1. Ọ̀ Bụ Chineke Na-akpata Ahụhụ Anyị Na-ata?

Ihe Mere O Ji Dị Mkpa Ịmata Azịza Ya

Ọtụtụ ndị achọghị ife Chineke n’ihi na ha na-ekwu na ọ bụ ya na-akpata ahụhụ anyị na-ata.

Ihe Ị Ga-echebara Echiche

Ọtụtụ okpukpe na-esi n’otu ụzọ ma ọ bụ n’ụzọ ọzọ akụzi na ọ bụ Chineke na-akpata ahụhụ anyị na-ata. Dị ka ihe atụ, lee ihe ụfọdụ n’ime ha na-ekwu:

• Ọdachi ndị na-emere onwe ha bụ ihe Chineke ji ata ụmụ mmadụ ahụhụ.

• Ụmụaka na-anwụ n’ihi na Chineke chọkwuru ndị mmụọ ozi n’eluigwe.

• A lụwa agha, Chineke na-enyere otu mba aka ka ha merie mba nke ọzọ.

Ọ̀ ga-abụ na ihe ndị isi okpukpe na-ekwu banyere Chineke abụghị eziokwu? Ọ bụrụkwanụ na Chineke ajụla ha?

Ihe Baịbụl kwuru

Ahụhụ anyị na-ata esighị Chineke n’aka.

Ihe Baịbụl gwara anyị banyere àgwà Chineke anaghị egosi na ahụhụ anyị na-ata si ya n’aka. Dị ka ihe atụ:

“Ụzọ [Chineke] niile bụ ikpe ziri ezi. . . . Onye ezi omume na onye ziri ezi ka ọ bụ.”​—DIUTERỌNỌMI 32:4.

“Ya bụrụ Chineke ihe arụ ime ihe ọjọọ, ya bụrụ Onye Pụrụ Ime Ihe Niile ihe arụ ime ihe n’ụzọ na-ezighị ezi!”​—JOB 34:10.

“Onye Pụrụ Ime Ihe Niile adịghịkwa agbagọ ikpe.”​—JOB 34:12.

Chineke anaghị anabata okpukpe ndị na-aghagide ya ụgha.

Okpukpe niile na-etinye aka n’ịlụ agha na ime ihe ike, na ndị nke na-ekwu na Chineke na-ata anyị ahụhụ, socha n’okpukpe ndị Chineke na-anaghị anabata.

“Ọ bụ amụma ụgha ka ndị amụma na-ebu n’aha m [ya bụ, aha Chineke]. Ọ bụghị m dunyere ha, enyeghịkwa m ha iwu, agwaghịkwa m ha okwu. . .  Aghụghọ nke dị n’obi ha ka ha ji na-eburu unu amụma.”​—JEREMAYA 14:14.

Jizọs katọrọ ndị okpukpe okwu ọzọ eme ọzọ.

“Ọ bụghị onye ọ bụla nke na-asị m, ‘Onyenwe anyị, Onyenwe anyị,’ ga-aba n’alaeze eluigwe, kama ọ bụ onye na-eme uche Nna m nke nọ n’eluigwe ga-aba na ya. Ọtụtụ mmadụ ga-asị m n’ụbọchị ahụ, ‘Onyenwe anyị, Onyenwe anyị, ọ̀ bụ na anyị ebughị amụma n’aha gị, chụpụkwa ndị mmụọ ọjọọ n’aha gị, rụọkwa ọtụtụ ọrụ dị ike n’aha gị?’ Ma mgbe ahụ, m ga-ekwupụtara ha, sị: Ọ dịghị mgbe m maara unu! Sinụ n’ebe m nọ pụọ, unu ndị ọrụ mmebi iwu.”​—MATIU 7:​21-23.