Malite Ọrụ Ọsụ Ụzọ Oge Niile Iji Too Jehova

Ụmụ Izrel nwere ezigbo ihe mere ha ga-eji too Jehova. Ọ kpọpụtara ha n’ala Ijipt, napụtakwa ha n’aka ndị agha Fero. (Ọpụ. 15:​1, 2) Jehova akwụsịbeghị imere ndị ya ihe ọma. Olee otú anyị ga-esi gosi na obi dị anyị ụtọ maka ihe Jehova na-emere anyị?​—Ọma 116:12.

Otu ụzọ anyị ga-esi eme ya bụ ịrụ ọrụ ọsụ ụzọ inyeaka ma ọ bụ nke oge niile. Rịọ Jehova ka o mee ka ọ gụwa gị agụụ ịrụ ọrụ ọsụ ụzọ, nakwa ka o nye gị ike ị ga-eji arụ ya. (Fil. 2:13) Ụfọdụ na-eji ọrụ ọsụ ụzọ inyeaka bido. I nwere ike ịhọrọ inye awa iri atọ ma ọ bụ awa iri ise n’ọnwa Mach na Eprel, nakwa n’oge onye nlekọta sekit na-eleta ọgbakọ unu. Ị rụtụ ọrụ ọsụ ụzọ inyeaka, o nweziri ike isi otú ahụ gụwa gị agụụ ịbụ ọsụ ụzọ oge niile n’ihi na ọ na-abụ ụra tọwa ụtọ, e kwowe ya ekwowe. E nwedịrị ndị ahụ́ na-esichaghị ike, na ndị na-arụ ọrụ ọtụtụ ụbọchị n’izu, mana ha bụkwa ndị ọsụ ụzọ oge niile. (mwb16.07 8) Nke bụ́ eziokwu bụ na Jehova ruru eru ka anyị meere ya ihe ọ bụla anyị nwere ike imere ya iji too ya.​—1 Ihe 16:25.

LEENỤ VIDIO BỤ́ ỤMỤNNE NWAANYỊ ATỌ BÍ NA MONGOLIA, ZAAKWANỤ AJỤJỤ NDỊ A:

• 

  Olee nsogbu ndị ụmụnne atọ ahụ meriri iji bụrụ ndị ọsụ ụzọ oge niile?

• 

  Olee ngọzi ndị ha nwetarala?

• 

  Olee ohere ndị ọzọ ha nwetara iji jeere Jehova ozi n’ihi na ha bụ ndị ọsụ ụzọ oge niile?

• 

  Olee otú ozi oge niile ha na-eje si baara mama ha uru?