Otú Anyị Ga-esi Na-emekwu Nke Ọma n’Ozi Ọma—Ịkụziri Ndị Anyị Na-amụrụ Baịbụl Otú Ha Ga-esi Na-amụ Ihe Nke Ọma

Ihe Mere O Ji Dị Mkpa: Ihe ga-enyere ndị anyị na-amụrụ Baịbụl aka ịghọta Okwu Chineke nke ọma, ha na Chineke adịrịkwa ná mma bụ ịmụ ihe ndị miri emi dị́ na Baịbụl. (Hib. 5:12–6:1) Onye chọrọ ịghọta Okwu Chineke nke ọma ga-agbasi mbọ ike na-amụ ihe. Ọ ga-agba mbọ chọpụta otú ihe ọ na-amụ si daba n’ihe ndị ọ mụtara n’oge gara aga nakwa uru ihe ọ na-amụ ga-abara ya. (Ilu 2:1-6) Ọ bụrụ na ndị anyị na-amụrụ Baịbụl ejiri aka ha na-eme nchọnchọ, ọ ga-adịrị ha mfe iji ihe ha gụtara n’akwụkwọ anyị zaa ndị mmadụ ajụjụ. Ha gbalịsie ike na-eme ihe ndị ha na-amụta, ha ga-enwe ike imeri ọnwụnwa ọ bụla ga-abịara ha.—Luk 6:47, 48.

Ihe Ị Ga-eme:

Kọwaara onye ị na-amụrụ ihe na ikpe ekpere tupu ya amụwa ihe bara ezigbo uru.—Jọn 14:26; 1 Kọr. 2:10.
Bido n’oge kụziwere ya na o kwesịrị ibu ụzọ mụọ ihe unu ga-amụ n’onwe ya. Gosi ya akwụkwọ gị ka ọ hụ otú i si kaa azịza ihe. Kụziekwara ya otú e si achọta azịza paragraf nke ọ bụla nakwa otú e si aka ya ihe.
Kụziere ya ka ọ na-aza ihe ọ ghọtara na paragraf nke ọ bụla. Nyekwara ya aka ka ọ ghara ịna-agụpụta naanị ihe dị n’akwụkwọ ma ọ na-aza ajụjụ.
Gbaa ya ume ka ọ na-agụ Baịbụl kwa ụbọchị. Gosi ya usoro ọgụgụ Baịbụl dị na jw.org/ig. Ọ ga-enyere ya aka. Ịgụ Baịbụl kwa ụbọchị agaghị adịchara ya mfe ná mmalite, ma ọ ga-abara ya ezigbo uru.—Ọma 1:2, 3.
Kụziere ya otú ọ ga-esi na-eji Akwụkwọ Ndịàmà Jehova Ji Eme Nchọnchọ ma ọ bụ Watchtower Library ma ọ bụkwanụ Ọ́bá Akwụkwọ Anyị NKE DỊ N’ỊNTANET eme nchọnchọ. Nyere ya aka ka ọ mụta aha ndebiri akwụkwọ dị iche iche anyị na-amụ ma anyị gaa ọmụmụ ihe.

Mee Ihe A n’Ọnwa A:

Gị na onye ị na-amụrụ Baịbụl mụchaa otu isiokwu ma ọ bụ isiokwu nta, gwa ya ka o jiri mkpụrụ okwu ole na ole gwa gị ihe ọ mụtara. Ọ bụrụ na i nweghị onye ị na-amụrụ Baịbụl, ị gụchaa amaokwu ụfọdụ na Baịbụl, ma ọ bụkwanụ ị gụchaa otu paragraf n’Ụlọ Nche, jiri mkpụrụ okwu ole na ole gwa onwe gị ihe ị ghọtara. Ime otú a ga-enyere gị aka ịna-aghọtakwu ihe ị na-agụ.