Otú Agha Si Akpa Anyị Niile Aka Ọjọọ

Agha nwere ike ịmalite na mberede n’ebe ndị e nwere udo ugbu a. O nwedịrị ike ịkpatara ndị bi n’ebe dị anya n’ebe a na-alụ ya ahụhụ maka na n’oge anyị a, ihe na-eme n’otu ebe n’ụwa na-emetụtakwa ndị bi n’ebe ọzọ n’ụwa. Ọ bụrụgodị na agha ebie, nsogbu ndị ọ kpatara na-adịte aka. Lee ụfọdụ n’ime ha:

• 

  Ụkọ nri. Ngalaba Òtù Mba Ụwa nke Na-ahụ Maka Ihe Oriri kwuru na “ihe kacha akpata agụụ bụ agha. Mmadụ asaa n’ime mmadụ iri ọ bụla agụụ na-anyụ ịkpakwụ bi n’ebe ndị a na-alụ agha.”

• 

  Mmerụ ahụ́ na ọrịa. Ndị mmadụ mata na a na-aga ịlụ agha n’ebe ha bi, obi na-ekoro ha n’elu, ha ana-echegbukwa onwe ha. Ndị nke bi n’ebe a na-alụ agha na-akacha anọ ná nsogbu. Agha nwere ike imerụ ha ahụ́ ma ọ bụ mee ka isi gharazie ịkpakọcha ha ọnụ. Ọtụtụ mgbe, ọ naghị adịrị ha mfe inweta ọgwụ ma ọ bụ ịga n’ebe a ga-agwọ ha.

• 

  Ịgba ọsọ ndụ. Ngalaba Òtù Mba Ụwa nke Na-ahụ Maka Ndị Gbara Ọsọ Ndụ kwuru na ka ọ na-erula ọnwa Septemba afọ 2023, ihe karịrị otu narị nde mmadụ na nde iri na anọ (114,000,000) agbaala ọsọ ndụ n’ụwa niile. Isi ihe kpatara ya bụ agha.

• 

  Ihe isi ike. Agha na-emekarị ka ihe siwere ndị mmadụ ike. Dị ka ihe atụ, o nwere ike ime ka ngwá ahịa rịa elu ọjị. Ndị mmadụ na-ata ahụhụ ma ndị ọchịchị were ego e kwesịrị itinye n’ihe gbasara ahụ́ ike na agụmakwụkwọ na-etinyezi n’agha. Ọ bụrụgodị na agha ebie, ego a na-emefu iji mezie ihe ndị e mebisịrị n’agha na-akarị akarị.

• 

  Imebisị ụwa. Ndị mmadụ na-ata ahụhụ ma a kpachara anya na-emebisị ihe ndị dị n’ụwa. E metọọ mmiri, ikuku, na ala, o nwere ike ịkpatara ndị mmadụ ụdị ọrịa dị iche iche ruo ogologo oge. Ọ bụrụgodị na agha ebie, ogbunigwe ndị e liri n’ala ka ga na-akpatara ndị mmadụ nsogbu.