Ahapụla Ịhụnanya ahụ I Nwere na Mbụ
1 Jizọs ahụ e mere ka ọ dị ebube dụrụ ndị nọ n’ọgbakọ dị n’Efesọs na narị afọ mbụ ọdụ, sị: “Enwere m ihe a megide gị, na ị hapụwo ịhụnanya ahụ i nwere na mbụ.” (Mkpu. 2:4) O yiri nnọọ ka ọtụtụ n’ime ha hà ahapụla ịhụnanya mbụ ha nwere n’ebe Jehova nọ. Mgbe anyị ka na-amụ eziokwu ahụ ọhụrụ, anyị malitere ịhụ Jehova na ndị agbata obi anyị n’anya nke ukwuu, nke a kpalikwara anyị iji ịnụ ọkụ n’obi na-agwa ndị mmadụ banyere olileanya ọhụrụ anyị nwere. Olee ihe ga-eme ka anyị ghara ịhapụ ịhụnanya ahụ anyị nwere na mbụ na ịnụ ọkụ n’obi anyị jibu eje ozi?
2 Inwe Ọmụmụ Ihe Onwe Onye na Ịga Nzukọ: Gịnị kpaliri anyị ịhụ Chineke na ndị agbata obi anyị n’anya mgbe anyị mụtara eziokwu ahụ ọhụrụ? Ọ́ bụghị ihe nile anyị mụtara banyere Jehova mgbe anyị na-amụ Bible kpaliri anyị ime otú ahụ? (1 Jọn 4:16, 19) N’ihi ya, ka ịhụnanya anyị “wee na-amụbawanye n’ezi ihe ọmụma na nghọta zuru ezu,” anyị ga-anọgiderịrị na-enweta ezi ihe ọmụma, ma na-enyocha “ihe ndị miri emi nke Chineke.”—Fil. 1:9-11; 1 Kọr. 2:10.
3 Ọ pụrụ isi nnọọ ike ịdị na-enwechi ọmụmụ ihe onwe onye anya n’ụbọchị ikpeazụ a jupụtara n’ọtụtụ nchekasị na ihe ndọpụ uche. (2 Tim. 3:1) Ma anyị aghaghị iwepụta oge iji na-amụ Okwu Chineke. Ịgachi ọmụmụ ihe anya dị oké mkpa karịsịa ka anyị “na-ahụ ụbọchị ahụ ka ọ na-eru nso.”—Hib. 10:24, 25.
4 Ịga Ozi Ọma: Iji ịnụ ọkụ n’obi na-ekwusa ozi ọma na-enyere anyị aka ịnọgide na-ahụ Chineke n’anya dị ka anyị hụrụ ya na mbụ. Ka anyị na-ekwusa ozi ọma, anyị ga na-echeta nkwa ndị Jehova ji ịhụnanya kwe anyị, nke a ga-emekwa ka olileanya anyị sikwuo ike, meekwa ka anyị ghara ịhapụ ịhụnanya anyị nwere na mbụ. Iji nwee ike ịkụzi eziokwu Bible, ọ dị anyị mkpa ime nnyocha iji ghọta ha nke ọma n’onwe anyị, nke a na-emekwa ka okwukwe anyị sikwuo ike.—1 Tim. 4:15, 16.
5 Jehova kwesịrị ịnara ihe nile, gụnyekwara ịhụnanya anyị. (Mkpu. 4:11) Ekwela ka ịhụnanya gị jụọ oyi. Mee ka ịhụnanya i nwere na mbụ nọgide na-esi ike site n’ịdị na-enwe ọmụmụ Bible onwe onye, site n’ịdị na-agachi ọmụmụ ihe anya, nakwa site n’ịdị na-eji ịnụ ọkụ n’obi ezi ndị ọzọ ozi ọma.—Rom 10:10.