“Urodi nke Ubi”

ENWEGHỊ ọrụ. Ọnụ ahịa na-arị elu. Ịda ogbenye. Ndakpọ akụ na ụba. Okwu ndị a na-apụta ọtụtụ mgbe n’ụzọ na-aba ụba n’akwụkwọ akụkọ dị iche iche. Ha na-egosipụtakwa ihe isi ike nke ọtụtụ nde mmadụ na-eche ihu ka ha na-agbalị inye ezinụlọ ha nri na igbokwasị ha uwe oyiyi na ịchọrọ ha ebe ha ga-ebi.

Ọ na-emetụta ndị kwere ekwe na ndị na-ekweghị ekwe. Ma ahapụghị ndị kwere ekwe nanị ha n’iche nsogbu ndị ahụ ihu. Jisọs, mgbe ọ na-agwa ndị ahụ dị umeala n’obi na narị afọ ise mbụ okwu sịrị: “Leenụ anụ ufe nke eluigwe, na ha adịghị agha mkpụrụ, ha adịghị ewekwa ihe ubi, ha adịghị ekpokọtakwa ihe baa n’ọba; ma Nna unu nke eluigwe na-azụ ha. Unu onwe unu àbụghị ihe oké ọnụ ahịa karịa ha?”​—⁠Matthew 6:26.

Jisọs kwukwara, sị: “Rịbanụ urodi nke ubi ama, otú ha na-eto eto; ha adọgbughị onwe ha n’ọrụ, ha atụghịkwa ogho: ma asị m unu, na ọbụna Solomọn n’ebube ya nile, egbokwasịghị ya ákwà dị ka otu n’ime ndị a. Ma ọ bụrụ na Chineke eyikwasị ahịhịa nke ubi uwe otú a . . . ọ̀ gaghị eyikwasị karị unu uwe nke ukwuu?”​—⁠Matiu 6:​28-⁠30.

Nke a ọ̀ pụtara na ọ dịghị mkpa ka onye Kraịst rụọ ọrụ iji nweta ihe e ji ebi ndụ? Ọ dịghị ma ọlị! Onye Kraịst na-arụsi ọrụ ike ruo otú ọ dị mkpa iji kwụọ ụgwọ dị iche iche o ji. Pọl onyeozi kwuru, sị: “Ọ bụrụ na onye ọ bụla achọghị ịrụ ọrụ, ya gharakwa iri ihe.” (2 Ndị Tesalọnaịka 3:10) Otú o sina dị, onye Kraịst maara nlekọta ịhụnanya nke Chineke, nweekwa okwukwe na Nna ya nke eluigwe na-elekọta ya anya. Otú a, nchegbu nke ndụ adịghị eme ka ọ ghara iguzosi ike. Ọbụna n’oge ihe isi ike, ọ na-etinye ihe mbụ​—⁠ihe ime mmụọ⁠—​n’ọnọdụ mbụ. O kwere n’okwu ndị ahụ nke Jisọs: “Ma burunụ ụzọ chọọ alaeze ya, na ezi omume ya; a ga-atụkwasịkwara unu ihe ndị a nile.”​—⁠Matiu 6:33.