Kwanyere Aha Ọma Jehova Ùgwù nke Ukwuu
1 Setan kwutọrọ aha Chineke mgbe ọ rabanyere nne na nna mbụ anyị ná mmehie. Ekwensu nyere echiche na Jehova ghaara Adam ụgha. (Jen. 3:1-5) Ebe e jikọtara aha Chineke na ikike o nwere imezu okwu ya, ebubo Setan bụ nkwutọ kasị njọ. Site n’iji ụzọ na-aga n’ihu n’ihu na-emezu nzube ya, Jehova ewepụwo aha ya ná nkọcha ma mee ka ọ dị mma.—Aịsa. 63:12-14.
2 Anyị bụ ndị Jehova ‘gụrụ aha ya.’ (Ọrụ 15:14, 17) Nke a na-enye anyị ohere igosipụta mmetụta anyị nwere banyere ido ya nsọ. Anyị na-ahụ aha Jehova dị ka ihe dị mma n’ezie, n’ihi na ọ na-anọchite anya ihe nile dị mma, nwere obiọma, nwere ịhụnanya, dị obi ebere, na ihe nile nwere ezi omume. Anyị na-atụ ụjọ dị ukwuu n’ihi ịdị ukwu nke aha Chineke dị ebube. (Abụ Ọma 8:1; 99:3; 148:13) Gịnị ka e kwesịrị ịkpali anyị ime?
3 Doo Aha Chineke Nsọ: A pụghị ime ka aha Chineke dị nsọ karịa otú ọ dịrịla. Ma site n’omume anyị dị ọcha na nkwusa Alaeze anyị, anyị pụrụ igosipụta na anyị na-akwanyere aha Chineke ùgwù kasịnụ. Ka anyị tie, sị: “Keleenụ Jehova, kpọkuonụ aha Ya, meenụ ka a mara omume Ya nile n’etiti ndị nile dị iche iche, hotanụ na e mewo ka aha Ya dị elu.” (Aịsa. 12:4) Olee otú anyị pụrụ isi mee nke a?
4 Anyị pụrụ iji ohere nile dapụtaranụ kpọsaa aha Jehova na ihe nile ọ na-anọchite anya ha. Ọrụ nkwusa anyị na-enye Jehova nsọpụrụ, ma ọ̀ bụ nke a haziri ahazi ma ọ bụ nke mberede, site n’ụlọ ruo n’ụlọ ma ọ bụ site n’ụlọ ahịa ruo n’ụlọ ahịa, n’okporo ámá ma ọ bụ na telifon. Mgbe anyị hụrụ ndị nwere mmasị na-ege ntị, anyị kwesịrị iyi agba a kapịrị ọnụ iji gaghachi ma kụzikwuoro ha banyere Jehova. Nke ahụ pụtara na anyị aghaghị imezu ihe anyị yiri n’agba ma nọgidesie ike ná mgbalị anyị na-eme ịmalite ọmụmụ Bible ebe obibi. Dị ka ihe obi ụtọ, kwa afọ ọtụtụ narị puku mmadụ na-amata, na-asọpụrụ, ma na-edo aha ọma Jehova nsọ.
5 Anyị iji obi anyị dum na-ekere òkè n’ọrụ nke ido aha Chineke nsọ na-egosi n’ụzọ doro anya ebe anyị kwụ n’esemokwu ahụ Setan welitere n’Iden. Nke a bụ ọrụ kasị mma ma dị nsọpụrụ anyị pụrụ ịrụ. Ka anyị kwanyere aha ọma Jehova ùgwù nke ukwuu ma jiri ịnụ ọkụ n’obi too ya!—1 Ihe 29:13.