ ma unu amaghị ihe ndụ unu ga-abụ echi. N’ihi na unu bụ alụlụ nke na-apụta ruo nwa oge ma na-apụkwa n’anya.”—Jems 4:13, 14.

Dị nnọọ ka ihe Jems kwuru si dị, a gwara ọgaranya ahụ e kwuru okwu ya n’ihe atụ ahụ Jizọs ji mee ihe, sị: “Onye na-enweghị ezi uche, n’abalị a ka ha na-achọ mkpụrụ obi gị n’aka gị. Ònye ga-enwezi ihe ndị ị kwakọbara?” Dị ka alụlụ nke na-apụ n’anya, nwoke ahụ bara ọgaranya ga-anwụ tupu nrọ ya emezuo. Ànyị ghọtara ihe mmụta dị n’ilu a? Jizọs kwuru, sị: “Otú ahụ ka ọ ga-adịrị onye na-akpakọbara onwe ya akụ̀ ma ghara ịbụ ọgaranya n’ebe Chineke nọ.” Ị̀ bụ “ọgaranya n’ebe Chineke nọ”?