Igbe Ajụjụ

◼ Ndị nne na nna kwesịrị inwe nlezianya dịgasị aṅaa mgbe obere ụmụaka ha na-ekere òkè n’ozi ubi?

N’ụzọ kwesịrị ekwesị ndị nne na nna bụ́ ndị Kraịst na-akpọ ụmụ ha aga ozi ubi, na-azụ ha isoro ndị ọzọ kerịta ozi ọma Alaeze ahụ. N’ime otú ahụ, ọ dị mkpa ka ha na-eleru obere ụmụaka ha anya n’ihi ihe ize ndụ ndị pụrụ ịdị n’ókèala ha, ọbụna n’ebe ndị “na-adịchaghị ize ndụ.” N’ụzọ na-arị elu a na-emeso ụmụaka ihe ike ma na-emetọ ha n’ihi mmụba nke anyaukwu na mmekọahụ rụrụ arụ nke “oge dị oké egwu” ndị a anyị bi n’ime ha. (2 Tim. 3:1-5) Ọ dị ndị nne na nna mkpa ime ihe ndị ezi uche dị na ha iji chebe ụmụaka ha pụọ n’aka ndị ga-awakpo ha. Gịnị ka a pụrụ ime?

Bible na-adụ ọdụ n’ụzọ amamihe dị na ya ka anyị na-elezi anya ma na-elepụ anya n’ihu iji hụ ihe ize ndụ. (Ilu 22:3; Mat. 10:16) Nzube ya abụghị iji tie iwu, kama ọ bụ ihe amamihe dị na ya nne ma ọ bụ nna ma ọ bụ onye ọzọ toworo eto na nwatakịrị iso mgbe a na-aga ozi ubi. Ọ bụrụ na ndị nkwusa abụọ na-eto eto ji ihe akpọrọ ihe arụkọọ ọnụ, ọ bụ ihe amamihe dị na ya ka nne ma ọ bụ nna ma ọ bụ onye ọzọ toworo eto nọrọ ebe ọ ga na-ahụ ha anya mgbe nile. Otú ọ dị, ka nwatakịrị na-emewanye okenye ma na-egosipụta na ya ji ihe akpọrọ ihe karị, nne na nna pụrụ ikpebi ma ọ chọrọ nlekọta nke nne na nna dị ala karị.—Leekwa Igbe Ajụjụ dị n’Ozi Alaeze Anyị nke October 1992.

Ọ bụkwa ihe amamihe dị na ya izere ihe ọghọm mgbe nile mgbe e ji ụgbọala na-eme njem na mgbe e ji ụkwụ na-agagharị. Ime ihe n’ezi nlezianya na-egbochikarị ihe ọghọm na ajọ ibu arọ nke ihe mgbu, mmefu ụlọ ọgwụ, na nsogbu ndị metụtara iwu bụ́ ndị pụrụ ịdapụta ma ọ bụ okwu ikpe.

O kwesịrị ekwesị ka ndị na-eto eto “too aha Jehova.” (Abụ Ọma 148:12, 13) Okwu ha ndị na-adọrọ mmasị na ezi akparamàgwà ha mgbe ha nọ n’ozi ubi na-amasị nnọọ ndị ọzọ ma na-ewetara Jehova otuto. Ndị nne na nna, jisienụ ike, nyere ụmụ unu aka ikerechi òkè anya n’ịkpọsa ozi ọma ahụ ka unu na-elezikwa anya ichebe ha pụọ n’ihe ize ndụ ọ bụla pụrụ ịdị!