ISI NKE 54
Ọrụ “Ohu ahụ Kwesịrị Ntụkwasị Obi, Onye Nwekwara Uche” Na-arụ
Jizọs bụ onyeisi ọgbakọ Ndị Kraịst. (Ndị Efesọs 5:23) N’oge anyị a, ọ nọ n’eluigwe si n’aka “ohu ahụ kwesịrị ntụkwasị obi, onye nwekwara uche” na-edu ndị na-eso ụzọ ya nọ n’ụwa. (Gụọ Matiu 24:45.) “Ohu” ahụ nwere ikike ime ihe ụfọdụ n’ihi na ọ bụ Jizọs ji aka ya họpụta ya. N’agbanyeghị ikike a o nwere, ọ ka bụ ohu Kraịst, na-arụkwara ụmụnna Kraịst ọrụ. Ònye bụ ohu ahụ? Olee otú o si elekọta anyị?
1. Ònye bụ “ohu ahụ kwesịrị ntụkwasị obi, onye nwekwara uche”?
Kemgbe ụwa, Jehova na-eji otu onye ma ọ bụ mmadụ ole na ole edu ndị ya. (Malakaị 2:7; Ndị Hibru 1:1) Mgbe Jizọs nwụchara, ndịozi ya na ndị okenye nọ na Jeruselem malitere idu Ndị Kraịst. (Ọrụ Ndịozi 15:2) Ụdị ihe ahụ na-emekwa taa n’ihi na ọ bụ ndị okenye ole na ole na-akụziri Ndị Kraịst Okwu Chineke, na-eduzikwa ozi ọma ha na-ekwusa. A na-akpọ ha Òtù Na-achị Isi nke Ndịàmà Jehova. Ọ bụ ha bụ “ohu ahụ kwesịrị ntụkwasị obi, onye nwekwara uche, onye [Jizọs] mere onye na-elekọta ezinụlọ ya.” (Matiu 24:45a) Ndị niile so n’Òtù Na-achị Isi bụ Ndị Kraịst e ji mmụọ nsọ tee mmanụ. Ha nwekwara olileanya na ha nwụọ, ha ga-agakwuru Kraịst n’eluigwe soro ya na-achị n’Alaeze ya.
2. Olee otú ohu ahụ kwesịrị ntụkwasị obi si akụziri anyị Okwu Chineke?
Jizọs kwuru na ohu ahụ kwesịrị ntụkwasị obi ga “na-enye [Ndị Kraịst ibe ya] nri ha n’oge kwesịrị ekwesị.” (Matiu 24:45b) Otú ahụ nri nkịtị anyị na-eri si eme ka anyị gbasie ike ka nri ohu ahụ na-enye anyị na-emekwa. Nri ahụ ọ na-enye anyị bụ Okwu Chineke. Ọ na-eme ka anyị mụta irubere Jehova isi, nweekwa ike ịna-arụ ọrụ Jizọs nyere anyị. (1 Timoti 4:6) A na-enye anyị nri ahụ ma anyị gaa ọmụmụ ihe, mgbakọ sekit na mgbakọ ukwu. Anyị na-enwetakwa ya ma anyị gụọ akwụkwọ dị iche iche e ji amụ Baịbụl ma ọ bụkwanụ lee vidio ndị na-enyere anyị aka ịghọta ihe Chineke chọrọ ka anyị na-eme nakwa ime ka anyị na ya dịrị ná mma na-aga.
MỤTAKWUO IHE
“Ohu ahụ kwesịrị ntụkwasị obi, onye nwekwara uche,” ya bụ, Òtù Na-achị Isi na-elekọta anyị. Chọpụta otú nlekọta a ọ na-elekọta anyị si dị mma.
Òtù Na-achị Isi na-akụziri Ndịàmà Jehova nọ n’ụwa niile okwu Chineke, na-eduzi ha ma na-enyere ha aka n’ụzọ dị iche iche
3. E kwesịrị ịhazi ndị ohu Jehova ahazi
Jizọs si n’aka Òtù Na-achị Isi na-ahazi ọrụ Ndịàmà Jehova na-arụ. Otú a e si ahazi ọrụ Ndịàmà Jehova ka e si hazie ọrụ Ndị Kraịst oge mbụ. Kpọnyenụ VIDIO a.
Gụọnụ 1 Ndị Kọrịnt 14:33, 40. Unu gụchaa ya, unu eleba anya n’ajụjụ a:
Olee otú amaokwu ndị a si gosi na Jehova chọrọ ka a hazie Ndịàmà ya ahazie?
4. Ohu ahụ kwesịrị ntụkwasị obi na-ahazi ozi ọma anyị na-ekwusa
Ikwusa ozi ọma bụ ọrụ kacha mkpa n’ọrụ niile Ndị Kraịst oge mbụ rụrụ. Gụọnụ Ọrụ Ndịozi 8:14, 25. Unu gụchaa ya, unu eleba anya n’ajụjụ ndị a:
Olee ndị nọ na-enye Ndị Kraịst oge mbụ ntụziaka gbasara otú ha ga-esi na-ekwusa ozi ọma?
Olee ihe Pita na Jọn mere mgbe ndịozi ndị ọzọ gwara ha ihe ha ga-eme?
N’ọrụ niile Òtù Na-achị Isi na-ahazi, nke kacha mkpa bụ ịhazi ọrụ ikwusa ozi ọma. Kpọnyenụ VIDIO a.
Jizọs gosiri na ikwusa ozi ọma dị ezigbo mkpa. Gụọnụ Mak 13:10. Unu gụchaa ya, unu eleba anya n’ajụjụ ndị a:
Gịnị mere ikwusa ozi ọma ji dị Òtù Na-achị Isi ezigbo mkpa?
Gịnị mere o ji dị mma ka “ohu ahụ kwesịrị ntụkwasị obi, onye nwekwara uche” na-ahazi ozi ọma a a na-ekwusa n’ụwa niile?
5. Ohu ahụ kwesịrị ntụkwasị obi na-ekwu ihe a ga-eme
Òtù Na-achị Isi na-agwa Ndị Kraịst nọ n’ụwa niile ihe ha ga-eme. Olee otú ha si ekpebi ihe ha ga-agwa ha? Chọpụta otú òtù na-achị isi nke Ndị Kraịst oge mbụ si kpebie ihe ha gwara Ndị Kraịst n’oge ahụ. Gụọnụ Ọrụ Ndịozi 15:1, 2. Unu gụchaa ya, unu eleba anya n’ajụjụ ndị a:
Olee ihe mere Ndị Kraịst oge mbụ na ibe ha ji nwewe nghọtahie?
Ole ndị ka Pọl, Banabas, na ndị ọzọ gakwuuru ka ha dozie nghọtahie ahụ?
Gụọnụ Ọrụ Ndịozi 15:12-18, 23-29. Unu gụchaa ya, unu eleba anya n’ajụjụ a:
Mgbe òtù na-achị isi nke Ndị Kraịst oge mbụ chọrọ ikpebi ihe a ga-eme, gịnị ka ha bu ụzọ mee ka ha nwee ike ịmata ihe bụ́ uche Chineke gbasara okwu ha kpụ n’ọnụ?—Leruonụ anya n’amaokwu nke 12, 15, na nke 28.
Gụọnụ Ọrụ Ndịozi 15:30, 31 na 16:4, 5. Unu gụchaa ha, unu eleba anya n’ajụjụ ndị a:
Gịnị ka Ndị Kraịst oge mbụ mere mgbe òtù na-achị isi gwara ha ihe ha ga-eme?
Olee otú Jehova si gọzie ha maka isi ha rubeere òtù na-achị isi?
Gụọnụ 2 Timoti 3:16 na Jems 1:5. Unu gụchaa ha, unu eleba anya n’ajụjụ a:
N’oge anyị a, gịnị na gịnị na-enyere Òtù Na-achị Isi aka ikpebi ihe a ga-eme?
ỤFỌDỤ NA-ASỊ na ọ bụ ndị mmadụ ka ị na-eso ụzọ ha ma ọ bụrụ na ị na-erubere Òtù Na-achị Isi isi.
Gịnị mere i ji kweta na ọ bụ Jizọs na-eduzi Òtù Na-achị Isi?
NCHỊKỌTA
Ọ bụ Òtù Na-achị Isi bụ “ohu ahụ kwesịrị ntụkwasị obi, onye nwekwara uche” Kraịst họpụtara. Ha na-agwa Ndị Kraịst nọ n’ụwa niile ihe ha ga-eme, na-akụzikwara ha okwu Chineke.
Ajụjụ ndị e ji echeta ihe a mụrụ
Ònye họpụtara “ohu ahụ kwesịrị ntụkwasị obi, onye nwekwara uche”?
Olee otú Òtù Na-achị Isi si elekọta anyị?
Ì kwetara na Òtù Na-achị Isi bụ “ohu ahụ kwesịrị ntụkwasị obi, onye nwekwara uche”?
IHE Ị GA-ELEBAKWU ANYA
Chọpụta otú e si hazie Òtù Na-achị Isi ịrụ ọrụ ha.
“Olee Otú E Si Hazie Òtù Na-achị Isi?” (Isiokwu gbara n’Ịntanet)
Chọpụta otú Òtù Na-achị Isi si agba mbọ ịhụ na okwu Chineke a na-akụziri anyị bụ eziokwu.
Olee otú ndị so n’Òtù Na-achị Isi si ele ọrụ ahụ Jizọs nyere ha anya?
Olee otú ọmụmụ ihe anyị na mgbakọ anyị si egosi na ọ bụ Jehova na-eduzi ọrụ Òtù Na-achị Isi na-arụ?