Anyị Na-ekele Chineke na Kraịst n’Ihi na Anyị Ga-emecha Nwere Onwe Anyị

Olee ihe ndị gị na ha na-alụ kwa ụbọchị? Ị̀ bụ onyeisi ezinụlọ nke na-agbalị ịrụ ọtụtụ ọrụ dịịrị ya? Ị̀ bụ nne ma ọ bụ nna naanị ya na-azụ ụmụ nke na-agbalị ịkpa afọ ya na ụmụ ya? Ị̀ bụ nwa akwụkwọ nke ndị ọgbọ ya na-achọkarị okwu n’ụlọ akwụkwọ? Ọrịa ọ̀ na-enye gị nsogbu ka ọ̀ bụ nká ka gị na ya na-alụ? Onye ọ bụla nwere nsogbu nke ji ya. Nsogbu na-ezodịrị ọtụtụ Ndị Kraịst ka mmiri. Ma, anyị ma na n’oge na-adịghị anya, anyị ga-enwere onwe anyị ná nsogbu ndị a niile.—2 Kọr. 4:16-18.

Ka ọ dị ugbu a, obi na-adịtụ anyị mma n’ihi na anyị ma na Jehova ghọtara ihe anyị na ya na-alụ, obi dịkwa ya ụtọ maka otú anyị si atachi obi ma na-erubere ya isi. Ọ ga-agọzikwa anyị n’ụzọ na-enweghị atụ n’ọdịnihu. (Jere. 29:11, 12) Jizọs hụkwara anyị n’anya. Ka anyị na-arụ ọrụ o nyere anyị, ọ sị na ọ ‘ga-anọnyere anyị.’ (Mat. 28:20) Ọ bụrụ na anyị echee banyere otú ihe ga-adị mgbe anyị ga-enwere onwe anyị n’Alaeze Chineke, ọ ga-eme ka olileanya anyị sie ike, anyị ekpebisiekwa ike ịna-atachi obi n’agbanyeghị nsogbu anyị na-enwe ugbu a.—Rom 8:19-21.

LEENỤ VIDIO BỤ́ LEGIDE JIZỌS ANYA KA OKÉ MKPAGBU AHỤ NA-ERU NSO—IHE ỌMA NDỊ ALAEZE CHINEKE GA-EMERE ANYỊ, ZAAKWANỤ AJỤJỤ NDỊ A:

• Olee otú e si kewapụ ụmụ mmadụ n’ebe Chineke nọ, oleekwa ihe ọ kpataara anyị?

• Olee ihe ọma ga-emere ndị na-erubere Jehova isi n’ọdịnihu?

• Gịnị mere ihe ọma ndị a ga-eji nwee isi?

• Olee ihe ọma ndị ị na-atụ anya ha Jehova ga-emere anyị n’ụwa ọhụrụ?