Ihe Ị Ga-eme Ka Ịmụ Baịbụl Na-abakwuru Gị Uru ma Na-atọkwu Gị Ụtọ

Ebe Jọshụa na-agụ Iwu Chineke; ebe mgbidi Jeriko dara, ụlọ Rehab akwụrụ; nakwa ebe Jọshụa weliri aka ya elu na-ekpe ekpere

JỌSHỤA ga-eduru ndị Izrel baa n’Ala Nkwa ahụ. Ọ ga-esiri ya ezigbo ike. Ma, Jehova mesiri ya obi ike ma gwa ya, sị: ‘Nwee obi ike, dịkwa ike. Na-erube isi n’Iwu m. Na-agụ ya ehihie na abalị, ka i wee lezie anya mee ihe niile e dere na ya. Mgbe ahụ, ị ga-eme ka ụzọ gị gaa nke ọma, ị ga-ejikwa amamihe mee ihe.’—Jọsh. 1:7, 8.

Ihe nwekwara ike isiri anyị ike ‘n’oge a dị oké egwu, nke tara akpụ.’ (2 Tim. 3:1) Ọ bụrụ na anyị chọrọ ka ụzọ anyị na-aga nke ọma otú ahụ o si gaara Jọshụa, anyị kwesịrị ịna-eme ihe Jehova gwara ya. Anyị kwesịrị ịna-agụ Baịbụl kwa ụbọchị, ma jiri ihe ndị anyị mụtara na-eme mkpebi dị mma.

Ma, ụfọdụ n’ime anyị nwere ike anyị amaghị otú e si amụ ihe, ma ọ bụkwanụ na ịmụ ihe anaghị atọ anyị ụtọ. Ma, ịmụ Baịbụl dị ezigbo mkpa. Ka ị na-agụ igbe isiokwu ya bụ “Gbalịa Mee Ihe Ndị A,” ị ga-ahụ ihe ndị ga-enyere gị aka ka ịmụ ihe bakwuoro gị uru ma na-atọkwu gị ụtọ.

Otu ọbụ abụ kwuru, sị: “Mee ka m jee ije n’ụzọ nke ihe i nyere n’iwu, n’ihi na ọ na-atọ m ụtọ.” (Ọma 119:35) Ịmụ Okwu Chineke nwekwara ike ịna-atọ gị ezigbo ụtọ. Ị ga-achọpụta ihe ndị magburu onwe ha ka ị na-amụ ya.

Ọ bụ eziokwu na o nweghị mba ị ga-edu otú ahụ Jọshụa mere, ma e nwekwara nsogbu ndị gị na ha na-alụ. N’ihi ya, na-amụ Okwu Chineke ma na-eme ihe o kwuru otú ahụ Jọshụa mere. I mee otú ahụ, ụzọ gị ga-aga nke ọma, ị ga-ejikwa amamihe na-eme ihe.

GBALỊA MEE IHE NDỊ A

Kpee ekpere tupu gị agụwa Baịbụl. Ọ bụ uche Chineke Pụrụ Ime Ihe Niile ka e dere na Baịbụl. E dekwara ya ka ọ baara gị uru. N’ihi ya, mgbe ị na-agụ Baịbụl, rịọ Jehova ka o nyere gị aka ịghọta ya, icheta ya, na ime ya eme.—Ezra 7:10.
Jụọ onwe gị ajụjụ ka ị na-agụ Baịbụl ma ọ bụ akwụkwọ ndị e ji amụ Baịbụl. Jụọ onwe gị, sị: ‘Olee ihe ebe a m na-agụ na-agwa m banyere Jehova? Olee otú o si gbasa isiokwu Baịbụl? Olee otú m nwere ike isi jiri ya nyere ndị ọzọ aka?’
Chebara ihe ị na-agụ echiche. Ị gụwa Baịbụl, kwụsịtụ ma chebara ihe ị gụrụ echiche. Jụọ onwe gị, sị: ‘Olee otú obi dị m n’ihe a m na-agụ? Gịnị mere obi ji dị m otú ahụ? Olee otú o si gbasa ihe ndị mere m n’oge gara aga, ihe na-eme m ugbu a, ma ọ bụ ihe ndị nwere ike ime n’ọdịnihu? Olee otú m ga-esi eme ihe a Baịbụl kwuru ná ndụ m?’ (Job 23:5; Ọma 49:3) Lee ma ị ga-akọwali ihe mere Jehova ji gwa ndị ya ka ha gbaara omume ụfọdụ ọsọ, ma ọ bụ nsogbu o nwere ike ịkpatara onye ahụ ị gụrụ gbasara ya ma ọ bụrụ na o mere ihe dị iche.—Diut. 32:28, 29.
Were ya na ị na-ahụ mgbe ihe ahụ ị na-agụ na Baịbụl na-eme. Dị ka ihe atụ, weregodị ya na ị na-ahụ ka ụmụnne Josef na-eresị ya ndị Ishmel. (Jen. 37:18-28) Olee ihe ị na-ahụ, na-anụ, ma na-anụ ísì ya? Were ya na ị bụ otu n’ime ha. Olee ihe ha na-eche, na otú obi dị ha? Iche echiche otú ahụ ga-eme ka ị ghọtakwuo ihe ị na-amụ.
Jiri ihe ndị e ji amụ Baịbụl nzukọ Jehova wepụtara e ji eme nchọnchọ mee ka ime nchọnchọ na-atọkwu gị ụtọ. Ọ bụrụ na e nwere ha n’asụsụ gị, mụta otú e si eji ha eme nchọnchọ, ma nke dị n’Ịntanet ma nke e biri ebi. Gwa ndị ọzọ ka ha kụziere gị otú e si eji ha eme nchọnchọ. Dị ka ihe atụ, Akwụkwọ Ndịàmà Jehova Ji Eme Nchọnchọ ga-enyere gị aka ịchọta ebe a kọwara isiokwu dị iche iche n’akwụkwọ anyị, nyekwara gị aka ịchọta ebe a kọwara ọtụtụ amaokwu Baịbụl. Akwụkwọ bụ́ Ihe Ga-enyere Gị Aka Ịghọta Baịbụl kwuru gbasara ihe ndị dị n’ụwa, otú e si gụọ oge na Baịbụl, otú e si atụ ihe, nakwa ihe ndị ọzọ. Ihe ndị a e kwuru na ya ga-abara gị uru.
Chịkọta ihe ndị dị mkpa. Ọ ga-enyere gị aka icheta ihe ndị ahụ ị mụrụ. Ihe ga-aka enyere gị aka bụ ịkọrọ ya ndị ọzọ. Ihe ndị ahụ ị mụrụ, ò nwere nke ga-enyere gị aka n’ozi ọma? Ọ bụrụ na i mee ihe ndị a, ị ga-echeta ihe ndị dị mkpa ị gụrụ, ya abaakwara ndị ọzọ uru.