Icheta Jehova na Ọkpara Ya

KA E were ya na mmadụ nyere gị otu onyinye pụrụ iche. Gịnị ka ị ga-eme?— Ihe ị ga-eme ọ̀ bụ nanị ịsị ya i meela mgbe ahụ chefuo onye ahụ nyere gị ihe ahụ kpam kpam? Ka ị̀ ga na-echeta onye ahụ, na-echetakwa ihe o meere gị?—

Jehova Chineke nyere anyị onyinye pụrụ iche. O zitere Ọkpara ya n’ụwa ka ọ nwụọ maka anyị. Ị̀ ma ihe mere Jizọs ga-eji nwụọ maka anyị?— Nke a bụ ihe dị oké mkpa nke anyị kwesịrị ịghọta.

Dị ka anyị mụrụ n’Isi nke 23, Adam mehiere mgbe o mebiri iwu zuru okè nke Chineke. Anyị ketakwara mmehie site n’aka Adam, bụ́ nna anyị nile. Ya mere, gịnị ka i chere dị anyị mkpa?— Ọ dị anyị mkpa inwe nna ọhụrụ, dị ka a pụrụ isi kwuo ya, onye biri ndụ zuru okè n’ụwa. Ònye ka i chere nwere ike ịbụrụ anyị ụdị nna ahụ?— Jizọs nwere ike ịbụ ya.

Jehova zitere Jizọs n’ụwa ka o nwee ike ịghọrọ anyị nna n’ọnọdụ Adam. Bible na-ekwu, sị: “‘Nwoke mbụ ahụ bụ́ Adam ghọrọ mkpụrụ obi dị ndụ.’ Adam ikpeazụ ghọrọ mmụọ na-enye ndụ.” Ònye bụ Adam mbụ?— Ee, ọ bụ onye ahụ Chineke ji ájá sitere n’ala kee. Ònye bụ Adam nke abụọ?— Ọ bụ Jizọs. Bible gosiri nke a mgbe o kwuru, sị: “Nwoke mbụ ahụ [bụ́ Adam] sitere n’ala, bụrụkwa onye e ji ájá uzuzu mee; nwoke nke abụọ [bụ́ Jizọs] sitere n’eluigwe.”—1 Ndị Kọrint 15:45, 47; Jenesis 2:7.

Ebe ọ bụ na Chineke si n’eluigwe were ndụ Jizọs tinye n’ime akpa nwa nke nwanyị ahụ bụ́ Meri, Jizọs eketaghị mmehie ọ bụla site n’aka Adam. Ọ bụ ya mere Jizọs ji bụrụ mmadụ zuru okè. (Luk 1:30-35) Ọ bụkwa ya mere otu mmụọ ozi ji gwa ndị ọzụzụ atụrụ n’oge a mụrụ Jizọs, sị: “A mụụrụ unu onye nzọpụta taa.” (Luk 2:11) Ma iji bụrụ Onye Nzọpụta anyị, gịnị ka ọ dị mkpa ka nwa ọhụrụ ahụ bụ́ Jizọs buru ụzọ mee?— Ọ dị mkpa ka o tolite ma ghọọ nwoke tozuru okè, dị nnọọ ka Adam. Mgbe ahụ Jizọs ga-enwe ike ịghọ ‘Adam nke abụọ.’

Jizọs, bụ́ Onye Nzọpụta anyị, ga-aghọkwa “Nna [anyị] Nke bụ́ Nna mgbe nile ebighị ebi.” A kpọkwara ya nke ahụ n’ime Bible. (Aịsaịa 9:6, 7) Ee, Jizọs ahụ zuru okè pụrụ ịghọ nna anyị n’ọnọdụ Adam, bụ́ onye ghọrọ onye na-ezughị okè mgbe o mehiere. Ya mere, anyị pụrụ ịhọrọ ‘Adam nke abụọ’ ka ọ bụrụ nna anyị. N’ezie, Jizọs n’onwe ya bụ Ọkpara Jehova Chineke.

Site n’ịbịa mara banyere Jizọs, anyị pụrụ ịnakwere ya dị ka Onye Nzọpụta anyị. Ì chetara ihe ọ dị mkpa ka a zọpụta anyị na ya?— Ee, ọ bụ site ná mmehie na ọnwụ ndị anyị ketara site n’aka Adam. A na-akpọ ndụ mmadụ zuru okè nke Jizọs chụrụ n’àjà maka anyị ihe mgbapụta. Jehova nyere ihe mgbapụta ahụ ka e wee nwee ike ịgbaghara anyị mmehie anyị.—Matiu 20:28; Ndị Rom 5:8; 6:23.

N’ezie, anyị achọghị ichefu ihe Chineke na Ọkpara ya mewooro anyị, ka ànyị chọrọ?— Jizọs gosiri ụmụazụ ya otu ụzọ pụrụ iche nke pụrụ inyere anyị aka icheta ihe o mere. Ka anyị kwuo banyere ya.

Ka e were ya na ị nọ n’ọnụ ụlọ ahụ nke dị n’elu otu ụlọ elu dị na Jeruselem. Ọ bụ n’abalị. Jizọs na ndịozi ya nọ gburugburu otu tebụl. Anụ atụrụ a hụrụ n’ọkụ, achịcha ndị dị mbadamba, na mmanya na-acha ọbara ọbara dị n’elu tebụl ahụ. Ha na-eri nri pụrụ iche. Ị̀ ma ihe kpatara ya?—

Nri a bụ iji chetara ha ihe Jehova mere ọtụtụ narị afọ tupu mgbe ahụ mgbe ndị ya, bụ́ ụmụ Izrel, bụ ndị ohu n’Ijipt. N’oge ahụ Jehova gwara ndị ya, sị: ‘Gbuonụ otu atụrụ maka ezinụlọ ọ bụla, teekwanụ ọbara ya n’awara ụzọ nke ụlọ unu.’ Ọ sịziri: ‘Baanụ n’ime ụlọ unu, riekwanụ anụ atụrụ ahụ.’

Ụmụ Izrel mere ya. N’otu abalị ahụkwa, mmụọ ozi Chineke gabigara n’ala Ijipt. N’ihe ka n’ọtụtụ ụlọ, mmụọ ozi ahụ gburu nwa e bu ụzọ mụọ. Ma mgbe mmụọ ozi ahụ hụrụ ọbara nwa atụrụ n’awara ụzọ, ọ na-agafere ụlọ ahụ. N’ụlọ ndị ahụ, ọ dịghị nwatakịrị ọ bụla nwụrụnụ. N’ihi ihe mmụọ ozi Jehova mere, egwu tụrụ Fero, bụ́ eze Ijipt. Ya mere, Fero gwara ụmụ Izrel, sị: ‘Unu nweere onwe unu ịla. Sinụ n’Ijipt pụọ!’ Mgbe o kwuru nke ahụ, ha kwakọtara ngwongwo ha nile dọkwasị ha n’azụ kamel nakwa n’azụ ịnyịnya ibu ha pụọ.

Jehova achọghị ka ndị ya chefuo otú o si mee ka ha nwere onwe ha. Ya mere, ọ sịrị: ‘Otu ugboro n’afọ, unu aghaghị iri ụdị nri a unu riri n’abalị a.’ Ha kpọrọ nri a pụrụ iche Ememe Ngabiga. Ị̀ ma ihe kpatara ya?— Ọ bụ n’ihi na mmụọ ozi Chineke “gabigara” ụlọ ndị ahụ e tere ọbara na ha.—Ọpụpụ 12:1-13, 24-27, 31.

Jizọs na ndịozi ya nọ na-eche banyere nke a mgbe ha na-eri nri Ememe Ngabiga ahụ. Mgbe e mesịrị, Jizọs mere otu ihe dị oké mkpa. Otú ọ dị, tupu o mee ya, a chụpụrụ onyeozi ahụ na-ekwesịghị ntụkwasị obi, bụ́ Judas. Jizọs wereziiri otu n’ime achịcha ndị ahụ fọdụrụ afọdụ, kpee ekpere, nyawaa ya, nye ya ndị na-eso ụzọ ya. Ọ sịrị ha: “Naranụ, rie.” Mgbe ahụ, ọ gwara ha sị: ‘Achịcha a na-anọchite anya ahụ́ m nke m ga-enye mgbe m ga-anwụ n’ihi unu.’

E mesịa, Jizọs buuru otu iko mmanya na-acha ọbara ọbara. Mgbe o kpesịrị ekpere ọzọ iji nye ekele, o bugharịrị ya n’etiti ha, sị: “Ṅụọnụ, unu nile.” Ọ sịkwara ha: ‘Mmanya a na-anọchite anya ọbara m. N’oge na-adịghị anya aga m awụpụ ọbara m iji mee ka unu nwere onwe unu pụọ ná mmehie unu. Nọgidenụ na-eme nke a iji na-echeta m.’—Matiu 26:26-28; 1 Ndị Kọrint 11:23-26.

Ị̀ rịbara àmà na Jizọs sịrị na ndị na-eso ụzọ ya kwesịrị ịnọgide na-eme nke a iji na-echeta ya?— Ha agakwaghị na-eri nri Ememe Ngabiga. Kama nke ahụ, ha ga na-eri nri a pụrụ iche otu ugboro n’afọ iji cheta Jizọs na ọnwụ ya. A na-akpọ nri a Nri Anyasị nke Onyenwe Anyị. Taa, anyị na-akpọkarị ya Ememe Ncheta. N’ihi gịnị?— N’ihi na ọ na-echetara anyị ihe Jizọs na Nna ya, bụ́ Jehova Chineke, meere anyị.

Achịcha ahụ kwesịrị ime ka anyị na-eche echiche banyere ahụ́ Jizọs. Ọ dị njikere iji ahụ́ ya ahụ chụọ àjà ka anyị wee nwee ike inweta ndụ ebighị ebi. Gịnịkwanụ maka mmanya ahụ na-acha ọbara ọbara?— Nke ahụ kwesịrị ichetara anyị uru ọbara Jizọs bara. Ọ dị oké ọnụ ahịa karịa ọbara atụrụ ahụ e ji mee ihe n’Ememe Ngabiga n’Ijipt. Ị̀ ma ihe kpatara ya?— Bible na-ekwu na ọbara Jizọs pụrụ ime ka a gbaghara anyị mmehie anyị. Mgbe a gbaghakwaara anyị mmehie anyị nile, anyị agakwaghị na-arịa ọrịa, na-aka nká, ma na-anwụ anwụ. Anyị kwesịrị ịdị na-eche echiche banyere nke a mgbe anyị na-aga Ememe Ncheta.

Ọ̀ bụ mmadụ nile kwesịrị ịta achịcha na ịṅụ mmanya ahụ n’Ememe Ncheta?— Jizọs gwara ndị na-ata achịcha ma na-aṅụ mmanya ahụ, sị: ‘Unu ga-ekere òkè n’alaeze m ma soro m nọrọ n’ocheeze n’eluigwe.’ (Luk 22:19, 20, 30) Nke a pụtara na ha ga-eje eluigwe iji soro Jizọs bụrụ eze. Ya mere, ọ bụ nanị ndị nwere olileanya nke iso Jizọs chịa n’eluigwe kwesịrị ịta achịcha na ịṅụ mmanya ahụ.

Ma ọbụna ndị na-adịghị ata achịcha ahụ ma ọ bụ na-aṅụ mmanya ahụ kwesịrị ịga Ememe Ncheta. Ị̀ ma ihe kpatara ya?— Ọ bụ n’ihi na Jizọs nyere ndụ ya n’ihi anyị kwa. Site n’ịga Ememe Ncheta, anyị na-egosi na anyị echefubeghị nke ahụ. Anyị na-echeta onyinye pụrụ iche Chineke nyere anyị.