Ị̀ Chọrọ Imekwu Ihe?
1 Jisọs ji Alaeze ahụ tụnyere akụ̀ dị oké ọnụ ahịa. (Mat. 13:44-46) Ọrụ izisa ozi Alaeze ahụ bụkwa akụ̀ dị oké ọnụ ahịa. Ozi a kwesịrị iwere ọnọdụ mbụ ná ndụ anyị, ọ bụrụgodị na ikere òkè zuru ezu na ya agụnye ọ̀tụ̀tụ̀ ụfọdụ nke ịnapụ onwe onye ihe. (Mat. 6:19-21) Ị̀ chọrọ imekwu ihe n’ozi Alaeze?
2 Tụlee Ihe Ndị A Dị Oké Mkpa: Ihe ụfọdụ dị mkpa iji mụbaa òkè anyị na-ekere n’ozi ahụ: (1) ikpebisi ike itinye ihe ndị metụtara Alaeze n’ọnọdụ mbụ ná ndụ (Mat. 6:33); (2) inwe okwukwe na ịdabere n’ebe Jehova nọ (2 Kọr. 4:1, 7); (3) ịchọ enyemaka Chineke site n’ekpere e ji ezi obi na nnọgidesi ike na-ekpe (Luk 11:8-10); (4) ịnọgidesi ike ma na-eme ihe kwekọrọ n’ekpere anyị.—Jes. 2:14, 17.
3 Ụzọ Dị Iche Iche Isi Mụbaa Ozi Anyị: Anyị nile pụrụ isetịpụ ihe mgbaru ọsọ bụ́ isi nke ịdị na-etinyechi oge anya n’ozi kwa ọnwa. Ma ị̀ tụlewokwa iji ohere ọ bụla dapụtaranụ gbaa àmà mberede, na-agbalị ime ka ụzọ i si eche ihe n’ihu mmadụ ka mma, na-amụba ịdị irè nke nletaghachi gị, na-agbalịkwa iduzi ọmụmụ Bible ebe obibi ndị na-aga n’ihu? Ì nwere ike ịrụ ọrụ ọsụ ụzọ inyeaka ma ọ bụ nke oge nile ma ọ bụ ije ozi n’ebe e nwere mkpa ka ukwuu? Ọ bụrụ na ị bụ nwanna nwoke e mere baptism, ị̀ pụrụ ime mgbalị iji ruo eruo ịbụ ohu na-eje ozi ma ọ bụ okenye? (1 Tim. 3:1, 10) Ị̀ pụrụ ịmụba ozi gị site n’itinye akwụkwọ maka ije ozi Betel ma ọ bụ Ụlọ Akwụkwọ Ọzụzụ Ndị Ozi?—Luk 10:2.
4 A gbara otu nwanna nwoke na-arụ ọrụ oge nile ma na-etinyekwa oge dị ukwuu n’egwuregwu ume ka ọ bụrụ ọsụ ụzọ oge nile. Ọ malitere ịsụ ụzọ inyeaka ma hazigharịa ọnọdụ ya iji banye n’ozi oge nile. O mesịrị jee Ụlọ Akwụkwọ Ọzụzụ Ndị Ozi, bụ́ nke nyere aka kwadebe ya maka ọrụ ya ugbu a dị ka onye nlekọta sekit. O nwere nnọọ obi ụtọ na ọ nakweere agbamume ahụ e nyere ya, o jikwa n’aka na o nwere obi ụtọ ka ukwuu n’ihi mkpebi o mere imekwu ihe n’ozi Alaeze ahụ.
5 Jehova na-agọzi ndị na-ewepụta onwe ha. (Aịsa. 6:8) Ekwela ka ihe ọ bụla gbochie gị ịmụba ozi gị na inweta ọbụna afọ ojuju na ume ọhụrụ ka ukwuu n’ihi ya.