Ole Ndị Na-ekwusa Ozi Ọma Ahụ?

“ . . . n’elu ụwa dum mmadụ bi.”—MATIU 24:14.

NDỊÀMÀ JEHOVA na-ekwusa ozi ọma ahụ n’ụwa niile. Ha na-eme nke a n’ụzọ dị iche iche. Otu ụzọ bụ . . .

Okwu Ọnụ. Dị ka Jizọs na ndị na-eso ụzọ ya, Ndịàmà Jehova na-eji ozi ọma ahụ agakwuru ndị mmadụ. (Luk 8:1; 10:1) Ha anaghị atụ anya ka ndị mmadụ bịakwute ha. Ndịàmà Jehova, bụ́ ndị dị ihe karịrị nde asaa, na-agbara ndị mmadụ àmà banyere Alaeze Chineke. Ha na-ekwusa ozi ọma site n’ụlọ ruo n’ụlọ, n’okporo ámá, na telefon nakwa n’ụzọ ndị ọzọ. N’afọ gara aga, Ndịàmà ji ihe karịrị otu ijeri awa na ọkara rụọ ọrụ a.

Ihe ha na-akụziri ndị ọzọ abụghị naanị banyere Alaeze Chineke, kamakwa, “ihe niile [Jizọs] nyere . . . n’iwu.” (Matiu 28:20) Ha na-eduziri ihe karịrị nde mmadụ asatọ ọmụmụ Baịbụl mgbe niile n’ụlọ ha n’efu.

Ndịàmà na-ekwusa ozi ọma n’ụwa niile—na narị mba abụọ na iri atọ na isii. Ha na-ekwusara ndị si n’agbụrụ dị iche iche ozi ọma. Ha na-ekwusa ya n’ime obodo na n’obodo ndị mepere emepe, n’oké ọhịa Amazọn na na nke Saịberia, n’ọzara Afrịka nakwa n’Ugwu Himalaya. A naghị akwụ ha ụgwọ maka ọrụ a; n’ihi ịhụnanya ha nwere maka Chineke na ndị agbata obi ha, ha na-eji ego ha na oge ha arụ ya. Ihe ọzọkwa ha ji ekwusa ozi ọma bụ . . .

Akwụkwọ E Biri Ebi. A na-ebipụta magazin a, nke aha ya zuru ezu bụ Ụlọ Nche nke Na-ekwusa Alaeze Jehova, ugbu a n’otu narị asụsụ na iri asatọ na ise, mbipụta ya nke ọ bụla na-akarịkwa nde iri anọ na abụọ. A na-ebipụta magazin a na-ebipụtakọ ya na nke a, bụ́ Teta!, nke na-akpọsakwa Alaeze ahụ, n’asụsụ iri asatọ na atọ, mbipụta ya nke ọ bụla na-adịkwa ihe dị ka nde iri anọ.

Ndịàmà nwere akwụkwọ, broshuọ, traktị, siidi/MP3, na diiviidi ndị e ji akụziri ndị mmadụ Baịbụl n’ihe dị ka narị asụsụ ise na iri anọ. Naanị n’ime afọ iri gara aga, Ndịàmà emepụtala ma kesaa ihe ndị a ihe dị ka ijeri iri abụọ, bụ́ ihe dị ka atọ maka onye ọ bụla bi n’ụwa!

Ndịàmà Jehova ebipụtakwala ma ọ bụ nye ikike ka e bipụta nsụgharị Baịbụl dị iche iche. Ugbu a, e nwere Baịbụl Nsọ—Nsụgharị Ụwa Ọhụrụ nke Akwụkwọ Nsọ, nke zuru ezu na nke na-ezughị ezu n’asụsụ iri itoolu na isii, bụ́ nke Ndịàmà sụgharịrị, na-ebipụta ma na-ekesa. E kesaala ya ihe karịrị otu narị nde na nde iri isii na isii. Ndịàmà na-ekwusakwa ozi ọma nke Alaeze ahụ . . .

N’Ọmụmụ Ihe Ndị Kraịst. Ọmụmụ ihe a na-enwe n’Ụlọ Nzukọ Alaeze kwa izu abụghị naanị nnọkọ okpukpe; a haziri ha iji kụziere ndị bịaranụ ihe. A na-eji isiokwu ndị si na Baịbụl ekwu okwu, a na-ejikwa magazin Ụlọ Nche na akwụkwọ ndị ọzọ amụ Baịbụl. N’ọmụmụ ihe Ndịàmà, ha na-amụtakwa otú ha ga-esi na-ekwusakwuru ndị ọzọ ozi ọma ahụ nke ọma.

Ndịàmà na-amụ otu ihe n’ihe karịrị otu narị puku ọgbakọ na puku asaa n’ụwa niile, bụ́ nke so eme ka ha na-adị n’otu. Mmadụ niile nwere ike ịbịa ọmụmụ ihe ndị a. A naghị ana ego na ha. N’ezie, ihe a niile agaghị enwe isi ma ọ bụrụ na Ndịàmà anaghị eme ihe ha na-ekwusa. N’ihi ya, ha na-agbalị ime ka ndị ọzọ nwee mmasị n’ozi ọma ahụ . . .

Site n’Ihe Nlereanya Ha. Ha na-agbalị ibi ezigbo ndụ otú Ndị Kraịst kwesịrị ibi, na-anwa ike ha niile imeso ndị ọzọ otú ha ga-achọ ka ndị ọzọ si meso ha. (Matiu 7:12) Ọ bụ ezie na ha bụ ndị na-ezughị okè ma na-emejọ ihe mgbe ụfọdụ, ha na-eji obi ha niile achọ iji ịhụnanya emeso mmadụ niile ihe, ọ bụghị naanị site n’ikwusa ozi ọma, kamakwa site n’inyere ndị ọzọ aka mgbe ọ bụla o kwere ha mee.

Ihe bụ́ mkpa Ndịàmà Jehova abụghị ime ka ụwa niile chegharịa. Kama nke ahụ, dị ka Jizọs buru n’amụma, mgbe a rụrụ ọrụ ahụ otú dị Jehova mma, ọgwụgwụ ga-abịa. Olee ihe nke ahụ ga-apụtara ụwa na ndị bi n’ime ya?

[Foto dị na peeji nke 7]

Ndịàmà Jehova na-ekwusa ozi ọma n’ụwa niile

Gịnị Bụ “Ọgwụgwụ”?

“. . . mgbe ahụkwa ka ọgwụgwụ ga-abịa.”—MATIU 24:14.

AKỤKỌ banyere ọgwụgwụ ụwa juru ebe niile. Ọtụtụ akwụkwọ, fim, na magazin, ma ndị nke na-akpa ọchị ma ndị nke sayensị, na-akọ akụkọ dị iche iche banyere ụbọchị mbibi. Ụfọdụ ihe ha na-ekwu ga-ebibi ụwa bụ agha nuklia, nkume si na mbara igwe na ụwa ịkụkọta, nje na-egbu mmadụ, ihu igwe ịgbanwe gabiga ókè, ma ọ bụ ndị si na mbara igwe ịwakpo ụwa.

Ihe okpukpe dị iche iche kweere dịkwa iche iche; ọtụtụ na-akụzi na “ọgwụgwụ” ga-abụ ọgwụgwụ nke ihe niile dị ndụ n’ụwa. Mgbe otu ọkà mmụta okpukpe na-akọwa Matiu 24:14, o dere ihe a na-emetụ n’ahụ́: “Amaokwu a so n’amaokwu ndị kasị mkpa n’Okwu Chineke . . . Ọgbọ anyị na-eche mbibi dị nnọọ ukwuu ihu nke na ọ bụ naanị mmadụ ole na ole na-aghọta ụdị ebelebe ga-egbunụ.”

Ndị na-ekwu ụdị ihe ahụ na-echefu otu ihe dị mkpa, nke bụ́ na Jehova Chineke mere ka ụwa “guzosie ike”; o ‘keghị ya n’efu, kama ọ kpụrụ ya ka e biri n’ime ya.’ (Aịzaya 45:18) N’ihi ya, mgbe Jizọs kwuru banyere “ọgwụgwụ,” ihe ọ na-ekwu abụghị na a ga-ebibi ụwa; ọ pụtaghịkwa na a ga-ebibi mmadụ niile bi na ya. Ihe ọ na-ekwu bụ na a ga-ebibi ndị ajọ omume, bụ́ ndị kpọrọ ekwo nkụ jụ ibi ndụ kwekọrọ ná ntụziaka ndị Jehova ji ịhụnanya nye anyị.

Ka anyị tụlee otu ihe atụ. Ka e were ya na i nwere otu ụlọ mara mma ma kwe ka ndị mmadụ biri na ya n’efu. Ụfọdụ ndị bi na ya bi n’udo ma na-elekọtara gị ụlọ gị. Ma, ndị ọzọ bi na ya bụ nnọọ ndị nsogbu, na-alụ ọgụ mgbe niile ma na-akparị ndị nke ahụ bi n’udo. Ha nọ na-ebibisị ụlọ gị ma leghara mbọ niile ị na-agba ime ka ha kwụsị ya anya.

Olee ihe ị ga-eme iji kwụsị nsogbu ahụ? Ị̀ ga-akụtu ụlọ gị? Mbanụ. Ma eleghị anya, ị ga-achụpụ ndị nke ọjọọ ahụ ma mezie ihe ndị ha mebiri.

Jehova ga-eme ihe yiri nke ahụ. O nyere otu ọbụ abụ mmụọ nsọ ide, sị: “A ga-ebipụ ndị na-eme ihe ọjọọ, ma ọ bụ ndị nwere olileanya n’ebe Jehova nọ ga-enweta ụwa. N’oge na-adịghị anya, onye ajọ omume agakwaghị anọ; ị ga-elekwa anya n’ebe ọ na-anọ, ma ọ gaghị anọ ya. Ma ndị dị umeala n’obi ga-enweta ụwa, ha ga-enwekwa obi ụtọ dị ukwuu n’ihi udo nke zuru ebe niile.”—Abụ Ọma 37:9-11.

Pita onyeozi kwukwara otu ihe ahụ. O si n’ike mmụọ nsọ dee, sị: “E nwere eluigwe nke dị site n’oge ochie na ala kpụkọrọ ọnụ nke si na mmiri pụta ma guzoro n’etiti mmiri site n’okwu Chineke; e jikwa ihe ndị ahụ bibie ụwa nke oge ahụ mgbe e mere ka iju mmiri rikpuo ya.” (2 Pita 3:5, 6) Ihe Pita onyeozi na-ekwu banyere ya ebe a bụ Iju Mmiri nke oge Noa. E bibiri ụwa nke bụ́ ndị na-anaghị asọpụrụ Chineke, ma e bibighị elu ala. Iju Mmiri ahụ zuru ụwa ọnụ bụụrụ “ndị na-adịghị asọpụrụ Chineke n’ọdịnihu ihe atụ.”—2 Pita 2:6.

Pita kwuzikwara, sị: “Eluigwe na ụwa dị ugbu a ka e debeere ọkụ.” Ọ bụrụ na anyị akwụsị ebe ahụ, anyị nwere ike ịghọtahie ihe o kwuru. Ma, buru n’uche na amaokwu ahụ gara n’ihu kwuo, sị: “Na ụbọchị mbibi nke ndị na-adịghị asọpụrụ Chineke.” Ọ bụghị elu ala ka e bibiri, kama ọ bụ ndị na-adịghị asọpụrụ Chineke. Olee ihe sochiri ya? Pita dere, sị: “E nwere eluigwe ọhụrụ [Alaeze Mesaya nke Chineke] na ụwa ọhụrụ [ọha mmadụ bụ́ ndị ezi omume] anyị na-echere dị ka nkwa ya si dị, ezi omume ga-ebikwa n’ime ha.”—2 Pita 3:7, 13.

Amụma Baịbụl gosikwara na mgbe “ọgwụgwụ” ahụ ga-abịa adịla nso. Gụọ Matiu 24:3-14 na 2 Timoti 3:1-5 iji hụ ihe ndị gosiri na nke a bụ eziokwu.a

Ò juru gị anya na Matiu 24:14, bụ́ amaokwu nwatakịrị nwedịrị ike ịghọta, na-agbagwoju ọtụtụ ndị anya? E nwere ihe ndị kpatara ya. Setan emeela ka ndị mmadụ kpuo ìsì ka ha ghara ịhụ eziokwu ndị magburu onwe ha dị n’Okwu Chineke. (2 Ndị Kọrịnt 4:4) Chineke zonahụrụ ndị mpako nzube ya ma kpugheere ya ndị dị umeala n’obi. Jizọs kwuru banyere nke a, sị: “Nna, Onyenwe eluigwe na ụwa, ana m enye gị otuto n’ihu ọha n’ihi na i zonahụwo ndị amamihe na ndị nwere ọgụgụ isi ihe ndị a, i kpughewokwara ha ụmụ ọhụrụ.” (Matiu 11:25) Ọ bụụrụ anyị nnukwu ihe ùgwù iso ná ndị ahụ dị umeala n’obi ghọtara ihe Alaeze Chineke bụ n’ezie ma na-atụ anya ngọzi ndị ọ ga-ewetara ndị niile na-akwado ya!