Bịa, Nụrụ Ozi nke Ezi Olileanya

Ị GA-ANỤ ozi dị otú ahụ n’okwu ihu ọha bụ́ “Ime Ihe Nile Ka Ha Dị Ọhụrụ—Dị Ka E Buru n’Amụma,” bụ́ nke a ga-ekwu ná Mgbakọ Distrikti “Okwu Amụma nke Chineke” nke Ndịàmà Jehova n’afọ a. Ọtụtụ ndị nwere olileanya na afọ 2000 ga-ewetara ihe a kpọrọ mmadụ ngozi.

“Narị afọ iri ahụ pụtara na anyị pụrụ inwere onwe anyị pụọ na narị afọ nke dị nnọọ njọ,” ka otu prọfesọ nke mahadum kwuru. Ọ bụkwa ezie na “afọ 2000 pụrụ nanị ịbụ afọ ọzọ dị na kalenda,” ka magazin bụ́ Maclean’s kwuru, “ya na mmalite ọnọdụ ọhụrụ n’ezie pụrụ ịdabakọta.” Otú ọ dị, ahụmahụ na-egosi na nke a eyighị ihe ga-eme eme.

Mgbalị mmadụ iji weta “mmalite ọnọdụ ọhụrụ” akụwo afọ n’ala mgbe nile. N’ihi gịnịzi ka anyị ga-eji kwenye ná nkwa Chineke e kwere eri ihe karịrị afọ 1,900 gara aga, “Lee, ana m eme ihe nile ka ha dị ọhụrụ”? (Mkpughe 21:5) A ga-ekwu ihe ndị na-emesi obi ike mere a ga-eji kwenye na ya n’okwu ihu ọha a na-enye obi ụtọ. Ị pụrụ ige ya n’ebe dị gị nso, n’ihi na malite n’ọnwa a, a ga-ekwu ya n’ihe karịrị otu narị mgbakọ ná mba a nile.

Kpọtụrụ Ndịàmà Jehova nọ n’ógbè gị, ma ọ bụ degara ndị bipụtara magazin a akwụkwọ maka ebe kasị gị nso a ga-enwe mgbakọ ahụ. Mbipụta May 1, 1999, nke magazin anyị a na-ebipụtakọ ya na nke a, bụ́ Ụlọ Nche, depụtara ebe nile a ga-enwe mgbakọ na Nigeria.