Èruru M Eru Ikwusa Ozi Ọma?
1. Gịnị mere anyị ekwesịghị iche na anyị erughị eru ikwusa ozi ọma?
1 Ọ bụrụ na e nweela mgbe ị jụrụ onwe gị ụdị ajụjụ a, ụjọ atụla gị! Ihe mere anyị ji ruo eru ịbụ ndị na-ekwusa ozi ọma abụghị n’ihi na anyị gụrụ oké akwụkwọ ma ọ bụ n’ihi na ụbụrụ anyị na-aghọ nkọ. A kpọrọ ụfọdụ ndị na-eso ụzọ Kraịst na narị afọ mbụ ndị “na-agụghị oké akwụkwọ na ndị nkịtị.” N’agbanyeghị nke ahụ, ha maara otú e si ekwusa ozi ọma nke ọma n’ihi na ha gbalịsiri ike iso ihe nlereanya Jizọs.—Ọrụ 4:13; 1 Pita 2:21.
2. Olee otú Jizọs si kụzie ihe?
2 Otú Jizọs Si Kụzie Ihe: Jizọs kụziri ihe otú doro anya ma dị mfe nghọta, ihe ndị ọ kụziri agbagwojughịkwa ndị mmadụ anya. Otú o si ajụ ajụjụ, ihe atụ ndị ọ na-enye, na otú o si amalite okwu ya na-eme ka ndị na-ege ya ntị nwee mmasị n’ihe ọ na-akụziri ha. (Mat. 6:26) O nwere ezigbo mmasị n’ebe ndị mmadụ nọ. (Mat. 14:14) Ihe ọzọkwa bụ na Jizọs ji obi ike kwuo okwu, o kwukwara ya ka onye nwere ikike n’ihi na ọ maara na ọ bụ Jehova zitere ya ma nye ya ike ịrụ ọrụ.—Luk 4:18.
3. Olee otú Jehova si enyere anyị aka n’ozi anyị?
3 Jehova Na-enyere Anyị Aka: Onye Nkụzi Ukwu anyị na-esi n’Okwu ya na nzukọ ya na-azụ anyị, ka anyị nwee ike ikwusa ozi ọma nke ọma. (Aịza. 54:13) Ebe ọ bụ na Jehova mere ka e detuo otú Jizọs si kụzie ihe, anyị na-agụ ya ma na-eṅomi ya. Jehova na-enye anyị mmụọ nsọ ya, ọ na-esikwa n’ọmụmụ ihe ọgbakọ ndị anyị na-enwe na-azụ anyị. (Jọn 14:26) Ọ na-ejikwa ndị nkwusa maara nke a na-akọ enyere anyị aka izi ihe nke ọma.
4. Gịnị mere na o nweghị ihe kwesịrị ime ka anyị chewe na anyị erughị eru izi ndị ọzọ ozi ọma?
4 Ebe ọ bụ “Chineke na-eme ka anyị ruo eru nke ọma,” o nweghị ihe ọ bụla kwesịrị ime ka anyị chewe na anyị erughị eru ikwusa ozi ọma. (2 Kọr. 3:5) Ọ bụrụ na anyị atụkwasị Jehova obi ma na-eji ihe ndị o ji ịhụnanya na-enye anyị kpọrọ ihe, anyị ‘ga-eru eru n’ụzọ zuru ezu, bụrụ ndị a kwadebere n’ụzọ zuru ezu ịrụ ezi ọrụ niile.’—2 Tim. 3:17.