Ihe Ndị Kasị Mma Ụmụaka Ji Egwuri Egwu

Olee ụdị ihe ụmụaka ji egwuri egwu m kwesịrị ịzụtara nwa m? Ego ole ka o kwesịrị ifu m? Ọ bụrụ na ị bụ nne ma ọ bụ nna, ma eleghị anya ị jụwo ajụjụ ndị a ọtụtụ ugboro. Otú ọ dị, obi ga-adị gị ụtọ ịmara na ihe ndị kasị mma ụmụaka ji egwuri egwu pụrụ ịbụ ndị nke kasị dị ọnụ ala.

“Ụmụaka na-aka erite uru n’ihe ha ji aka ha eme karịa n’ihe ha na-ekiri nanị nkiri, n’ihi ya, ihe ngwuri egwu ndị dị mfe bụ́ ndị na-achọ iji nkà eme ihe dị mma karịa ụmụ obere ụgbọala ndị na-egbuke egbuke a na-etinye batrị ma ọ bụ ụmụ bebi ndị na-ekwu okwu, bụ́ ndị na-adịchaghị enye nwa gị ohere ime ihe dị ukwuu banyere ha,” ka akwụkwọ bụ́ Motivated Minds—Raising Children to Love Learning na-ekwu. Ụmụ obere ụgbọala ndị na-egbuke egbuke a na-etinye batrị ma ọ bụ ụmụ bebi ndị na-ekwu okwu pụrụ ịbụ “ihe a na-anụ ụtọ ha ná mmalite, ma ụmụaka na-akwụsịkarị inwe mmasị n’ebe ha dị ngwa ngwa, n’ihi na ha adịtụghị enye ha ohere ịchọpụta ihe ma ọ bụ ichepụta ihe.”

Dabere n’afọ ndụ nwatakịrị, ihe ngwuri egwu ndị na-akpali iji uche eme ihe na-agụnye ihe ndị dị mfe dị ka ihe ndị a na-edo ka blọkụ, mkpo ihe, akwụkwọ, ihe ndị e ji ese ihe, na ọbụna ájá na mmiri. “Obere ihe ngwuri egwu, ndị dị ka anụ ụlọ,” ka akwụkwọ ahụ bụ́ Motivated Minds na-ekwu, “ga-eme ka [nwatakịrị] nwee ohere idokọ ihe n’ìgwè n’ìgwè, ma jiri otu ihe tụnyere ọzọ, ọ ga-emekwa ka ọ zụlite nkà ịsụ asụsụ ya site n’ichepụta akụkọ.” Akwụkwọ ahụ na-atụkwa aro inye ụmụaka ngwá egwú ndị dị mfe—ma ọ bụrụ na ị dị njikere idi mkpọtụ ha na-eme—n’ihi na ha na-enye ụmụaka ohere ịchọpụta ụda ihe na otú e si rụọ ihe ahụ.

Ụmụaka nwere nkà ichepụta ihe, ha nwekwara mmasị ma n’ịmụ ihe ma n’igwuri egwu. Ya mere, gịnị ma i nyere ha aka n’akụkụ atọ nile ahụ site n’iji amamihe na-ahọrọ ihe ndị ha ji egwuri egwu.