Na-efe Ofufe Dị Nsọ Ehihie na Abalị

¹ E nyewo anyị ihe ùgwù pụrụ iche. Ọ bụ nke ịbụ ndịàmà nke Jehova. Anyị bụ akụkụ nke nzukọ zuru ụwa ọnụ nke ndị na-ezisa ozi ọma Jehova ji arụzu ọrụ mkpọsa Alaeze nke kasị ukwuu a rụtụworo! (Mak 13:10) N’ihi ịdị ngwa nke oge anyị, ànyị na-ekere òkè n’ọrụ a ruo n’ọ̀tụ̀tụ̀ kasịnụ kwere omume?

² Anyị amaghị ọnụ ọgụgụ ga-emesịa nakwere nkwusa anyị. Jehova na-emesi anyị obi ike na ọ ga-abụ “oké ìgwè mmadụ,” ndị e ji ‘ife ofufe dị nsọ ehihie na abalị’ mara ha nile. (Mkpu. 7:9, 15) Ihe karịrị nde Ndịàmà ise jirịị ọrụ n’aka n’ofufe Chineke abụghị nanị ndị nwere mmasị na-ege ntị, ha abụghịkwa nanị ndị na-aga nzukọ. Ha bụ ndị ọrụ na-akpọsa ozi ọma ahụ gburugburu ụwa!

³ Kwa ụbọchị, e nwere ohere ito Jehova, ma ọ̀ bụ n’ozi ubi ma ọ bụ n’ọnọdụ mberede. Chee echiche banyere oké àmà a pụrụ ịgba ma ọ bụrụ na onye ọ bụla n’ime anyị ebute ụzọ n’isoro nanị otu onye kerịta eziokwu ahụ kwa ụbọchị. Obi ekele anyị maka Jehova kwesịrị ịkpali anyị iji ịnụ ọkụ n’obi na-ekwu banyere ya.—Abụ Ọma 92:1, 2.

⁴ Nyere Ndị Ọzọ Aka Ife Ofufe: Jehova nọgidere jiri mmụba na-agọzi anyị. (Hag. 2:7) N’ime afọ ije ozi gara aga na Nigeria, e duziri nkezi nke 272,954 ọmụmụ Bible ebe obibi kwa ọnwa. Ihe mgbaru ọsọ anyị n’ịmụrụ ndị a ihe bụ inyere ha aka ịghọ ndị na-eso ụzọ Jisọs. (Mat. 28:19, 20) Ọtụtụ n’ime ha enweworị ọganihu dị mma site n’ịdị na-abịachi nzukọ anya. Ha amalitewo ịgwa ndị ha maara okwu “banyere oké ọrụ nile nke Chineke” ha mụtaworo. (Ọrụ 2:11) À pụrụ ịkpọ ha òkù ugbu a ikere òkè n’ozi ihu ọha?

⁵ N’April anyị kwesịrị itinye mgbalị pụrụ iche ịkpọ ndị ọhụrụ ruru eru òkù isonyere anyị n’ozi ubi. Onye ị na-amụrụ ihe ò gosiwo mmasị ime nke a? Ọ bụrụ otú ahụ, ò nwere iru eru ndị ahụ nke Akwụkwọ Nsọ? (Lee akwụkwọ Ozi Anyị, peji nke 97-99.) Mgbe onye ahụ ị na-amụrụ ihe nwere ọchịchọ ikere òkè n’ije ozi ubi, soro onye isi oche ndị nlekọta kparịta ọchịchọ ya, bụ́ onye ga-edokwa ka ndị okenye abụọ nyochaa okwu ahụ. Ọ bụrụ na onye ahụ a na-amụrụ ihe ruru eru ịnakwere dị ka onye nkwusa a na-emebeghị baptism, kpọọ ya ka o sonyere gị n’ubi. Ndị nlekọta ije ozi na ndị nduzi ọmụmụ akwụkwọ kwesịrị iburu n’uche karịsịa inyere ndị pụrụ iru eru aka ịmalite ime nkwusa n’April.

⁶ Ndị nne na nna pụrụ ịtụle ma ụmụ ha hà ruru eru ịghọ ndị nkwusa a na-emebeghị baptism. (Abụ Ọma 148:12, 13) Ọ bụrụ na nwa gị nwere ọchịchọ ikwupụta obi ya n’ozi Alaeze, o nweekwa àgwà ọma, ị pụrụ ịgakwu otu n’ime ndị okenye so n’òtù ije ozi iji tụlee ọnọdụ ahụ. Mgbe gị na ha na nwa gị zukọsịrị, ndị okenye abụọ ga-ekpebi ma ò ruru eru ka a gụọ ya dị ka onye nkwusa. E nwere ihe pụrụ iche na-enye ọṅụ mgbe ụmụaka sonyeere anyị n’ito Chineke!

⁷ Nanị Jehova ruru eru ịnara ofufe anyị dị nsọ. (Luk 4:8) Ka onye ọ bụla n’ime anyị jiri ihe ùgwù anyị dị ebube nke ito ya “nke ukwuu” mee ihe.—Abụ Ọma 109:30; 113:3.