Gịnị Ka Baịbụl Kwuru Gbasara Idei Mmiri Na-emebisị Ihe?

N’ụwa niile, idei mmiri na-akpa ọtụtụ ndị aka ọjọọ. Lee ihe ụfọdụ ụlọ ọrụ mgbasa ozi kwuru:

N’abalị abụọ n’ọnwa Ọgọst afọ 2023, AP News kwuru, sị: ‘Nnukwu mmiri zoro n’isi obodo Chaịna n’ụbọchị ole na ole gara aga. Nke a bụ nke mbụ ụdị mmiri ahụ na-ezo kemgbe otu narị afọ na iri anọ (140). Si na Satọdee ruo na Wenezdee, mmiri zoronụ tofere ịnch iri abụọ na itoolu.’
N’abalị atọ n’ọnwa Ọgọst afọ 2023, Deutsche Welle kwuru, sị: ‘Ụbọchị Tọzdee bụ ụbọchị nke abụọ ajọ ifufe a kpọrọ Khanun butere nnukwu mmiri ozuzo na ifufe ọjọọ n’ebe ndịda Japan, gbuokwa mmadụ abụọ. A tụkwara anya na mmiri ga-ezo n’ebe bụ́ ugwu ugwu na Taịwan ga-etoru amaụkwụ abuọ.’
N’abalị iri abụọ na anọ n’ọnwa Julaị afọ 2023, BBC News kwuru, sị: ‘Ihe butere idei mmiri mere ná ngwụcha izu na Nova Skoshịa bụ nnukwu mmiri zoro ná mpaghara Kanada dị n’akụkụ Osimiri Atlantik. Ihe a bụ nke mbụ ụdị nnukwu mmiri a na-ezo ebe ahụ kemgbe afọ iri ise gara aga.’

Gịnị ka Baịbụl kwuru banyere ụdị ihe a?

Ihe na-egosi na oge a bụ “oge ikpeazụ”

Baịbụl emeela ka anyị mara na oge a anyị bi ugbu a bụ “oge ikpeazụ.” (2 Timoti 3:1) Jizọs buru amụma na n’oge anyị, anyị ga-ahụ “ihe ndị na-atụ egwu,” ma ọ bụ ihe ndị na-emenye ụjọ. (Luk 21:11) Oké okpomọkụ na oké mmiri ozuzo emeela ka otú mmiri si ezo, otú ifufe si efe na ọtụtụ ihe ndị ọzọ gbanwee.

Ihe mere anyị ga-eji nwee olileanya

Baịbụl gwara anyị na ọtụtụ ihe ndị na-emenye ụjọ bụ́ ndị na-eme n’ụwa anyị taa kwesịrị ime ka anyị nwee olileanya. Maka gịnị? Ọ bụ maka na Jizọs kwuru, sị: “Mgbe unu hụrụ ka ihe ndị a na-eme, maranụ na Alaeze Chineke dị nso.”—Luk 21:31; Matiu 24:3.

Ihe ndị na-eme ugbu a na-egosi na n’oge na-adịghị anya Alaeze Chineke ga-eme ka ihe niile e kere eke, ma mmiri, gharazie ịna-emebisị ihe.—Job 36:27, 28; Abụ Ọma 107:29.

Iji matakwuo otú Alaeze Chineke ga-esi mee ka ụwa anyị dịghachi mma, gụọ isiokwu bụ́ “Who Will Save the Earth?”