Ozi Ọma Ahụ Ò Si n’Aka Chineke n’Eziokwu?

1. Uche ònye ka e dere na Baịbụl?

Baịbụl kwuru na ụmụ mmadụ ga-ebi n’ụwa ruo mgbe ebighị ebi. Ihe a o kwuru bụ ozi ọma. (Abụ Ọma 37:29) Baịbụl nwere akwụkwọ iri isii na isii. Chineke ji ihe dị ka iri ndị ikom anọ dee ha. Ọ bụ Mozis dere ise ndị mbụ (ya bụ, Jenesis ruo Diuterọnọmi). O dere ha n’ihe dị ka puku afọ atọ na narị ise gara aga. Jọn onyeozi dere nke ikpeazụ (ya bụ, Mkpughe), ọ karịakwala otu puku afọ na narị itoolu kemgbe o dere ya. Ma, uche ònye ka ndị dere Baịbụl dere? Chineke ji mmụọ nsọ ya gwa ha ihe ha dere. (2 Samuel 23:2) Ha dere uche ya, ọ bụghị nke hanwa. N’ihi ya, ọ bụ uche Jehova ka e dere na Baịbụl.​—Gụọ 2 Timoti 3:16; 2 Pita 1:20, 21.

Lee vidio bụ́ Uche Ònye Ka E Dere na Baịbụl?

2. Olee otú anyị si mara na Baịbụl bụ Okwu Chineke?

Baịbụl kwuo ihe ga-eme n’ọdịnihu, ọ na-emecha mee. Ọ bụ ya mere anyị ji mara na ọ bụ Okwu Chineke. O nweghị mmadụ ọ bụla ga-ekwu ihe ga-eme echi, ya emee otú ahụ o kwuru ya. (Jọshụa 23:14) Ọ bụ naanị Chineke onye Pụrụ Ime Ihe Niile nwere ike ịgwa ụmụ mmadụ ihe ga-eme echi.​—Gụọ Aịzaya 42:9; 46:10.

Baịbụl bụ akwụkwọ pụrụ iche. E bipụtala ya n’ọtụtụ narị asụsụ, kesakwaara ndị mmadụ ọtụtụ ijeri. Ọ bụ eziokwu na o teela e dere Baịbụl, ihe o kwuru na ihe ụfọdụ sayensị kwuru bụ otu. Ihe ọzọ bụ na mmadụ iri anọ ahụ dere ya ekwughị ihe megidere ihe ibe ha kwuru.a Ihe Baịbụl kwuru gbasara ịhụnanya abụghị ihe mmadụ nkịtị ga-ekwuli. Ọ bụ naanị Chineke, onye hụrụ anyị n’anya, ga-ekwuli ụdị ihe ahụ. Baịbụl nwekwara ike ịgbanwe ndị ọjọọ, ha aghọọ ndị ezigbo mmadụ. Ọ bụ ihe a niile mere ọtụtụ nde mmadụ ji kwetasie ike na Baịbụl bụ Okwu Chineke.​—Gụọ 1 Ndị Tesalonaịka 2:13.

Lee vidio bụ́ Olee Ihe Ndị Gosiri na Baịbụl Na-ekwu Eziokwu?

3. Gịnị ka Baịbụl na-ekwu?

Otu n’ime ozi ọma ndị ị ga-agụta na Baịbụl bụ na Chineke na-echere ụmụ mmadụ echiche ọma. Baịbụl gwara anyị ihe mere anyị ebighị na paradaịs ahụ Chineke tinyere nwoke mbụ na nwaanyị mbụ. O kwukwara ihe Chineke ga-eme iji hụ na e weghachiri paradaịs ahụ.​—Gụọ Mkpughe 21:4, 5.

Na Baịbụl, e dekwara iwu na ndụmọdụ ndị Chineke nyere ụmụ mmadụ. Baịbụl kọkwaara anyị otú Chineke na ụmụ mmadụ si jee. Akụkọ ndị ahụ na-eme ka anyị ghọta àgwà ụfọdụ Chineke nwere. N’ihi ya, Baịbụl nwere ike inyere gị aka ịmara onye Chineke bụ. O kwuru ihe i nwere ike ime ka gị na ya bụrụ enyi.​—Gụọ Abụ Ọma 19:7, 11; Jems 2:23; 4:8.

4. Olee otú ị ga-esi ghọta ihe e dere na Baịbụl?

Broshọ a ga-enyere gị aka ịghọta ihe ndị e kwuru na Baịbụl. Ọ ga-agwa gị amaokwu Baịbụl ndị kọwara ihe a na-ekwu. Ị gụọ ha, ‘ị ga-aghọta ihe Akwụkwọ Nsọ na-ekwu.’ Ị manụ na ọ bụ otú ahụ ka Jizọs si kụziere ndị mmadụ ihe mgbe ọ bịara n’ụwa.​—Gụọ Luk 24:27, 45.

Ozi ọma si n’aka Chineke enweghị atụ. Ma, ọ bụghị mmadụ niile ka ọ na-amasị. O nwedịrị ndị ọ na-ewe ezigbo iwe. Ma, ekwela ka nke ahụ kụda gị mmụọ. Ihe ga-eme ka i nweta ndụ ebighị ebi bụ ịmara onye Chineke bụ.​—Gụọ Jọn 17:3.