Ì Nwere Ọchịchọ Maka Oge Mgbe . . .

□ ị puru ịnọ ná nchebe n’ụlọ gi—n’agbanyeghị oge ọ bụ n’ụbọchị?

□ ọ na-agaghị adị mkpa inwe ihe mkpọchi ụzọ, ihe mgbochi ígwè, ihe na-etikpo ndị ohi mkpu, ebe e si enyopụta anya iji hụ ndị bịaranụ, ogige, ndị nche, nkịta ndị e ji eche nche, na ihe ndị ọzọ a na-eme maka nchebe?

□ ị pụrụ ịkpagharị n’okporo ámá nanị gị n’enweghị ihe ize ndụ ọ bụla, ọbụna n’abalị?

□ ọgwụ ọjọọ nile na nsogbu ndị ọzọ nile na-esi na ya apụta ga-abụcha ihe mgbe ochie gara aga?

□ agha nile ga-akwụsịworị, a gaghị emepụtakwa ngwa agha ma ọ bụ kwakọba ha?

□ ị na-agaghị echegbukwa onwe gị ọzọ banyere nri, ikuku, na mmiri e metọrọ emetọ?

□ iyi ọha egwu, ịnwụde ma jichie ndị mmadụ, na iyi egwu ịtụ bọmbụ ga-abụ ihe e wepụchasịworo?

□ a ga na-echebe ihe e kere eke ndị dị n’ime ala, na-elekọtakwa ha, jirikwa ha na-eme ihe n’ụzọ amamihe maka ọdịmma nke mmadụ nile?

□ anyaukwu na ịchọ ọdịmma onwe onye na-agaghị abụkwa ihe mkpali n’etiti ihe a kpọrọ mmadụ?

□ ụmụntakịrị ga-anọgide n’amaghị ihe ọjọọ ọ bula, na-asọpụrụkwa ndị ọzọ na ihe onwunwe ha?

□ a na-agaghị adị na-emegbu ndị inyom ma ọ bụ na-emeso ha omume aka ike?

□ iwu na ụkpụrụ nile ga-abụ ihe ziri ezi, ndị a ga-ejikwa ụzọ ikpe ziri ezi tinye ha n’ọrụ maka ọdịmma nke mmadụ nile?

□ ndị ọchịchị ga-eme mkpebi ndị dabeere ná mkpa ụmụ mmadụ nwere n’ezie, ọ bụghị ndị dabeere na ndọrọ ndọrọ ọchịchị?

□ nnwere onwe na ịha nhata na-agaghị abụkwa nanị ihe a na-ekwu n’ọnụ kama ha ga-abụkwa ihe a na-eme eme?

□ ịda ogbenye na-agaghị adịkwa ọzọ, kama mmadụ nile ga-enwe ihe ọ bụla dị ha mkpa maka ahụ ike, ọdịmma, na obi ụtọ ha?

□ ụmụntakịrị ga-abụ ndị a chọrọ na ndị a na-elekọtakwa, ọ bụghị ndị a na-emekpọ ọnụ ma ọ bụ ndị a na-agbahapụ agbahapụ?

□ a ga-emerịworị ọrịa na ọnwụ, a gaghị enwekwa ajọ ihe otiti ndị na-atụ ụjọ?

□ onye ọ bụla i zutere ga-abụ onye nwere obi ọma, onye dị njikere inyere gị aka, na onye ị pụrụ ịtụkwasị obi?

□ a ga-eji ndụ nke onye ọ bụla kpọrọ ihe n’ezie, mmadụ nile ga-enwekwa ike ịchọta obi ụtọ na-adịgide adịgide?

□ okpukpe na-agaghị abụkwa ihe na-akpata nkewa, na-eduje n’anabataghị ndị ọzọ, ịkpọasị, na agha?

□ mmadụ nile ga-enwe ebe mara mma, kwesịkwa ekwesị ha ga-ebi, enweghị ebe obibi ga-abụkwa ihe mgbe ochie?

Ọ bụrụ na ị pụrụ ịza ee nye nke ọ bụla n’ime ajụjụ ndị a dị n’elu, ọ ga-amasị gị ịgụ isiokwu ndị na-esochi.