Ngọzi Jehova Na-eme Anyị Ọgaranya
1 A na-ejikarị ego ole mmadụ na-enweta atụ ihe ịga nke ọma ya n’ihe ọ̀tụ̀tụ̀. Ọ bụ ya mere ọtụtụ ndị ji ele ndị nwere ego anya dị ka ndị kasị enwe obi ụtọ na afọ ojuju. Otú ọ dị, ndị na-eche na ego pụrụ ịzụta obi ụtọ na-ehie nnọọ ụzọ. (Ekli. 5:12) “Ndị na-ezube ịba ọgaranya” n’ụzọ ihe onwunwe adịghị enwe ọṅụ na-adịgide adịgide. (1 Tim. 6:9) N’ụzọ dị iche na nke ahụ, ndị ohu Jehova na-enwe ọṅụ n’ezie ma bụrụ ndị kasị baa ọgaranya n’ụwa. (Ilu 10:22; Mkpu. 2:9) N’ụzọ dị aṅaa?
2 Ihe Àmà nke Akụ̀ na Ụba Anyị: Anyị nwere amamihe ime mmụọ dị ukwuu na nghọta nke Okwu Chineke, bụ́ Bible. Site ná nzukọ elu ala ya, Jehova na-akụziri anyị ihe mgbe nile banyere onwe ya na Ọkpara ya maka abamuru anyị na-adịgide adịgide. Nghọta ziri ezi na-eme ka o kwe anyị omume ịbịaru Jehova nso na iso ya nwee mmekọrịta chiri anya. (Jes. 4:8) Ịghọta ihe dị iche n’ihe ọma na ihe ọjọọ na ịgbaso iwu Chineke na-echebe anyị pụọ n’ọrịa na n’ihe ize ndụ ụfọdụ. Anyị nwere obi ike na Jehova ga-enye anyị ihe na-akpa anyị, na-eme ka anyị nwee afọ ojuju nke Chineke na-enye na udo nke uche.—Mat. 6:33.
3 Anyị nwere udo na ịdị n’otu n’etiti òtù ụmụnna ime mmụọ anyị n’ihi na anyị na-azụlite mkpụrụ nke mmụọ Chineke. N’ịbụ ndị ihe nkekọ siri ike nke ịhụnanya mere ka anyị dị n’otu, ọ dịghị anyị mkpa mgbe ọ bụla inwe mmetụta nke ịbụ ndị Chineke ma ọ bụ ụmụnna anyị gbahapụrụ mgbe anyị na-eche ọdachi ihu.—Gal. 6:10.
4 Ndụ anyị nwere nzube n’ezie. Anyị na-ewere ya n’ihe ùgwù magburu onwe ya ikere òkè n’ikwusa ozi ọma ahụ n’ụwa nile. Nke a na-eweta ọṅụ na-adịgide adịgide ka anyị na-enyere ndị ọzọ aka ịbịa soro Chineke nwee ezi mmekọrịta ma soro anyị na-eje ozi n’ịdị n’otu n’ofufe dị ọcha. Akụ̀ dị oké ọnụ ahịa anyị nwere nke bụ́ ozi ahụ na-ewetara Jehova nsọpụrụ ma na-enye anyị afọ ojuju nke ịtụnye ụtụ n’ido aha ya nsọ. Anyị na-anọgide na-enwe echiche uche ziri ezi, na-amara na a ga-emezu olileanya anyị nwere maka ọdịnihu n’isi nso.
5 Igosi Ekele Anyị Nwere: Ka anyị nọgide mgbe nile na-enwe ekele maka ngọzi Jehova, bụ́ nke mere ka anyị bụrụ n’ezie, ndị kasị baa ọgaranya n’ụwa. (Ilu 22:4) Iwepụta oge kwa ụbọchị iji tụgharịa uche n’ihe anyị nwere, na-akpali anyị ikele Jehova maka ịhụnanya ya o ji mmesapụ aka na-egosi anyị ma nọgide na-efe ya ofufe a na-ekewaghị ekewa.