IHE NKE 4

Kụziere Nwa Gị Ịbụ Onye A ga-atụkwasịli Obi

GỊNỊ BỤ MMADỤ ỊBỤ ONYE A GA-ATỤKWASỊLI OBI?

Ndị a ga-atụkwasịli obi na-eme ihe ha kwuru. Ha na-arụ ọrụ ọ bụla e nyere ha nke ọma, na-arụchakwa ya n’oge.

Ụmụaka nwere ike ịmụta otú ha ga-esi bụrụ ndị a ga-atụkwasịli obi n’agbanyeghị na ha ka dị ntakịrị. Otu akwụkwọ aha ya bụ Parenting Without Borders kwuru, sị: “Mgbe nwatakịrị dị ọnwa iri na ise, ọ ga na-eme ihe ọ bụla ndị mụrụ ya gwara ya mee. Ma, mgbe o ruru ọnwa iri na asatọ, ọ ga na-emezi ihe ọ bụla ọ hụrụ nne na nna ya na-eme. N’ọtụtụ ebe, ndị nne na nna na-ebido mgbe ụmụ ha dị ihe dị ka afọ ise ma ọ bụ asaa na-enye ha ọrụ ndị ha ga na-arụ n’ụlọ. Ha na-arụkwa ọrụ ndị ahụ nke ọma n’agbanyeghị na ha ka dị ntakịrị.”

GỊNỊ MERE MMADỤ ỊBỤ ONYE A GA-ATỤKWASỊLI OBI JI DỊ MKPA?

Ọtụtụ ụmụ okoro na agbọghọ ndị hapụrụ nne na nna ha gaa biri nke ha na-ejikwa ọsọ lọghachikwute nne na nna ha n’ihi nsogbu ndị ha na-enwe mgbe ha gara biri nke ha. Mgbe ụfọdụ, ihe mere ihe a ji eme bụ n’ihi na ha na-emefusị ego aghara aghara; ha amaghị otú e si eme ihe dị n’ụlọ, na otú ha ga-esi na-eme ihe ndị ọzọ ha kwesịrị ime.

N’ihi ya, ọ ga-akacha mma ka ị zụọ ụmụ gị ugbu a ka ha mụta ihe ndị ga-enyere ha aka ịbụ ndị a ga-atụkwasịli obi ma ha too. Otu akwụkwọ aha ya bụ How to Raise an Adult kwuru, sị: “Ọ gaghị adị mma ka ị na-emere ha ihe niile, ha ruzie afọ iri na asatọ, gị ahapụ ha ka ha gaa biri nke ha.”

OTÚ Ị GA-ESI AKỤZIRI NWA GỊ ỊBỤ ONYE A GA-ATỤKWASỊLI OBI

Nye ya ọrụ ọ ga na-arụ n’ụlọ.

IHE BAỊBỤL KWURU: “Uru dị n’ụdị ndọgbu n’ọrụ niile.”—Ilu 14:23.

Ụmụaka na-enwekarị mmasị iso ndị mụrụ ha na-arụ ọrụ. Ihe a kwesịrị ime ka ị na-ekenye nwa gị ọrụ ọ ga na-arụ n’ụlọ.

Ndị nne na nna ụfọdụ anaghị enwe mmasị ime ya. Ha na-eche na ụmụ ha nwere ọtụtụ ihe omume e nyere ha n’ụlọ akwụkwọ ka ha mee n’ụlọ, n’ihi ya na ọ dịghị mma inyekwa ha ọrụ ọzọ n’elu nke ahụ.

Ma, ụmụaka ndị nwere ọrụ ha na-arụ n’ụlọ na-aka eme nke ọma n’ụlọ akwụkwọ n’ihi na ọ na-eme ka ha mụta ịnara ọrụ e nyere ha ma rụchapụ ya. Akwụkwọ ahụ bụ́ Parenting Without Borders kwudịrị na “ọ bụrụ na anyị anaghị ekwe ka ụmụaka anyị soro anyị na-arụ ọrụ, ha too, ọ ga-eme ka ha na-eche na ọ dịghị mkpa ka ha soro na-arụ ọrụ . . . Ọ ga-emekwa ka ha na-atụ anya ka a na-emere ha ihe niile.”

Ihe a akwụkwọ a kwuru gosiri na ọ dị mkpa ka anyị zụọ ụmụ anyị ka ha soro na-arụ arụ, kama ịbụ naanị ndị oriri, ka ha na-enye enye, kama ịbụ naanị ndị ga na-anara anara. Ikenye ụmụaka ọrụ ha ga na-arụ n’ụlọ ga-eme ka ha ghọta na e ji ha kpọrọ ihe n’ezinụlọ, nakwa na ha nwere ọrụ ha kwesịrị ịna-arụ.

Nyere ụmụ gị aka ịghọta na ha ga-ata ahụhụ ihe ha mejọrọ.

IHE BAỊBỤL KWURU: “Nụrụ ndụmọdụ, narakwa ịdọ aka ná ntị, ka i wee mara ihe n’ọdịnihu gị.”—Ilu 19:20.

Ụmụ gị mejọọ ihe, dị ka ihe atụ, ha mebie ihe mmadụ n’amaghị ama, ekpuchila ihe ahụ ha mere. Ụmụaka kwesịrị ịta ahụhụ ihe ha mejọrọ. Ha kwesịrị ịrịọ mgbaghara maka ihe ahụ ha mebiri ma ọ bụdị kwụọ ụgwọ ya ma ọ́ dị mkpa.

Ụmụ gị ghọta na ọ bụ hanwa ga-eji isi ha buru ihe ha metara, ọ ga-enyere ha aka

ịna-ekwu eziokwu ma na-ekweta mmejọ ha
ịghara ịna-ata ndị ọzọ ụta maka ihe hanwa mejọrọ
ịghara ịna-achọ ịgọrọ isi ha ma ha mejọọ
ịna-arịọ mgbaghara mgbe ọ bụla ha kwesịrị ime otú ahụ

Ihe Anyị Mere . . .

“Malite mgbe ụmụ anyị ka dị ntakịrị, m siwe nri, ha na-abịa enyere m aka. M pịawa ákwà, ha na-abịa soro m na-apịa. M na-ehicha ụlọ, ha na-abịakwa soro m na-ehicha. Ịrụ ọrụ ndị a na-atọ ha ụtọ. Ha na-enwe obi ụtọ na mụ na ha nọ, nakwa na ha so m na-eme ihe m na-eme. Ihe a bụ otú ha si mụta ịbụ ndị a ga-atụkwasịli obi.”—Laura.

“O nwere otu ụbọchị m nyere nwa m nwoke ekwentị ka ọ kpọọ otu enyi anyị ma rịọ ya mgbaghara maka okwu na-adịghị mma ọ gwara ya. Ruo ọtụtụ afọ, ọ bụ anyịnwa na-agwa ya ka ọ rịọ onye ọ gwara okwu n’ụzọ na-adịchaghị mma mgbaghara. Ma ugbu a, ọ mụtala ịna-eji aka ya eme ya.”—Debra.