IHE ỌMỤMỤ NKE 14

Mee Ka Ihe Ndị Gbara Ọkpụrụkpụ n’Okwu Gị Doo Anya

Ndị Hibru 8:1

IHE Ị GA-EME: Nyere ndị ị na-agwa okwu aka ka ha na-aghọta ihe niile ị na-ekwu. Meekwa ka ha ghọta otú nke ọ bụla n’ihe ndị gbara ọkpụrụkpụ n’okwu gị si gbasa isiokwu gị na ihe i bu n’obi na-ekwu okwu ahụ.

OTÚ Ị GA-ESI EME YA:

Ghọta ihe mere i ji ekwu okwu gị. Chọpụta ma ihe omume gị ọ̀ bụ maka iji kụziere ndị mmadụ ihe, iji mee ka ihe doo ha anya ma ọ bụ iji kpalie ha ime ihe. Gbalịa hụ na ihe niile gbara ọkpụrụkpụ n’okwu gị ga-enyere gị aka imezu ihe i bu n’obi.

Jụgodị onwe gị: ‘Olee ajụjụ ndị na-ege m ntị nwere ike ịjụ gbasara isiokwu a, oleekwa ihe nwere ike ịna-eme ha obi abụọ? Olee otú ha nwere ike isi jụọ ajụjụ ndị ahụ?’ Hazie ihe ị ga-ekwu otú ga-adaba n’ajụjụ ndị ahụ ma ọ bụ n’ihe ahụ na-eme ha obi abụọ, ka ha nwee ike ịghọta ihe ị na-ekwu ma nabata ya.
Mee ka isiokwu ihe omume gị doo anya. Na-ekwughachi isiokwu gị n’oge niile ị na-ekwu okwu. Otú ị ga-esi eme ya bụ ikwughachi okwu ndị gbara ọkpụrụkpụ n’isiokwu gị ma ọ bụ okwu ndị yiri ha.
Mee ka isi ihe ndị dị n’okwu gị doo anya ma dị mfe nghọta. Họrọ naanị ihe ndị gbasara isiokwu gị nakwa ihe ndị ị ga-enwe ike ịkọwara ndị na-ege gị ntị nke ọma n’erighị oge. Mee ka isi ihe ndị ahụ dị ole na ole. I kwuchaa nke ọ bụla n’ime ha, gị echeretụ tupu gị ekwuo nke na-eso ya. Hụkwa na e nwere ihe jikọrọ nke ọ bụla na nke na-eso ya.

I nwere ike ikwu ihe ndị gbara ọkpụrụkpụ ná mbido okwu gị ka ndị na-ege gị ntị mara ihe ha ga-atụwa anya ha ma ọ bụkwanụ gị ekwughachi ha ná ngwụcha okwu gị ka ha nwee ike icheta ha.