Kpee Ekpere Maka Enyemaka Jehova

¹ Jisọs mere ka ịdị mkpa nke ngọzi Jehova n’ozi doo ndị na-eso ụzọ ya anya. (Mat. 9:37, 38) Ekpere anyị nke otuto na ekele si n’ala ala obi anyị tinyere arịrịọ siri ike na-egosi ndabere anyị kpam kpam n’ebe Jehova nọ maka enyemaka ya. (Fil. 4:6, 7) Akwụkwọ Nsọ na-agba anyị ume ikpe ekpere site “n’ekpere na arịrịọ nile,” nke a ga-agụnyekwa ekpere ndị anyị na-ekpe banyere ozi anyị.—Efe. 6:18.

² Anyị na-eto Jehova n’ekpere maka àgwà na ihe ndị ọ na-emezu bụ́ ndị na-enweghị atụ. Anyị na-etokwa ya dị ka Onye Nyere anyị ozi ọma anyị na-ekwusa. O kwesịrị ka anyị too ya n’ihi na ọ bụ nanị ya na-eme ka ozi anyị gaa nke ọma.—Abụ Ọma 127:1.

³ Ekpere anyị nke inye ekele na-egosipụta ekele maka nghọta Jehova nyeworo anyị banyere uche na nzube ya. Ọ́ bụghị ihe ùgwù iso ndị ọzọ na-ekerịta eziokwu nke Alaeze ahụ? Anyị na-ekele Jehova maka ihe nile anyị na-arụzu n’ozi.—Abụ Ọma 107:8; Efe. 5:20.

⁴ N’ụzọ kwesịrị nnọọ ekwesị, anyị na-arịọ Jehova maka enyemaka n’ichọta ndị ga-anakwere ka anyị duziere ha ọmụmụ Bible, anyị na-arịọkwa maka enyemaka iji mee ka eziokwu ahụ baa n’obi ha. Site n’ịrịọ arịrịọ ndị dị otú ahụ, anyị na-egosi na ọ bụ nanị Chineke pụrụ ime ka ọrụ anyị na-arụ n’ozi na-arụpụta ihe.—1 Kọr. 3:5-7.

⁵ Otu nwanna nwanyị chere na otu nwanyị nọ n’ụzọ magazin ya adịghị agụ Ụlọ Nche na Teta! N’achọghị ka magazin ndị a dị oké ọnụ ahịa laa n’iyi, ọ rịọrọ Jehova na ọ bụrụ na nwanyị ahụ adịghị agụ ha, ya jụ ha. Mgbe nwanna nwanyị ahụ letara ya n’oge ọzọ, di nwanyị ahụ kwuru, sị: “I meela maka ịdị na-eweta magazin ndị a mgbe nile. Ana m agụ ha, enwekwara m nnọọ mmasị na ha.”

⁶ Site n’arịrịọ siri ike nke e ji obi umeala rịọ, anyị pụrụ ịrịọsi Jehova ike ka o nyere anyị aka ịnagide enweghị mmasị na ịkwa emo ọha na eze ma merie egwu ọ bụla nke mmadụ iji nọgide jiri nkwuwa okwu na-agbara ndị ọzọ àmà. (Ọrụ 4:31) Ọ bụrụ na anyị anọgide na-ekpe ekpere site “n’ekpere na arịrịọ nile” ka anyị ji nrubeisi na-eje ozi anyị dị nsọ, anyị pụrụ inwe obi ike na Jehova ga-enyere anyị aka.—1 Jọn 3:22.