Amamihe Chineke—Olee Otú E Si Egosipụta Ya?

“AMAMIHE nke ogbenye ahụ bụ ihe a na-eleda anya, a dịghị anụkwa okwu ya nile.” Eze Solomọn maara ihe ji okwu ndị a mechie akụkọ ya banyere otu nwoke bụ́ ogbenye ma mara ihe, bụ́ onye zọpụtara otu obodo pụọ ná mbibi. Otú ọ dị, n’ụzọ dị mwute, “mmadụ echetaghị nwoke ahụ bụ́ ogbenye.”—Eklisiastis 9:14-16.

Ụmụ mmadụ na-eledakarị ndị na-enwechaghị ihe anya, ọbụna ma ọ bụrụ na ndị ogbenye a arụwo ọrụ ndị dị mma. Otú a ka ọ dịịrị n’ebe Jisọs nọ. Aịsaịa buru amụma banyere ya, sị: “E ledara ya anya, ọ bụkwa onye mmadụ hara aka; onye nwere ọtụtụ ihe mgbu na onye maara ọrịa nke ọma.” (Aịsaịa 53:3) Ụfọdụ ndị ledara Jisọs anya nanị n’ihi na ọ nọghị n’ọkwá ma ọ bụ bụrụ onye a ma ama dị ka ndị ndú nke oge ya. Ma, o nwere amamihe nke karịrị nnọọ nke mmadụ ọ bụla na-emehie emehie. Ndị nọ n’obodo Jisọs jụrụ ikweta na “Nwa onye ọkà” a gosipụtara amamihe dị otú ahụ ma rụọ ọrụ ndị dị ike otú ahụ. Otú ọ dị, nke ahụ bụ oké ihie ụzọ, n’ihi na ihe ndekọ ahụ gara n’ihu ikwu na Jisọs “[arụghị] ọtụtụ ọrụ dị ike n’ebe ahụ n’ihi ekweghị ekwe ha.” Lee ihe mfu ọ bụụrụ ndị ahụ!—Matiu 13:54-58.

Ka anyị ghara ihie otu ụzọ ahụ. “A gụkwara amamihe n’onye ezi omume site n’ọrụ ya nile,” ka Jisọs kwuru. A na-amata ndị na-arụ ọrụ Chineke ma na-eme ka e nweta amamihe si n’eluigwe, ọ bụghị site n’ọkwá ha ma ọ bụ ọnọdụ ha nọ na ya n’etiti ọha mmadụ, kama site ná “mkpụrụ ọma” ha na-amịpụta—okwukwe ha na ọrụ ha ndị dabeere na Bible.—Matiu 7:18-20; 11:19.