Ihe Ize Ndụ nke Ịrịọ Maka Mbupụtụ

SITE N’AKA ONYE NTA AKỤKỌ TETA! N’AUSTRALIA

Otu ụbọchị anyanwụ na-achasi ike na 1990, onye Britain bu akpa ndị njem n’azụ, bụ́ Paul Onions dị afọ 24 rịọrọ ka e bupụtụ ya n’Ụzọ Awara Awara Hume, n’ebe ndịda Sydney, Australia. Paul nwere obi ekele mgbe onye ọ na-amaghị kwụsịrị iburu ya. Ọ maghị na ikwe ka o buru ya gaara nnọọ abụrụ ya ọnwụ.a

N’AMAGHỊ ihe ize ndụ dị na ya, Paul nọdụrụ n’oche ihu nke ụgbọala ahụ ma soro onye na-anya ya na-akpa nkata. N’ime minit ole na ole, onye ahụ na-anya ụgbọala bụ́ onye yiri ka o meere ya ihe ọma malitere sesawa ya okwu ma rụsịwa ya ụka. Mgbe ahụ, na mberede onye na-anya ụgbọala ahụ kwụsịrị n’akụkụ ụzọ, na-ekwu na ya chọrọ iwere tepụ egwú n’okpuru oche. O wepụtara, ọ bụghị tepụ, kama égbè—bụ́ nke ọ tụdoro Paul n’obi.

N’aṅaghị ntị n’iwu onye na-anya ụgbọala ahụ nyere ya ka ọ ghara ibili ọtọ, Paul dọpụrụ belt oche ya ngwa ngwa, mapụta n’ụgbọala ahụ, ma jiri ike ya nile gbara ọsọ na-aga n’okporo ụzọ awara awara ahụ. Onye ahụ na-anya ụgbọala jiri ụkwụ chụwa ya, ka ndị ọzọ na-anya ụgbọala na-ahụ ha. N’ikpeazụ ọ chụkwutere ya, jide ya n’ụwe polo ya, dọtuo ya n’ala. N’ịdọgapụ onwe ya, Paul gbaara ọsọ gawa n’ihu ụgbọala na-abịa abịa, nke mere ka onye na-anya ya ụjọ jidere, bụ́ nne bu ụmụ ya, kwụsị. Mgbe Paul rịọrọ ya arịrịọ, nne ahụ kweere ka ọ bata, o wee tinye isi n’ahịrị ụzọ nke ọzọ ma jiri oké ọsọ gbara gawa. Ọ bụ nanị n’ikpeazụ ka a matara onye ahụ wakporo Paul dị ka onye na-egbu ndị mmadụ otu otu nke gburu ndị njem asaa bu akpa n’azụ, bụ́ ndị ụfọdụ n’ime ha dị mmadụ abụọ mgbe ha na-arịọ maka mbupụtụ.

Gịnị mere ndị a ji bụrụ ezigbo anụ oriri nye ogbu mmadụ ahụ? Mgbe a na-ekpe ogbu mmadụ ahụ ikpe, ọkàikpe kwuru, sị; “Nke ọ bụla n’ime ndị ahụ o gburu ka na-eto eto. Ha nọ n’agbata afọ 19 na 22. Nke ọ bụla gara ebe dị anya site n’ụlọ ha, nke na-egosi na a garaghị achọ ha achọ ruo ogologo oge ma ọ bụrụ na ihe ọ bụla emee ha.”

Nnwere Onwe Ịgagharị Agagharị

Ọtụtụ ndị taa na-emeli njem gaa mba ọzọ karịa ka ọ dị nanị n’afọ ole na ole gara aga. Dị ka ihe atụ, n’ime afọ ise, ọnụ ọgụgụ ndị Australia na-aga Esia jiri okpukpu abụọ rịa elu. N’ịbụ ndị na-achọ ahụmahụ ma ọ bụ ịnwale ihe ndị ọhụrụ, ọtụtụ ndị nọ n’afọ iri na ụma na ndị ntorobịa na-eji ụgbọelu aga ebe ndị dị anya. Ọtụtụ n’ime ndị a na-eme njem na-eme atụmatụ ịrịọ maka mbupụtụ iji ghara imefu nnukwu ego. N’ụzọ dị mwute, n’ọtụtụ ebe n’ụwa, ịrịọ maka mbupụtụ abụkwaghị ụzọ isi eme njem nke na-adọrọ mmasị nakwa nke na-adịchaghị ize ndụ ọ bụbu—nye ndị ahụ na-arịọ ka e bupụtụ ha ma ọ bụ nye ndị na-eburu ha.

A pụghị nnọọ iji mmasị na mkpali maka ime njem dochie anya ezi amamihe. “Inwe oké mmasị n’ime njem na-emekarị ka ndị na-eto eto mewe njem n’adịchaghị njikere maka njem ahụ nakwa n’aghọtachaghị ihe ize ndụ ma ọ bụ ibu ọrụ ndị ha nwere na ya,” ka otu akwụkwọ e dere maka ezinụlọ ndị na-achọ ụmụ ha furu efu na-ekwu.

Akwụkwọ ahụ na-agbakwụnye, sị: “Ndị na-eso ìgwè a haziri ahazi, bụ́ ndị nwere nzube ime njem, ma ọ bụ ndị na-aga n’ụzọ ndị e mere ezi atụmatụ isi gaa adịghị efukebe. Ma ọ bụ n’Australia ma ọ bụ ná mba ọzọ, ihe ka n’ọtụtụ ndị a na-emesị were na ha efuola, yiri ka hà bụ ndị na-anyara akpa pụọ n’adịghị njikere imefu nnukwu ego.”

Ma mmadụ ọ̀ rịọrọ maka mbupụtụ ma ọ bụ na ọ rịọghị, ịga ebe ndị a na-emeghị atụmatụ ha—ọ bụ ezie na ọ na-amasị ụfọdụ ndị chọrọ inwere onwe ha—pụrụ ime ka mmadụ bụrụkwuo onye ihe ọjọọ pụrụ ime. Mgbe ndị ikwu na ndị enyi na-amaghị ebe onye njem nọ, ha agaghị enwe ike inyere ya aka n’ụzọ dị ukwuu ma ọ daba n’ọnọdụ chọrọ ime ihe ngwa ngwa. Dị ka ihe atụ, gịnị ma ọ bụrụ na e buga onye njem n’ụlọ ọgwụ mgbe ọ na-amaghị onwe ya, ọ dịghịkwa onye nọ n’ụlọ maara ebe ọ nọ?

Izilata Ozi

N’akwụkwọ ya bụ́ Highway to Nowhere, odeakụkọ si Britain bụ́ Richard Shears dere banyere mmadụ asaa na-arịọ maka mbupụtụ bụ́ ndị na-efu efu, ndị “kwụsịrịlarị na mberede iso ezinụlọ na ndị enyi ha ezirịta ozi.” Otú ọ dị, na mbụ ọtụtụ ezinụlọ nwere ike ghara ịma ma ndị ikwu ha hà efuola ka ọ̀ bụ nanị na ha adịghị ezitere ha ozi. Nke a pụrụ ime ka ha ghara ime ka gọọmenti mara ngwa ngwa mgbe ha na-enwetaghị ozi site n’aka ndị ahụ mere njem.

Ọtụtụ mgbe a kwụsịrị mkparịta ụka nke otu n’ime ndị ahụ na-arịọ maka mbupụtụ na ndị mụrụ ya na-enwe na telifon mgbe ego ya gwụrụ. Mgbe ha chọpụtara ihe merenụ, ndị mụrụ ya rịọrọ ezinụlọ dị iche iche ka ha nye nwa ha kaadị a na-eji akpọ òkù fon ma ọ bụ ihe ndị ọzọ ha ga-eji kpọọ ha n’ụlọ. Ọ bụ ezie na nke a nwere ike ọ garaghị azọpụta ndụ nwa agbọghọ a, ikwurịta okwu mgbe nile pụrụ inyere onye njem aka ọtụtụ mgbe izere, ma ọ bụ ma ọ dịghị ihe, ọzọ imeri ihe isi ike ndị dị nta.

Ọ pụrụ ịbụwo na ndị njem asaa ahụ nwụrụnụ, bụ́ ndị bu akpa n’azụ gụrụ akwụkwọ njem ndị na-ekwu na Australia bụ otu n’ime mba ebe ndị na-arịọ maka mbupụtụ kasị enwe nchebe n’ụwa. N’agbanyeghị nke ahụ, ịrịọ maka mbupụtụ maliteghachiri ịbụ ihe ize ndụ nye ndị mmadụ—ọbụna mgbe a dị abụọ na-eme njem, ọbụna kwa ná mba ndị “kasị dị nchebe.”

[Ihe ndị e dere n’ala ala peeji]

[Foto dị na peeji nke 25]

Ndị mụrụ ụmụ pụrụ izere nchegbu na-enweghị isi site n’inye ụmụ ha kaadị a na-eji akpọ òkù fon ma ọ bụ ihe ndị ọzọ iji kpọọ ha n’ụlọ