Ajụjụ Ndị Na-agụ Akwụkwọ Anyị Na-ajụ
Onye dere Ilu 30:18, 19 kwuru na “ije nwoke na nwaanyị” ‘gbara ya gharịị.’ Gịnị ka ihe a o kwuru pụtara?
Ọtụtụ ndị na-eche ihe amaokwu Baịbụl a pụtara, ma ụfọdụ ndị ọkà mmụta Baịbụl. Ihe ebe ahụ kwuru ná Nsụgharị Ụwa Ọhụrụ bụ: “E nwere ihe atọ gbara m gharịị, ihe anọ m na-aghọtabeghị: Otú ugo si efegharị n’eluigwe, otú agwọ si arịgharị n’elu nkume, otú ụgbọ mmiri si aga n’oké osimiri, nakwa ije nwoke na nwaanyị.”—Ilu 30:18, 19.
Na mbụ, anyị ghọtara na “ije nwoke na nwaanyị” e kwuru ebe a na-akọwa ihe na-adịghị mma. Maka gịnị? Amaokwu ndị ọzọ dị n’Ilu isi 30 na-ekwu ihe ọjọọ ndị na-emekataghị sị na “o zuola.” (Ilu 30:15, 16) Amaokwu nke 20 kwukwara gbasara “nwaanyị na-akwa iko,” onye na-ekwu na e nweghị ihe ọjọọ o mere. N’ihi ya, anyị cheburu na amaokwu a na-ekwu banyere ihe ndị na-eme ihe ndị ọzọ na-agaghị amata otú o si mee. Anyị chere na otú ahụ ugo si efegharị n’eluigwe, otú agwọ si arịgharị n’elu nkume, na otú ụgbọ mmiri si aga n’oké osimiri, nwoke nwere ike ime ihe ụfọdụ n’enweghị onye ma ihe o mere. N’ihi ya, anyị chere na “ije nwoke na nwaanyị” na-ekwu gbasara ihe ọjọọ, ya bụ, otú nwa okorobịa si aghọgbu nwa agbọghọ ka ya na ya kwaa iko.
Ma, e nwere ezigbo ihe na-egosi na ebe a na-ekwu banyere ihe dị mma. Onye dere amaokwu Baịbụl a na-ekwu gbasara ihe ndị juru ya anya ma tụọ ya n’anya.
Otú e si kwuo ya n’asụsụ Hibru e ji dee Baịbụl na-egosi na amaokwu Baịbụl a na-ekwu gbasara ihe dị mma. Otu akwụkwọ na-akọwa okwu ndị e dere n’Akwụkwọ Nsọ Hibru kwuru na okwu Hibru a sụgharịrị “gbara m gharịị” n’Ilu 30:18 na-egosi ihe merenụ nke mmadụ weere ka ihe pụrụ iche na ihe na-agaghị ekwe omume ma ọ bụdị ihe tụrụ ya n’anya.
Otu ọkachamara aha ya bụ Crawford H. Toy nke na-akụzi n’otu mahadum dị n’Amerịka kwukwara na amaokwu a anaghị ekwu gbasara ihe na-adịghị mma. Ọ sịrị: “Onye dere amaokwu Baịbụl a na-agbalị ịkọwa otú ihe ndị ahụ si tụọ ya n’anya.”
N’ihi ya, e nwere ezigbo ihe mere anyị ga-eji kweta na ihe ahụ e dere n’Ilu 30:18, 19 na-ekwu banyere ihe ndị na-atụ anyị n’anya ma na-agba anyị gharịị. Ọ na-atụ anyị n’anya ma anyị hụ otú ugo si efegharị n’eluigwe, otú agwọ si arịgharị n’elu nkume, otú ụgbọ mmiri si aga n’oké osimiri, nakwa otú nwa okorobịa na nwa agbọghọbịa nwere ike isi hụwa ibe ha n’anya, mechaa biri nwewe obi ụtọ. Ọ bụkwa otú ahụ ka ọ tụrụ onye dere amaokwu a n’anya.