Olee Otú Ha Ga-esi Anụ?
1. Olee ihe ndị nwere ike ime ka ikwusa ozi ọma na-esi ike, oleekwa ihe mere anyị ji anọgide na-arụ ya?
1 Ka ụbọchị Jehova na-eru nso n’ike n’ike, ọ dị ezigbo mkpa ka anyị nyere ọtụtụ mmadụ aka inweta ezi ihe ọmụma banyere Chineke na nzube ya maka ụmụ mmadụ. (Jọn 17:3; 2 Pita 3:9, 10) Nke a nwere ike isi ike mgbe ụfọdụ ebe ọ bụ na ọtụtụ ndị anaghị enwe mmasị n’ozi anyị, e nwekwara ndị na-akwa anyị emo n’ihi ọrụ nkwusa anyị na-arụ. (2 Pita 3:3, 4) N’agbanyeghị ihe ndị a, anyị nwere ihe ndị mere anyị ji kwere na a ka nwere ndị nọ n’ókèala anyị ga-anabata ozi ọma ahụ ozugbo ha nụrụ ya. Olee otú ndị dị otú ahụ ga-esi anụ ma ọ́ dịghị onye ga-ekwusara ha?—Rom 10:14, 15.
2. Olee otú ihe nlereanya Pọl si agba anyị ume?
2 Idi Mmegide: Ebe ọ bụ na e nwere ndị chọrọ ịnụ ozi Alaeze ahụ, anyị ekwesịghị ịkwụsị ikwusa ozi ọma. Filipaị bụ obodo mbụ Pọl onyeozi kwusara ozi ọma na ya na Yurop. Mgbe e boro ya na Saịlas ebubo ụgha, a pịara ha abụọ ụtarị ma tụba ha n’ụlọ mkpọrọ. (Ọrụ 16:16-24) Ma, ihe ahụ e mere Pọl emeghị ka egwu jide ya, ya akwụsị ikwusa ozi ọma. Mgbe ọ gara Tesalonaịka, bụ́ obodo ọzọ o kwusara ozi na ya mgbe ọ hapụrụ Filipaị, o ‘nwere nkwuwa okwu site n’enyemaka Chineke.’ (1 Tesa. 2:2) Ihe nlereanya Pọl ọ́ naghị egosi anyị ihe mere anyị na-agaghị eji ‘daa mbà’?—Gal. 6:9.
3. Olee ihe nwere ike ime ka ụfọdụ ndị malite ige anyị ntị n’agbanyeghị na ha enwebughị mmasị?
3 Ọtụtụ ndị na-anabughị ege anyị ntị amalitela ige anyị ntị. O nwere ike ịbụ ihe isi ike ndị bịaara ha, ọrịa, ọnwụ nke onye ezinụlọ ha, ma ọ bụ akụkọ banyere ihe ọjọọ ndị na-eme n’ụwa mere ha ji malite ige anyị ntị. (1 Kọr. 7:31) Ụfọdụ ụmụaka ndị nne na nna ha na-anaghị anabata ozi ọma etoola ugbu a ma chọọ ige anyị ntị. Ọ bụrụ na anyị anọgide na-ekwusa ozi ọma, ọ ga-enye ndị dị otú ahụ ohere ‘ịkpọku aha Jehova’ tupu oge agafee.—Rom 10:13.
4. Olee ihe na-eme ka anyị nọgide na-ekwusa ozi ọma “n’akwụsịghị akwụsị”?
4 “N’akwụsịghị Akwụsị”: Ịhụnanya anyị nwere maka Chineke na ndị agbata obi anyị ga-eme ka anyị nọgide na-ekwusa ozi ọma “n’akwụsịghị akwụsị,” na-enyekwara ndị ọzọ aka ịghọ ndị na-eso ụzọ Jizọs, dị nnọọ ka ndịozi mere na narị afọ mbụ. (Ọrụ 5:42) Ọtụtụ ndị taa “na-eze ume ma na-asụ ude n’ihi ihe arụ niile” na-eme ugbu a. (Ezik. 9:4) Ndị dị otú ahụ na-enwe nnọọ olileanya na ahụ́ iru ala mgbe ha nụrụ ozi ọma ahụ! Ọ bụrụgodị na ọtụtụ ndị ekweghị ege anyị ntị, Akwụkwọ Nsọ na-eme ka obi sie anyị ike na mbọ anyị na-agba dị nnọọ Jehova mma n’obi.—Hib. 13:15, 16.