Ịmụ Baịbụl bara uru. Ma, ọ naghị adịcha mfe mgbe niile. Mgbe ụfọdụ, i nwere ike ịna-eche ma ọ̀ ga-adịkwara gị mfe ịmụrụ Baịbụl na-aga. Gịnị mere o ji bụrụ na mbọ ọ bụla ị gbara ka ị ghara ịkwụsị ịmụ Baịbụl efughị ọhịa? Gịnị ga-enyere gị aka ka ị ghara ịkwụsị ịmụ ya n’agbanyeghị na ọ dịchaghị mfe?

1. Gịnị mere ịmụ Baịbụl ji baa uru?

Baịbụl sịrị na “okwu Chineke dị ndụ ma na-akpa ike.” (Ndị Hibru 4:12) Baịbụl bara uru n’ihi na o kwuru ihe Chineke na-eche gbasara gị, kwuokwa na Chineke hụrụ gị n’anya. Baịbụl na-akụziri gị ọtụtụ ihe ma na-eme ka ndụ gị ka mma. Ọ na-emekwa ka i nwee olileanya. Nke ka nke bụ na ọ ga-enyere gị aka ka ị bụrụ enyi Jehova. Ọ bụrụ na ị na-amụ Baịbụl, ọ ga-eme ka ị na-enwekwu obi ụtọ ná ndụ.

2. Gịnị mere ịmara uru Baịbụl bara ji dị mkpa?

Eziokwu ndị dị na Baịbụl yiri akụ̀ bara ezigbo uru. Ọ bụ ya mere Baịbụl ji gwa anyị, sị: “Zụta eziokwu, erekwala ya.” (Ilu 23:23) Ọ bụrụ na anyị ana-echeta mgbe niile na eziokwu dị na Baịbụl bara uru, anyị ga-agba mbọ na-amụ ihe mgbe niile, ọ bụrụgodị na e nwere ihe ndị na-eme ka o siere anyị ike.—Gụọ Ilu 2:4, 5.

3. Olee otú Jehova ga-esi nyere gị aka ka ị ghara ịkwụsị ịmụ Baịbụl?

Ebe ọ bụ na Jehova, onye kere ihe niile na onye pụrụ ime ihe niile, bụ enyi gị, ọ chọrọ inyere gị aka ka ị mụta gbasara ya. O nwere ike ime ka ‘i nwee mmasị ime ihe, nyekwa gị ike i ji eme ya.’ (Gụọ Ndị Filipaị 2:13.) N’ihi ya, mgbe ọ bụla ọ dị gị ka ị gaghị amụli ihe ma ọ bụ na ị gaghi emeli ihe ị mụtara, o nwere ike inyere gị aka. O nwere ike inyekwu gị ume ga-enyere gị aka ịna-amụ Baịbụl n’agbanyeghị mmegide ma ọ bụ ihe ọ bụla na-eme ka o siere gị ike ịmụ ya. Na-arịọ Jehova mgbe niile n’ekpere ka o nyere gị aka ka ị ghara ịkwụsị ịmụ Baịbụl.—1 Ndị Tesalonaịka 5:17.

MỤTAKWUO IHE

4. Mee ka ọmụmụ ihe gị bụrụ ihe kacha gị mkpa

Mgbe ụfọdụ, mere nke a mere nke ọzọ nwere ike mee ka o yie ka anyị enweghịzi ohere anyị ga-eji na-amụ Baịbụl. Ma, gịnị nwere ike inyere anyị aka? Gụọnụ Ndị Filipaị 1:10. Unu gụchaa ya, unu eleba anya n’ajụjụ ndị a:

• Olee ụfọdụ ihe ndị i chere “ka mkpa” ná ndụ?

• Olee otú ị ga-esi gosi na Baịbụl ị na-amụ bụ ihe kacha gị mkpa?

1. Ọ bụrụ na ị wụnye ájá na bọket ma tinyewe okwute na ya, okwute ndị ahụ agaghị aba

2. Ma ọ bụrụ na i tinyechaa okwute ndị ahụ na bọket tupu wụnyewe ya ájá, ọ ga-afọ obere ka ájá ahụ niile banyechaa na ya. Otú ahụ ka ọ ga-adịkwa ma ọ bụrụ na ọ bụ “ihe ndị ka mkpa” ka ị na-ebu ụzọ eme ná ndụ gị. Ị ga-emecha ha, nweekwa ohere ị ga-eji eme ihe ndị ọzọ

Ịmụ Baịbụl ga-eme ka anyị mara Chineke ma na-efe ya, si otú ahụ gosi na anyị ma na ọ bụ ya kwesịrị ịna-eduzi anyị. Gụọnụ Matiu 5:3. Unu gụchaa ya, unu eleba anya n’ajụjụ a:

• Olee uru anyị ga-erite ma anyị mee ka ịmụ Baịbụl buru ihe kacha anyị mkpa?

5. Na-amụ Baịbụl ọ bụrụgodị na a na-emegide gị

VIDIO: Ndidi O Nwere Baara Ya Uru (5:22)

• Na vidio a, gịnị ka ndị enyi Francesco na mama ya mere mgbe ọ gwara ha ihe ndị ọ na-amụta na Baịbụl?

• Olee uru o ritere maka na ọ kwụsịghị ịmụ Baịbụl?

Gụọnụ 2 Timoti 2:24, 25. Unu gụchaa ya, unu eleba anya n’ajụjụ ndị a:

• Olee otú obi dị ndị ezinụlọ unu na ndị enyi gị gbasara ihe ị na-amụ?

• Olee ihe ebe a kwuru i kwesịrị ime ma e nwee onye obi na-adịghị mma maka na ị na-amụ Baịbụl? Maka gịnị?

6. Tụkwasị Jehova obi na ọ ga-enyere gị aka

VIDIO: Jehova Na-enyere Anyị Aka Ịgbanwe (3:56)

• Na vidio a, olee ihe ndị Jim kwụsịrị ime iji mee ihe dị Jehova mma?

• Gịnị masịrị gị n’akụkọ ya?

Gụọnụ Ndị Hibru 11:6. Unu gụchaa ya, unu eleba anya n’ajụjụ ndị a:

• Gịnị ka Jehova ga-emere ndị “na-achọsi ya ike,” ya bụ, ndị na-agbasi mbọ ike ka ha mata ya, na-emekwa ihe dị ya mma?

• Gịnị ka ihe a na-akụziri gị gbasara otú obi na-adị Jehova ma ọ hụ mbọ ị na-agba ịmụ Baịbụl?

NCHỊKỌTA

Ịmụ Baịbụl mgbe niile anaghị adịcha mfe, ma ịmụ ya nwere ike ime ka ị na-enwe obi ụtọ ruo mgbe ebighị ebi. Jehova ga-akwụ gị ụgwọ ma ị tụkwasị ya obi mgbe niile.

Ajụjụ ndị e ji echeta ihe a mụrụ

• Gịnị mere na i jighị eziokwu ndị dị na Baịbụl egwu egwu?

• Ebe ọ bụ na ‘ị chọpụtala ihe ndị ka mkpa,’ gịnị ka i kwesịrị ime?

• Gịnị mere i kwesịrị iji na-arịọ Jehova ka o nyere gị aka ka ị ghara ịkwụsị ịmụ Baịbụl?

IHE Ị GA-ELEBAKWU ANYA

Chọpụta ihe anọ nyeerela ọtụtụ ndị aka iji oge ha na-eme ihe bara uru.

“Otú Ị Ga-esi Jiri Oge Gị Na-eme Ihe Bara Uru” (Teta!, Febụwarị 2014)

Chọpụta otú Jehova si nyere otu nwaanyị aka mgbe di ya na-aghọtaghị ihe mere o ji kpebie ife Chineke.

Jehova Na-enye Anyị Ike Ibu Ibu Anyị (5:05)

Chọpụta uru otu nwoke ritere maka na nwunye ya tachiri obi.

M Gara Mara Ihe Eziokwu Dị Ka Ya (6:30)

Ndị mmadụ na-ekwu na Ndịàmà Jehova na-eme ka iro dịrị n’ezinụlọ. Ihe a ha na-ekwu ọ̀ bụ eziokwu?

“Ndịàmà Jehova Hà Na-etisa Ezinụlọ Ka Ha Na-eme Ka Ezinụlọ Dịrị n’Udo?” (Isiokwu gbara n’Ịntanet)

Anyị niile nwere ihe dị iche iche anyị kwesịrị ikpebi. Ọtụtụ n’ime mkpebi ndị a nwere ike ịbara anyị uru ma ọ bụ ghọọ anyị ahịa. Ha nwekwara ike ime ka anyị na Jehova dịrị ná mma ma ọ bụkwanụ gharazie ịdị ná mma. Dị ka ihe atụ, anyị nwere ike ikpebi ebe anyị ga-ebi, ihe anyị ga-eji na-akpa afọ anyị, ma ànyị ga-alụ di ma ọ bụ ma ànyị ga-alụ nwaanyị. Ikpebi ihe dị mma nwere ike ime ka anyị na-enwe obi ụtọ ma na-eme ihe Jehova chọrọ.

1. Olee otú Baịbụl nwere ike isi nyere gị aka ịna-ekpebi ihe dị mma ị ga-eme?

Tupu gị ekpebie ihe ị ga-eme, rịọ Jehova ka o nyere gị aka. Mụọkwa Baịbụl ka ị mata otú o si ele ihe ị chọrọ ikpebi anya. (Gụọ Ilu 2:3-6.) Mgbe ụfọdụ, Jehova na-enye iwu kwuru hoo haa ihe a ga-eme. Ọ dị otú a, ihe kacha mma ị ga-eme bụ ime ihe ahụ o kwuru.

Ma, gịni ka ị ga-eme ma ọ bụrụ na e nweghị iwu doro anya dị na Baịbụl kwuru ihe ị ga-eme? Jehova ka ga-enyere gị aka ịma ‘ụzọ i kwesịrị iso.’ (Aịzaya 48:17) Olee otú ọ ga-esi enyere gị aka? Ihe ụfọdụ Baịbụl kwuru nwere ike inyere gị aka. Ihe ndị a Baịbụl kwuru bụ eziokwu ndị na-enyere anyị aka ịmata otú Chineke si ele ihe anya na otú o si eche echiche. Ọtụtụ mgbe, anyị na-amata otú Chineke si ele otu ihe anya ma anyị gụọ ebe ụfọdụ na Baịbụl. Ọ bụrụ na anyị achọpụta otú Jehova si ele ihe anya, ọ ga-enyere anyị aka ikpebi ihe ga-adị ya mma.

2. Olee ihe ndị i kwesịrị ichebara echiche tupu i kpebie ihe ị ga-eme?

Baịbụl sịrị na “onye ma ihe na-echebara ihe ọ bụla ọ chọrọ ime echiche.” (Ilu 14:15) Ihe a pụtara na tupu anyị ekpebie ihe ọ bụla, anyị kwesịrị ịnọdụ ala chebara ya echiche. Ka ị na-echebara ya echiche, jụọ onwe gị, sị: ‘Olee ihe Baịbụl kwuru ga-enyere m aka ịma ihe m ga-eme? Olee ihe m ga-ekpebi ga-eme ka obi ruo m ala? Olee otú ihe a m chọrọ ikpebi ga-esi gbasa ndị ọzọ? Nke ka nke, ihe a m chọrọ ikpebi, ọ̀ ga-eme Jehova obi ụtọ?’​—Diuterọnọmi 32:29.

Jehova nwere ikike ịgwa anyị ihe bụ́ ihe ọma na ihe bụ́ ihe ọjọọ. Ọ bụrụ na anyị amara iwu Chineke na ihe ndị o kwuru na Baịbụl, kpebiekwa ịna-eme ha, anyị si otú ahụ azụ akọnuche anyị. Akọnuche bụ ihe Chineke kenyere anyị n’ahụ́ nke na-agwa anyị ihe dị mma na ihe na-adịghị mma. (Ndị Rom 2:​14, 15) Anyị ga na-ekpebi ihe dị mma ma ọ bụrụ na anyị azụọ akọnuche anyị nke ọma.

MỤTAKWUO IHE

3. Kwere ka Baịbụl nyere gị aka mgbe ị chọrọ ikpebi ihe

VIDIO: Kwee Ka Ụkpụrụ Baịbụl Na-eduzi Gị (5:54)

• Gịnị ka Jehova hapụrụ anyị ka anyị na-emere onwe anyị?

• Gịnị mere Jehova ji hapụ anyị ka anyị na-ekpebiri onwe anyị ihe anyị ga-eme?

• Olee ihe o nyere anyị ga-enyere anyị aka ịna-ekpebi ihe ga-akacha baara anyị uru?

Unu chọọ ịhụ otu n’ime ihe ndị Baịbụl kwuru nwere ike ịbara anyị uru, gụọnụ Ndị Efesọs 5:15, 16. Unu gụchaa ya, unu eleba anya n’otú unu ga-esi ‘jiri oge unu na-eme ihe kacha mkpa’ n’ihe gbasara . . .

• ịna-agụchi Baịbụl anya.

• ịbụ ezigbo di ma ọ bụ ezigbo nwunye, ịbụ ezigbo nne ma ọ bụ ezigbo nna, nakwa ịbụ ezigbo nwa.

• ịna-aga ọmụmụ ihe.

4. Zụọ akọnuche gị ka o nyere gị aka ịna-ekpebi ime ihe dị mma

VIDIO: ‘Nweenụ Ezi Akọnuche’ (5:13)

• Olee ihe ndị nwanna nwaanyị anyị lere na vidio a mere iji zụọ akọnuche ya na iji kpebie ihe ga-eme Jehova obi ụtọ?

Gịnị mere na anyị ekwesịghị ịgwa ndị ọzọ ka ha kpebiere anyị ihe anyị kwesịrị ikpebi? Gụọnụ Ndị Hibru 5:14. Unu gụchaa ya, unu eleba anya n’ajụjụ ndị a:

• Ọ bụ eziokwu na ịhapụ ndị ọzọ ka ha kpebiere anyị ihe nwere ike yie ihe dị mfe ime, gịnị ka anyị kwesịrị ịmata n’onwe anyị?

• Olee ihe ndị anyị nwere, ndị ga-enyere anyị aka ịna-azụ akọnuche anyị ka anyị nwee ike ịna-ekpebi ime ihe dị mma?

5. Hapụ ndị ọzọ ka ha mee ihe akọnuche ha gwara ha

Ihe otu onye kpebiri ime nwere ike ịdị iche n’ihe onye ọzọ kpebiri ime. Olee otú anyị ga-esi hapụ ndị ọzọ ka ha mee ihe akọnuche ha gwara ha? Chegodị gbasara ihe atụ abụọ a:

Ihe atụ nke mbụ: Otu nwanna nwaanyị itecha ntecha na-amasị gafere ọgbakọ ọzọ ma chọpụta na itecha ntecha na-ewe ọtụtụ ụmụnna nwaanyị nọ na ya iwe.

Gụọnụ Ndị Rom 15:1 na 1 Ndị Kọrịnt 10:23, 24. Unu gụchaa ha, unu eleba anya n’ajụjụ ndị a:

• Gịnị ka nwanna nwaanyị ahụ nwere ike ikpebi ime n’ihi ihe amaokwu ndị a kwuru? Olee otú ị ga-esi eme ihe amaokwu ndị a kwuru ma ọ bụrụ na akọnuche onye gị na ya nọ anabataghị ya ime ihe ndị akọnuche gị nabatara gị ime?

Ihe atụ nke abụọ: Otu nwanna kpebiri na ya agaghị na-aṅụ mmanya na-aba n’anya n’agbanyeghị na ọ ma na Baịbụl ekwughị na ịṅụru ya n’ókè bụ ihe ọjọọ. Ma mgbe ọ gara otu oriri, ọ hụrụ ụmụnna ndị ọzọ ka ha na-aṅụ mmanya na-aba n’anya.

Gụọnụ Ekliziastis 7:16 na Ndị Rom 14:1, 10. Unu gụchaa ha, unu eleba anya n’ajụjụ a:

• Olee otú ị ga-esi eme ihe amaokwu ndị a kwuru ma ọ bụrụ na ị hụ ka ndị ọzọ na-eme ihe akọnuche gị na-anabataghị?

Olee ihe ndị ga-enyere anyị aka ịna-ekpebi ihe dị mma?

1.Rịọ Jehova ka o nyere gị aka ikpebi ihe ị ga-eme.​—Jems 1:5.

2.Mee nchọnchọ na Baịbụl nakwa n’akwụkwọ ndị e ji amụ Baịbụl ka ị mata ihe Baịbụl kwuru gbasara ihe ahụ ị chọrọ ikpebi. I nwekwara ike ịjụ Ndị Kraịst ma nke a na-akọ ihe ha chere.

3.Chee gbasara ihe ihe ahụ ị chọrọ ikpebi nwere ike ime akọnuche gị nakwa akọnuche ndị ọzọ.

NCHỊKỌTA

Ihe ga-eme ka anyị kpebie ihe dị mma bụ ibu ụzọ chọpụta otú Jehova ga-esi ele ihe ahụ anya, cheekwa ma ihe ahụ ọ̀ ga-abara ndị ọzọ uru ka ọ̀ ga-emebiri ha ihe.

Ajụjụ ndị e ji echeta ihe a mụrụ

• Olee ihe ga-enyere anyị aka ịna-ekpebi ihe ndị na-amasị Jehova?

• Olee otú ị ga-esi zụọ akọnuche gị?

• Olee otú ị ga-esi gosi na ị na-ahapụ ndị ọzọ ka ha mee ihe akọnuche ha gwara ha?

IHE Ị GA-ELEBAKWU ANYA

Gịnị ka anyị ga-eme ka ihe ndị anyị na-ekpebi ime mee ka anyị na Chineke dịrịkwuo ná mma?

“Mee Mkpebi Ndị Na-ewetara Chineke Otuto” (Ụlọ Nche, Eprel 15, 2011)

Chọpụtakwuo otú Jehova si akụziri anyị ihe.

Jehova Na-eduzi Ndị Ya (9:50)

Chọpụta ihe ndị nyeere otu nwoke aka ikpebi otu ihe siiri ya ike ikpebi.

Ihe Ọma Niile Jehova Na-enye Anyị Bụ Ihe E Ji n’Aka (5:46)

Chọpụtakwuo otú anyị nwere ike isi mee ihe dị Jehova mma mgbe ọ na-enyeghị iwu a kapịrị ọnụ gbasara otu okwu.

“Iwu Bible Ọ̀ Dị Gị Mkpa n’Ihe Nile?” (Ụlọ Nche, Disemba 1, 2003)