ISI NKE 08
Ị Ga-abụli Enyi Jehova
Jehova chọrọ ka ị mara ya nke ọma. Maka gịnị? O bu n’obi na ọ bụrụ na ị mata ụdị onye ọ bụ, mata otú o si emeso ndị ọzọ ihe nakwa ihe ndị ọ chọrọ imere gị, ị ga-achọ ka gị na ya bụrụ enyi. Ma, ị̀ ga-abụli enyi Chineke n’eziokwu? (Gụọ Abụ Ọma 25:14.) Olee ihe ị ga-eme ka i nwee ike bụrụ enyi ya? Baịbụl zara ajụjụ ndị a, kwuokwa ihe mere Jehova ji bụrụ enyi kacha mma mmadụ nwere ike inwe.
1. Gịnị ka Jehova na-agwa gị ka i mee?
Baịbụl sịrị: “Bịaruonụ Chineke nso, ọ ga-abịarukwa unu nso.” (Jems 4:8) Gịnị ka ihe a Baịbụl kwuru pụtara? Jehova na-agwa gị ka ị bịa bụrụ enyi ya. Ụfọdụ ndị nwere ike iche na o siri ezigbo ike mmadụ na onye ọ na-anaghị ahụ anya ịbụ enyi, ma ya fọdụkwa mmadụ na Chineke ịbụ enyi. Ma, n’Okwu Chineke, bụ́ Baịbụl, Jehova kwuru ihe niile anyị kwesịrị ịma gbasara ụdị onye ọ bụ ka anyị nwee ike ịbịaru ya nso. Ka anyị na-agụ ihe Jehova gwara anyị na Baịbụl, anyị na ya na-adịkwu ná mma n’agbanyeghị na anyị ahụtụbeghị ya.
2. Gịnị mere Jehova ji bụrụ Enyi kacha ndị enyi niile i nwere mma?
N’ime ndị niile hụrụ gị n’anya, ọ bụ Jehova kacha hụ gị n’anya. Ọ chọrọ ka ị na-enwe obi ụtọ nakwa ka ị kpọtụrụ ya mgbe ọ bụla ị chọrọ ka o nyere gị aka. I nwere ike ‘ịkọrọ ya ihe niile na-echegbu gị, n’ihi na ihe banyere gị na-emetụ ya n’obi.’ (1 Pita 5:7) Jehova nọ ya mgbe niile inyere ndị enyi ya aka, ịkasi ha obi, na ige ha ntị.—Gụọ Abụ Ọma 94:18, 19.
3. Olee ụdị ndị Jehova chọrọ ka ha na ya bụrụ enyi?
Jehova hụrụ mmadụ niile n’anya, “ma ya na onye ezi omume na-abụ ezigbo enyi.” (Ilu 3:32) Jehova chọrọ ka ndị enyi ya na-eme ihe dị ya mma ma na-agbara ihe ọ kpọrọ asị ọsọ. Ụfọdụ ndị nwere ike iche na ha agaghị emetachali ihe niile Jehova chọrọ ka anyị na-eme nakwa na ha agaghị enwe ike izere ihe niile ọ sịrị na ha dị njọ. Ma, Jehova na-eme ebere. Ọ na-anabata onye ọ bụla hụrụ ya n’anya n’eziokwu, onye na-emekwa ike ya niile ime ihe dị ya mma.—Abụ Ọma 147:11; Ọrụ Ndịozi 10:34, 35.
MỤTAKWUO IHE
Chọpụtakwuo ihe ị ga-eme ka gị na Jehova bụrụ enyi nakwa ihe mere o ji bụrụ Enyi kacha ndị enyi ọzọ niile i nwere mma.
4. Ebreham bụ enyi Jehova
Ihe Baịbụl kọrọ gbasara Ebreham (a na-akpọkwa ya Ebram) na-egosi anyị ihe mmadụ ịbụ enyi Chineke dị ka ya. Gụọnụ gbasara Ebreham na Jenesis 12:1-4. Unu gụchaa ya, unu eleba anya n’ajụjụ ndị a:
Gịnị ka Jehova gwara Ebreham ka o mee?
Olee nkwa Jehova kwere ya?
Gịnị ka Ebreham mere gbasara ihe ahụ Jehova gwara ya?
5. Ihe Jehova chọrọ ka ndị enyi ya na-eme
E nwere ihe ụfọdụ anyị na-achọ ka ndị enyi anyị na-eme.
Olee ihe ụfọdụ ị na-achọ ka ndị enyi gị na-emere gị?
Gụọnụ 1 Jọn 5:3. Unu gụchaa ya, unu eleba anya n’ajụjụ a:
Gịnị ka Jehova chọrọ ka ndị enyi ya na-eme?
Anyị chọọ ịna-erubere Jehova isi, anyị kwesịrị ịhapụ ihe na-adịghị mma anyị na-eme. Gụọnụ Aịzaya 48:17, 18. Unu gụchaa ya, unu eleba anya n’ajụjụ a:
Gịnị mere Jehova ji gwa ndị enyi ya ka ha hapụ ihe na-adịghị mma ha na-eme?
Ezigbo enyi anyị na-agwa anyị ihe ndị anyị kwesịrị ime ka anyị ghara imerụ ahụ́ nakwa ihe ndị ga-abara anyị uru. Jehova na-emekwara ndị enyi ya ụdị ihe ahụ
6. Ihe Jehova na-emere ndị enyi ya
Jehova na-enyere ndị enyi ya aka idi nsogbu dị iche iche. Kpọnyenụ VIDIO a. Unu lechaa ya, unu eleba anya n’ajụjụ a:
Olee otú Jehova si nyere nwaanyị anyị lere na vidio a aka ka obi kwụsị ịna-ajọ ya njọ?
Gụọnụ Aịzaya 41:10, 13. Unu gụchaa ya, unu eleba anya n’ajụjụ ndị a:
Gịnị ka Jehova kwere nkwa na ọ ga-emere ndị enyi ya niile?
Ì chere na Jehova ga-abụli ezigbo Enyi mmadụ? Gịnị mere i ji chee otú ahụ?
Ezigbo enyi na-enyere enyi ya aka. Jehova ga-enyekwara gị aka
7. Jehova na onye ya na ya bụ enyi ga na-akparịta ụka
Enyi na enyi na-adịkwu ná mma ma ha na-akparịta ụka. Gụọnụ Abụ Ọma 86:6, 11. Unu gụchaa ya, unu eleba anya n’ajụjụ ndị a:
Olee otú anyị nwere ike isi na-agwa Jehova okwu?
Olee otú Jehova si agwa anyị okwu?
Anyị na-agwa Jehova okwu ma anyị kpewe ekpere; yanwa na-agwa anyị okwu ma anyị gụwa Baịbụl
ỤFỌDỤ NA-ASỊ na mmadụ na Chineke emekataghị bụrụ enyi.
Olee amaokwu Baịbụl ị ga-eji gosi mmadụ na anyị na Jehova ga-abụli enyi?
NCHỊKỌTA
Jehova chọrọ ịbụ Enyi gị, ọ ga-enyekwara gị aka ka gị na ya dị ná mma.
Ajụjụ ndị e ji echeta ihe a mụrụ
Olee otú Jehova si enyere ndị enyi ya aka?
Gịnị mere Jehova ji gwa ndị enyi ya ka ha hapụ ihe na-adịghị mma ha na-eme?
Ì chere na ihe Jehova chọrọ ka ndị enyi ya na-eme karịrị akarị? Gịnị mere i ji chee otú ahụ?
IHE Ị GA-ELEBAKWU ANYA
Olee uru ịbụ enyi Chineke ga-abara gị?
“Jehova—Chineke nke Kwesịrị Ka A Mara Ya” (Ụlọ Nche, February 15, 2003)
Chọpụta otú ị ga-esi abụ enyi Chineke.
Chọpụta ihe mere otu nwaanyị ji kwuo na enyi ya na Jehova bụ zọrọ ya ndụ.
Gere ihe ụmụ okorobịa na ụmụ agbọghọbịa kwuru gbasara Jehova.