Akwụkwọ Ozi Sitere n’Alaka

Ezi Ndị Nkwusa Alaeze:

N’afọ ije ozi 2006, e guzobere ọgbakọ mbụ na-eji asụsụ ndị ogbi amụ ihe na Nigeria, ọgbakọ ahụ nwekwara ndị okenye 2, ndị ohu na-eje ozi 2, ndị nkwusa 15, na ndị ọsụ oge nile 12. Obi dị anyị ụtọ ikele ụmụnna nwoke na ụmụnna nwanyị bụ́ ndị ji ịhụnanya kwadoo ndokwa a site n’ịmụ asụsụ ndị ogbi iji nyere ndị ntị chiri aka.

Ebe ọzọ anyị nwere nnọọ ọganihu n’afọ ije ozi gara aga bụ n’akwụkwọ ndị anyị na-ebipụta. Tụkwasị na magazin Ụlọ Nche na Teta! ndị e ji eje ozi ná mba a, bụ́ ndị anyị na-ebipụta, anyị na-ebipụtazi broshuọ na traktị. N’oge gara aga, a na-esi ná mba ofesi atụbata akwụkwọ ndị a, mgbe ụfọdụkwa, ha na-akọ ụkọ ruo ogologo oge n’ihi ogologo oge ọ na-ewe iji tụbata ha. Ma, n’ihi ndokwa ọhụrụ a, anyị nwere olileanya na ọgbakọ ga na-enweta akwụkwọ ndị a ngwa ngwa ha tụrụ ọda ya.

Owuwu nke Ụlọ Nzukọ Alaeze anọgidela nnọọ na-ewetara aha Jehova otuto. N’afọ ije ozi gara aga, ná nkezi, e wuru Ụlọ Nzukọ Alaeze isii n’ime izu ọ bụla. A rụchakwara Ụlọ Mgbakọ anọ.

Otu nwanyị na-adịghị achọbu iji anya ahụ Ndịàmà Jehova n’Ebonyi Steeti, gbanwere otú o si ele Ndịàmà anya mgbe ọ hụrụ ịdị n’otu na ịhụnanya dị n’etiti ha mgbe ha na-arụ otu Ụlọ Nzukọ Alaeze ọhụrụ. Ugbu a, ọ na-abịa nzukọ nile.

Anyị na-arịọ ka unu nọgide na-arịọ maka ngọzi Jehova n’ọrụ anyị, ka anyị na-atụ anya oge ‘onye ahụ na-anọkwasị n’ịnyịnya ọcha,’ bụ́ Jizọs Kraịst, ga-etipịasị ọrụ ọjọọ nile nke Setan n’oge na-adịghị anya.—1 Jọn 3:8; Mkpu. 6:2.

Ụmụnna unu,

Alaka Ụlọ Ọrụ Nigeria