Mgbakọ “Ndị Ji Ọṅụ Enye Otuto” Ị̀ Ga-anọ Ebe Ahụ?

ỌṄỤ! Okwu ahụ ọ̀ na-ada dị ka ihe ọhụrụ, ọbụna ihe a na-amaghị ama, n’oge a jupụtara ná nsogbu? N’ezie akwụkwọ akụkọ dị iche iche adịghị enye ọtụtụ ihe mere a ga-eji enwe ọṅụ. Agha agbụrụ, agụụ gbasara ebe nile, enweghị ọrụ, mmetọ dị ize ndụ, ọgba aghara ndọrọ ndọrọ ọchịchị, mpụ—ihe ndị a abụghị ihe ndị na-emejupụta obi n’ọṅụ, hà bụ?

Ihe ka n’ọnụ ọgụgụ ndị mmadụ taa na-apụnara ihe ụtọ ọ bụla ha pụrụ inweta site ná ndụ. Ma ọ̀ bụ ọṅụ? A kọwaala ọṅụ dị ka “ọnọdụ nke obi ụtọ; obi aṅụrị.” Ọ bụghị ọtụtụ mmadụ nweworo ezi ọṅụ, mgbe ha nwekwara ya, ọ na-abụkarị nnọọ nke nwa oge.

Ma, n’ilepụ anya gaa n’oge anyị, Bible buru amụma, sị: ‘Nke a ka Onyenwe anyị Jehova ji kwuo otú a, sị, Lee, ndị ohu m ga-aṅụrị ọṅụ. Lee, ndị ohu m ga-eti mkpu ọṅụ site n’obi dị mma.’ (Aịsaịa 65:13, 14) Olee otú nke ahụ pụrụ isi mee?

Iji chọta azịza ya, anyị na-akpọ gị òkù ịga otu n’ime mgbakọ distrikti nke Ndịàmà Jehova a ga-enwe na 1995. Isiokwu nke mgbakọ ahụ bụ “Ndị Ji Ọṅụ Enye Otuto,” a dịghị anakwa ego maka ịbịa. Usoro ihe omume nke mgbakọ ụbọchị atọ ahụ ga-agụnye okwu, ihe ngosi, nkwurịta okwu, bụ́ ndị dabeere na Bible nakwa ihe ndị ọzọ. N’usoro ihe omume ahụ nile, a ga-eme ka isiokwu nke ọṅụ pụta ìhè.

Mgbakọ ndị ahụ ga-amalite na United States na June ma gaa n’ihu n’obodo ukwu dị iche iche gbaa ụwa gburugburu ruo mmalite 1996. O yikarịrị ka a ga-enwe otu ga-adị gị nso. Gịnị ma ị jụọ Ndịàmà Jehova bi n’ógbè gị? Anyị ji obi ụtọ na-akpọ gị òkù ka ị nọrọ ebe ahụ.