1:2, 3—Olee ihe mere icheta ịhụnanya nwata nwoke ahụ na-azụ atụrụ ji dị ka mmanya vaịn, icheta aha ya adịkwa ka mmanụ otite? Dị nnọọ ka mmanya na-eme ka obi mmadụ ṅụrịa, ịwụsa mmadụ mmanụ n’isi emeekwa ka ahụ́ jụrụ ya, icheta ịhụnanya nwata nwoke ahụ nwere n’ebe ọ nọ na aha ya gbara nwa agbọghọ ahụ ume ma kasie ya obi. (Abụ Ọma 23:5; 104:15) Ezi Ndị Kraịst, karịsịa ndị e tere mmanụ, na-enwetakwa ike mgbe ha chetara ịhụnanya Jizọs Kraịst gosiri n’ebe ha nọ.

1:2; 2:6. Ezi ngosipụta nke ịhụnanya nwere ike ikwesị ekwesị mgbe mmadụ abụọ na-achọ ịlụ onwe ha ka na-akpa akpa. Otú ọ dị, ha kwesịrị ịkpachara anya iji hụ na ihe ha na-eme bụ igosipụta ezi ịhụnanya ha nwere n’ebe ibe ha nọ ọ bụghị igosipụta agụụ mmekọahụ na-ezighị ezi, bụ́ nke nwere ike iduga ha ná mmekọahụ rụrụ arụ.—Ndị Galeshia 5:19.