Dịrị Akọ Mgbe Ị Nọ n’Ozi Ọma
1. Olee ihe mere o ji dị mma ka anyị dịrị akọ mgbe anyị nọ n’ozi ọma?
1 Ndị ohu Chineke na-aga ozi ọma “n’etiti ọgbọ gbagọrọ agbagọ.” Ha ‘dị ka atụrụ nọ n’etiti anụ ọhịa wolf.’ (Mat. 10:16; Fil. 2:15) E nwere ọgba aghara n’ebe dị iche iche. Ndị obi na-adịghị mma na-apụtakwa n’ìgwè na-emebisị ihe. A na-atọrọkwa ọtụtụ ndị mmadụ. Ihe ndị a na-egosi na anyị bi n’oge ndị ajọ mmadụ “na-ajọwanye njọ.” (2 Tim. 3:13) Olee otú Baịbụl ga-esi enyere anyị aka ‘ịdị akọ’ mgbe anyị nọ n’ozi ọma?—Mat. 10:16.
2. Olee ihe ndị ọ ga-abụ ha mewe ma anyị nọrọ ozi ọma, anyị ahapụ ebe ahụ gaa kwusawa ozi ọma ebe ọzọ?
2 Gosi na Ị Ma Ihe: Ilu 22:3 kwuru na onye maara ihe na-ezo onwe ya ma ọ hụ ọdachi. N’ihi ya, anya ruo gị ala. Ọgba aghara nwere ike ịmalite na mberede n’ebe ị gara ozi ọma. I nwere ike hụ ìgwè ndị uwe ojii ka ha na-agagharị ma ọ bụkwanụ hụ ebe ndị mmadụ gbakọtara. Mgbe ụfọdụ, onye ị nọ ozi ọma na nke ya nwere ike ịgwa gị na agwọ nọ n’akịrịka. Kama ichere ka ị matachaa ihe na-aganụ, chọrọ ụzọ ozugbo.—Ilu 17:14; Jọn 8:59; 1 Tesa. 4:11.
3. Olee otú Ekliziastis 4:9 ga-esi enyere anyị aka mgbe anyị nọ ozi ọma?
3 Agala Ozi Ọma Naanị Gị: Akwụkwọ Ekliziastis 4:9 kwuru, sị: “Abụọ dị mma karịa otu.” O nwere ike ịbụ na ọ dịla anya ị gawara ozi ọma naanị gị n’enweghị nsogbu. Ma, ì chere na ọ ka dị mma ime otú ahụ? N’ebe ụfọdụ, mmadụ ka nwere ike ịna-aga ozi ọma naanị ya. Ma n’ebe ndị ọzọ, ọ gaghị adị mma ka nwanna nwaanyị ma ọ bụ onye ka na-eto eto gawa ozi ọma sọọsọ ya, nke ka nke ná mgbede. Ọ ka mma ka anyị na mmadụ soro. (Ekli. 4:10, 12) Gbalịa ka ị mara ebe ndị gị na ha so gaa ozi ọma nọ. Tupu i si ebe unu nọ ozi ọma gaa ebe ọzọ, gwa ndị nke ọzọ ebe ị na-aga.
4. Olee ihe anyị ga-eme ka ọ dịrị ndị okenye mfe ilekọta ọgbakọ?
4 Ọ bụ ndị okenye ka Chineke nyere ọrụ ilekọta ọgbakọ ya. Ha ‘na-eche mkpụrụ obi anyị nche.’ (Hib. 13:17) Jehova ga-agọzi anyị ma ọ bụrụ na anyị adịrị obi umeala ma na-akwado mkpebi ndị ha na-eme. (Maị. 6:8; 1 Kọr. 10:12) Ka anyị niile jisie ike na-ekwusa ozi ọma n’ókèala anyị ma dịrị akọ mgbe anyị nọ ozi ọma.