‘Atụla Ụjọ’
1. Olee ụjọ ụfọdụ n’ime anyị na-atụ taa nke yiri nke Jeremaya?
1 Mgbe a gwara Jeremaya na ọ ga-abụ onye amụma, ọ dị ya ka ya erughị eru ịrụ ọrụ ahụ. Ma Jehova mere ka obi sie ya ike. Ọ gwara ya, sị: ‘Atụla ụjọ.’ O jikwa obiọma gbaa ya ume ịrụ ọrụ ahụ. (Jere. 1:6-10) N’oge anyị a, ihere ma ọ bụ ụjọ nwere ike ime ka anyị ghara ịgachi ozi ọma anya. Ụjọ na ndị mmadụ agaghị ege anyị ntị ma ọ bụ maka otú ha ga-esi ele anyị anya nwere ike ime ka anyị ghara izi ha ozi ọma mgbe ụfọdụ. Olee ihe ga-enyere anyị aka ịkwụsị ịtụ ụdị ụjọ a, oleekwa ngọzi ndị anyị ga-enweta ma anyị kwụsị ịtụ ụjọ?
2. Olee otú ịkwadebe nke ọma ga-esi nyere anyị aka ịkwụsịlata ụjọ izi ozi ọma?
2 Kwadebe Akwadebe: Ịkwadebe nke ọma ga-enyere anyị aka ịkwụsịlata ụjọ na-atụ anyị. Dị ka ihe atụ, ọ bụrụ na anyị eburu ụzọ chọpụta ihe ndị na-achọghị ige anyị ntị nwere ike ikwu, ọ ga-adịrị anyị mfe ịma ihe anyị ga-aza ha. (Ilu 15:28) Ọ́ gaghị adị mma ma unu jiri oge unu ji enwe Ofufe Ezinụlọ kwadebe otú e nwere ike isi merie nsogbu ndị a na-enwe n’ụlọ akwụkwọ nakwa n’ozi ọma?—1 Pita 3:15.
3. Olee otú ịtụkwasị Jehova obi ga-esi enyere anyị aka ịkwụsị ịtụ ụjọ?
3 Tụkwasị Jehova Obi: Ihe na-ewepụ mmadụ ụjọ n’ahụ́ bụ ịtụkwasị Chineke anyị obi. Jehova kwere nkwa na ya ga-enyere anyị aka. (Aịza. 41:10-13) Ò nwere ihe ga-eme ka obi sie mmadụ ike karịa nke a? Ihe ọzọ bụ na Jizọs mere ka obi sie anyị ike na e nwegodị ihe anyị na-atụghị anya ya merenụ, mmụọ nsọ Chineke ga-enyere anyị aka ịma ihe anyị ga-ekwu. (Mak 13:11) N’ihi ya, na-arịọ Jehova mgbe niile ka o nye gị mmụọ nsọ ya.—Luk 11:13.
4. Olee ngọzi ndị anyị ga-enwe ma anyị nọgidesie ike n’ozi ọma n’agbanyeghị nsogbu ndị anyị na-enwe?
4 Ngọzi Ndị Ị Ga-enweta: Ọ bụrụ na anyị anọgidesie ike n’ozi ọma n’agbanyeghị nsogbu ndị anyị na-enwe, obi na-akakwu anyị idi ọnwụnwa ndị ọzọ ga-abịara anyị. Anyị na-amụta inwe obi ike na ikwusa ozi ọma n’atụghị egwu, nke bụ́ àgwà ndị na-egosi na anyị jupụtara na mmụọ nsọ. (Ọrụ 4:31) Ihe ọzọkwa bụ na ọ bụrụ na Jehova enyere anyị aka ịkwụsị ịtụ ụjọ, okwukwe anyị ga-esikwu ike, obi ga-esikwukwa anyị ike na Jehova ga-eji ogwe aka ya zọpụta anyị. (Aịza. 33:2) Anyị ga-enwekwa obi ụtọ na obi iru ala n’ihi na anyị maara na anyị na-eme ihe na-atọ Nna anyị nke eluigwe ụtọ. (1 Pita 4:13, 14) N’ihi ya, ka anyị kwusaa ozi ọma Alaeze Chineke n’atụghị ụjọ, ka obi siekwa anyị ike mgbe niile na Jehova ga-enyere anyị aka!